1 ካቲ አርጸክስስ ካተቴዳ ዎደ ታናና እትፐ ባብሎነ ቢታፐ ፑደ ዬዳ፥ የሩሳላመ ዬዳ ዛራቱዋ ካፓቱ ሀዋንታ፤ ኡንቱንቱ የለታ ማራይካ ሀዋ:

2 ፒንሃሳ ያራፐ ገርሾማ፥ እታማራ ያራፐ ዳኔላ፥ ዳዊታ ያራፐ ሀጹኡሻ፥

3 ሸካንያ ያራፐ፥ ፓርኦሻ ያራፐ ዛካራስነ ኡንቱንቱ የለታ ማራይ ጻፈቴዳ ሀራ እት ጼታነ እሻታሙ አቱማዋንታ፥

4 ፓሀት-ሞኣባ ያራፐ ዛራህያ ናኣ ኤልዮኤናያነ አናና እትፐ ሀራ ላኡ ጼቱ አቱማዋንታ፥

5 ዛቱ ያራፐ ያሃዝኤላ ናኣ ሸካንያነ አናና እትፐ ሀራ ሄዙ ጼቱ አቱማዋንታ፥

6 አዲና ያራፐ ዮናታና ናኣ ኤቤዳነ አናና እትፐ ሀራ እሻታሙ አቱማዋንታ፥

7 ኤላማ ያራፐ አታልያ ናኣ ይሻእያነ አናና እትፐ ሀራ ላፑን ታሙ አቱማዋንታ፥

8 ሻፋጽያ ያራፐ ምካኤላ ናኣ ዛባድያነ አናና እትፐ ሀራ ሆስፑን ታሙ አቱማዋንታ፥

9 ዮኣባ ዛርያፐ ይህኤላ ናኣ ኦባድያነ አናና እትፐ ሀራ ላኡ ጼታነ ታማነ ሆስፑን አቱማዋንታ፥

10 ባና ያራፐ ዮሲፍያ ናኣ ሻሎሚታነ አናና እትፐ ሀራ እት ጼታነ ኡሱፑን ታሙ አቱማዋንታ፥

11 በባያ ያራፐ በባያ ናኣ ዛካራሳነ አናና እትፐ ሀራ ላታማነ ሆስፑን አቱማዋንታ፥

12 አዝጋዳ ያራፐ ሀቃጻና ናኣ ዮሀናናነ አናና እትፐ ሀራ እት ጼታነ ታሙ አቱማዋንታ፥

13 አዶንቃማ ያራፐ ዉርሰን ስሜዳዋንቱ፥ ኤልፈሌጻ፥ ይኡኤላ፥ ሻማእያነ ኡንቱንቱና እትፐ ሀራ ኡሱፑን ታሙ አቱማዋንታነ፥

14 ቃይ ብግዋያ ያራፐካ ኡታያ፥ ዛኩራነ ኡንቱንቱና እትፐ ሀራ ላፑን ታሙ አቱማዋንታ።

15 ታን እዝር ኡንቱንቱ አሃዋ ግያ ሳኣኮ ጎግያ ሻፋ ኤለካ ሺሻይ። ኑን ሄ ሳኣን ዱንካኒደ፥ ሄዙ ጋላሳ ታኬዶ። ቃይ ታን ሄ ሳኣን ደእያ አሳነ ቄሳቱ ዋ ቆፕያ ዎደ፥ ሌዊያ ዛራቱዋፐ እቱዋነ ደማበይከ። 16 ሄዋ ድራዉ፥ ካፑዋ ኤልኤዛራ፥ አርኤላ፥ ሻማእያ፥ ኤልናታና፥ ያሪባ፥ ኤልናታና፥ ናታና፥ ዛካራሳነ ማሹላማ ግያዋንታነ ቃይ አዳ ኤራንቻ አሳ ግድያ ዮያሪባነ ኤልናታና ጼሳድ። 17 ኑ ጾሳ ጎልያን ኦያ አሳ ኑዉ የዳና ማላ፥ ካስፍያ ግያ ሳኣን ደእያ ሌዋቶ ካፑዋ ግድያ እዶኮነ አ አቱማ ዳቦቱዋኮ፥ ሄዋንቱካ ጌሻ ጎልያ ቆማ ግድያዋንቱኮ ኡንቱንታ ኪታድ። 18 ኑ ጾሳ ሎኦ ኩሺ ኑ ቦላን ደእያ ድራዉ፥ ሸረብያ አ ናናነ አ እሻቱዋና፥ ኡባና ታማነ ሆስፑኑዋ ኡንቱንቱ ኑዉ የዴድኖ። እ እስራኤልያ ናኣ ሌዊያ ዛርያ ግድያ ማህላ ያራነ ሎይ አኬካይ ደእያ አሳ። 19 ቃይ ሀሻብያ፥ ማራራ ያራ ግድያ ይሻእያራ፥ አ ናናነ አ እሻቱዋ ላታሙዋና የዴድኖ። 20 ሄዋ ቦላካ ሌዋቱዋ ማዳናዳን ጊደ፥ ዳዊተነ አናና ኦያ ካፓቱ ሱንዳ ጌሻ ጎልያ ቆማቱዋፐካ ላኡ ጼታነ ላታሙዋ የዴድኖ። ሄዋንቱ ኡባቱ ባረንቱ ሱንን ጻፈቴድኖ።

21 ሄዋፐ ጉይያን፥ ኑ ጾሳ ስንን ኑ ሁጲያ ካዉሺደ፥ እ ኑ ኦግያን ኑዉ፥ ኑ ናናቱዋነ ኑ ማጹዋ ኡባዉ ሳሮተ እማናዳን ዎሳና ማላ፥ ሄዋን አሃዋ ሻፋን ኤለካ ታን ጾማ አዋያድ። 22 አያዉ ጎፐ፥ ካትያዉ ኑን ካሰ፥ "ኑ ጾሳ ሎኦ ኩሺ አ ኮይያዋንቱና እትፐ ደኤ፤ ሽን አ ዎልቃማ ሀንቁ አ አግያዋንቱ ቦላን ደኤ" ያጊደ ኦዴዳ ድራዉ፥ ኑን ብያ ኦግያን ደእያ ሞርከቱዋፐ ኑና ናጋናዳን ኦላንቻቱዋነ ፓራ አሳቱዋ እማናዳን ካትያ ኦቻናዉ ታን ዬላታድ።

23 ሄዋ ድራዉ፥ ኑን ጾሚደ፥ ጾሳ ዎሴዶ፤ እ ኑ ዎሳ ስሴዳ።

24 ቄሳቱ ዋ ካፓቱዋፐ ሸረብያ፥ ሀሻብያነ ሀራ ኡንቱንቱ ዳቦ ግዴዳ ታሙ አቱማ አሳቱዋ ታን ዶራድ። 25 ካቲ፥ ካትያና ዞረትያዋንቱ፥ ካትያና ኦያዋንቱነ እስራኤልያ ኡባይ ኑ ጾሳ ጎልያዉ እሜዳ ብራ ዎርቃነ፥ ሚሻቱዋ ኡባ ልካደ ኡንቱንቱ ኩሽያን ሼድ። 26 ታን ኡንቱንቶ ልኬዳባይ ሀዋ: ላታማነ ላኡ ሻአ ኪሎ ግራመ ዴጽያ ብራ፥ ሄዙ ሻአነ ኦይዱ ጼቱ ኪሎ ግራመ ዴጽያ ብራፐ ኦሰቴዳ ጼቱ ሚሻቱዋ፥ ሄዙ ሻአነ ኦይዱ ጼቱ ኪሎ ግራመ ዴጽያ ዎርቃ፥ 27 ሆስፑን ኪሎ ግራመነ ኦይዱ ጼቱ ግራመ ዴጽያ ዎርቃፐ ኦሰቴዳ ላታሙ ሳነቱዋነ ዎርቃዳን አልኦነ ሙሩታ ግዴዳ ናሃስያፐ ኦሰቴዳ ላኡ ሳነቱዋ።

28 ሄዋፐ ጉይያን፥ ታን ኡንቱንቶ ሀዋዳን ያጋድ፤ "ህንተነ ሀ ሚሻቱ ኡባይካ መና ጎዳዉ ዱማቴድታ፤ ሀ ብራይነ ዎርቃይ አሳይ ባረ ሸንያን መና ጎዳዉ፥ ህንተንቱ አዎቱዋ ጾሳዉ እሜዳዋ። 29 የሩሳላመን ደእያ መና ጎዳ ጎልያን ሻሉዋ ዎያ ጎልያ ጋኪደ፥ ቄስያ ካፓቱዋ ስንን፥ ሌዋቱዋ ስንንነ እስራኤልያ ዛራቱዋ ካፓቱዋ ስንን እማና ጋካናዉ፥ ሀ ሚሻቱዋ ሎይ ናግተ" ያጋድ። 30 ሄዋ ድራዉ፥ ቄሳቱ ነ ሌዋቱ የሩሳላመን ደእያ ኑ ጾሳ ጎልያዉ አፋናዉ ብራ፥ ዎርቃነ ሀራ ሚሻቱዋ ኡባ ሚዛንያን ልኪደ ሼቴድኖ።

31 ሄዋፐ ጉይያን፥ ኑን ኮይሮ አግናን ታማነ ላኤን ጋላሳን የሩሳላመ ባናዉ አሃዋ ሻፋ ማታፐ ደንዴዶ። ብያ ዎደ፥ ኑ ቦላን ደእያ ኑ ጾሳ ሎኦ ኩሺ ኑ ብያ ኦግያን ደእያ ሞርከቱዋፐነ ፓኖቱዋፐ ኑና ናጌዳነ አሼዳ። 32 ኑን የሩሳላመ ጋኪደ፥ ያን ሄዙ ጋላሳ ኡቴዶ።

33 ኦይደን ጋላስ ብራ፥ ዎርቃነ ሀራ ሚሻቱዋ ኡባካ ልኪደ፥ ኦርዮና ናኣ ቄስያ ማረሞታዉ ሼዶ። ፒንሃሳ ናኣ ኤልኣዛረ፥ ሌዊያ ግድያ ኢያሱ ናኣ ዮዛባድነ ቢኑያ ናኣ ኖኣደ አናና እትፐ ደኢኖ። 34 ኡባባይካ ፓይደቴዳነ ልከቴዳ፤ ኡባና አያ ኬሻ ግዴደንቶ፥ ሄ ዎደ ጻፈቴዳ።

35 ሄዋፐ ጉይያን፥ ኦሞዱዋፐ ስሜዳ አሳይ እስራኤልያ ጾሳዉ ጹግያ ያርሹዋ ያርሼድኖ። ኡንቱንቱ እስራኤልያ ኡባ ድራዉ፥ ታማነ ላኡ ኮሩማቱዋ፥ ኡዱፑን ታማነ ኡሱፑን ዶርሳ ኦርገቱዋነ ላፑን ታማነ ላፑን ዶርሳ ማራቱዋ፥ ቃይ ናጋራ ያርሾካ ታማነ ላኡ ዴሻ ኦርገቱዋ ያርሼድኖ። ሀዌ ኡባይ ጹግያ ያርሹዋ ግዲደ፥ መና ጎዳዉ ሺቄዳ። 36 ኡንቱንቱ ቃይ ካቲ አዛዜዳ አዛዙዋካ ካትያፐ ጋርሳና ቢታ ሞድያዋንቱነ ኤፍራጺሳ ሻፋፐ አዋይ ዉልያ ባጋ ቢታ ሞድያዋንቶ እሜድኖ፤ ኡንቱንቱ እስራኤልያ አሳነ ጾሳ ጎልያ ኪታ ማዴድኖ።