Ester 9

ፑሪማ ባላ

20 ማርዶክዮስ ሀ ሀኔዳ ኡባ ታርክያ ጻፊደ ዳብዳቢያ ካትያ አርጸክሲሳ ቢታቱዋን ኡባን፥ ሃኩዋን ማታን፥ ደእያ አይሁዳ ኡባዉ ኪቴዳ። 21 ሄ ዳብዳቢያን ማርዶክዮስ አዳረ አግናን ታማነ ኦይደንነ ታማነ እቼሻን ጋላሳቱዋ፥ አይሁዳቱ ላይን ላይን ባላ ኦደ ቦንቻና ማላ፥ ኡንቱንቶ ኦዴዳ። 22 አያዉ ጎፐ፥ ሄ ጋላሳቱ አይሁዳቱ ባረንቱ ሞርከቱዋፐ ሸምፑዋ ደሜዳ ጋላሳቱዋ፤ ቃይ ሄ አግናይካ ኡንቱንቱ ካዩነ ዬኩ ናሸቻዉነ ባላ ሙሳዉ ላመቴዳ አግና። ሄዋ ድራዉ፥ ኡንቱንቱ ሙሳንነ ኡሻን ናሸቲደ፥ እቱ እቶ ቁማ ህዬሳቶ እሞታ እሚደ ቦንቻና ማላ፥ ኡንቱንቶ ኦደቴዳ።

23 አይሁዳቱ ማርዶክዮስ እሜዳ አዛዙዋ አኪደ፥ ኡንቱንቱ ቦንቻናዉ ዶሜዳ ባላ ላይን ላይን አገናን ቦንቻናዉ ማዬድኖ። 24 ጋሱነካ አጋጋ ዛሪ ሀማዳታ ናአይ ሃማን፥ አይሁዳቱ ኡባቱዋ ሞርኪ፥ ኡንቱንታ ይሳናዉ ካሰ ማቀቴዳ፤ ኡንቱንታ ዉርስ ዎያ አግናነ ጋላሳ ኤራናዉ ፑሪማ ግያ ሳማ የግሴዳ።✝9:24 አስ. 3:7 25 ሽን አስትራ ካትያኮ ገሌዳዋፐ ጉይያን፥ ሃማን አይሁዳቱ ቦላ ማቀቴዳ ኢታ ማቁ ኡባይ ጉየ ስሚደ፥ አ ቦላ ፖለታናዳን ካቲ ጻፉዋን አዛዜዳ። ያትና፥ ሃማንነ አ ናናይ ታሙ ኮጫን ካቀቴድኖ። 26 ሄዋ ድራዉ፥ ሀ ላኡ ጋላሳቱ ፑሪማ ጌተትያ ሳማ ባላ ጌተቲኖ። ሀ ዳብዳቢያን ኡንቱንቶ ጻፈቴዳዋ ኡባ ጋሱዋን፥ ኡንቱንቱ ባረንቱ አይፍያን በኤዳዋ ጋሱዋንነ ኡንቱንቱ ቦላን ጋኬዳዋ ጋሱዋን 27 አይሁዳቱ ባረንቶ፥ ባረንቱ ዛረቶነ አይሁዳ ግዳናዉ ኮይያ ኡባዉ፥ ሀ ባላ ቦንችያዋ ዎጋ ኦድኖ። ሄዌካ ላይን ላይን አገናን ሀ ላኡ ጋላሳቱዋ ቦንቻናሳ። 28 ቃይ፥ ሀ ካዉተ ጋድያን ኡባንነ ካታማቱዋን ኡባን ደእያ አይሁዳቱ ጎልያ አሳይ ኡባይነ ያና የለታ ኡባይ ሀ ፑሪማ ባላ ሀሳያናዉ በስያዌ ቃሸቴዳ። ሄዋ ቦላንካ፥ አይሁዳቱ አዉደ ግዶፐነ፥ ሀ ፑሪማ ጋላሳቱዋ ቦንቻናዉነ ሄ ጋላሳቱዋን ሀኔዳባይ ኡንቱንቱ ዛርያንካ ዶገተናን አጋናዉ በሰ።

29 ሄዋፐ ጉይያን፥ አብሀይላ ናታ፥ ካታታ አስትራነ አይሁዳይ ማርዶክዮስ ፑሪማ ባላ ጼልያዋን ካሰ ጻፌዳ ዳብዳቢያ ምንናዉ ሀዋ ላኤን ዳብዳቢያ ኩመን ማታን ጻፌድኖ። 30 ሄ ዳብዳበቱ አርጸክሲሳ ካዉተን፥ ጼታነ ላታማነ ላፑን ጋድያን ደእያ አይሁዳቶ ኡባዉ ሳሩነ ዎፓይ ግዶ ግያ ሳሮታና ጻፈቲደ ኪተቴድኖ። 31 ቃይ ኡንቱንቱ ካሰ ጾማናዉነ ካዮታናዉ ዎጋ ከሴዳዋዳን፥ ሀእ ኡንቱንታ ግድና፥ ስንፐ ይያ ኡንቱንቱ ዘረ ግድና፥ ሀ ፑሪማ ጋላሳቱዋ ላይን ላይን ዎጋ ኦደ ቦንቻና ማላ፥ ሄ ዳብዳበቱ ቆንጭሲኖ። ሄዌ አይሁዳይ ማርዶክዮስነ ካታታ አስትራነ ላኡ ከሴዳ አዛዙዋ። 32 ካታት አስትር አዛዙ ፑሪማ ባላ ዎጋ ምንሴዳ፤ እካ ማጻፋን ጻፈቴዳ።