1 ሄ ዎደ* ሮማ ካዉተ ጋርሳን ደእያ አሳይ ኡባይ ሱን ጻፈታናዳንነ ፓይደታናዳን አዉግስጾሰ ቄሳረፐ* አዛዙ ከሴዳ። 2 ሄዌኔካ፥ ቀረነዮሰ* ሶርያ ጋድያ ሞድያ ዎደ ሀኔዳ ኮይሮ አሳ ፓይዱዋ።

3 ሀዋ ድራዉ እት እት አሳይ ጻፈታናዉ ባረ ካታማ ባረ ካታማ ቤዳ። 4 ዮሴፎካ ዳዊታ ጎልያፐነ ያራፐ ግድያ ድራዉ ጋሊላ አዉራጃን ደእያ ናዝሬተ ካታማፐ ደንዲደ ዳዊታ ካታማ ግዴዳዉንኮ ይሁዳን ደእያ ቤተሌመ ጌተትያ ካታማ ከሴዳ። 5 ሄ ዎደ የልያ ዎዲ ማቴዳ አዉ ኦሸታ ኡቴዳ ማይራማካ አናና እትፐ ባዱ። 6 ኡንቱንቱ ሄዋን ደእሽን እዝዉ የልያ ዎዲ ጋኪ አጌዳ። 7 እዛካ ባይራ ናኣ* ግዴዳ አቱማ ናኣ የላዱ፤ እማይ ሸምፕያ ሳ ደማቤና ድራዉ፥ ናኣ ማዩዋን ጻጻደ ጋጳትያን* ቀራዱ።

8 ሄ ጋድያን ቃማ ባረንቱ ዉድያ ሄሚደ ደምባን አቅያዋንቱ ደኢኖ። 9 ጾሳ ኪታንቻይ ቆፐናን ዪደ ኡንቱንቱ ምይያን ኤቄዳ፤ ጎዳ ቦንቹ ኡንቱንቱ ዩሹዋን ፖኤዳ ዎደ፥ ዎልቃማ ያሻይ ኡንቱንታ ኦይቄዳ። 10 ኪታንቻይ ኡንቱንታ፥ "ያዮፕተ፥ አሳዉ ኡባዉ ሀንያ ዳሮ ናሸችያ ምሽራቹዋ ታን ህንተንቶ አሃድ። 11 ሀቼ ዳዊታ ካታማን አሽያዌ የለቴዳ። እካ ጎዳ ክርስቶሳ። 12 ሀዌ ህንተንቶ ማላ ግዶ: ጋጭኖ ናአይ ማዩዋን ጻጸቲደ ጋጳትያ ግዶን ግሴዳዋ ደማንታ" ያጌዳ።

13 ቆፐናን ጮራ ጾሳ ኪታንቻቱ ኮይሮ ኪታንቻና እትፐ ቆንጬድኖ።

14 ጾሳካ ጋላቲደ፥ ሀዋዳን ጌድኖ:

"ቦንቹ ጾሳዉ

ቦላ ሳሉዋን ግዶ።

ሳኣን እ ዶስያ አሳዉ

ሳሮተይ ግዶ"

ያጌድኖ።

15 ኪታንቻቱ ኡንቱንቱፐ ሻከቲደ ሳሉዋ ከሶዋፐ ጉየ፥ ዉድያ ሄምያዋንቱ፥ "ጎዳይ ኑዉ ቆንጭሴዳዋ፥ ሀዋ ሀኔዳ የዉዋ በአናዉ ቤተሌመ ቦይተ" ጌተቴድኖ።

16 ኡንቱንቱካ ኤሌሊደ ቤድኖ። ማይራሞነ ዮሴፎ ደሚደ፥ ጋጭኖ ናአይካ ጋጳትያን ግሴዳዋ በኤድኖ። 17 ሄዋፐ ጉይያን ጉ ናኣ ድራዉ ኦደቴዳዋ ቆንጭሲደ ኦዴድኖ። 18 ሀዋ ስሴዳ ኡባይ ኡንቱንቱ ኦዴዳ የዉዋን ማላለቴድኖ። 19 ማይራማ ቃይ ሀዋ ኡባ ባረ ዎዛናን ኦይቃደ ቆፓደ ጋምኣዱ። 20 ዉድያ ሄምያዋንቱካ ኡባ የዉ ኡንቱንቶ ኦደቴዳዋዳን ሀንና ደሞ ድራዉ፥ ስሴዳዎነ በኤዳዎ ኡባዉ ጾሳ ቦንቺድነ ጋላቲደ ስሜድኖ።

21 ናአዉ ሆስፑን ጋላሳ ግድና ቃጻረትያ ዎዲ ጋኮ ዎደ፥ እ አት ኡሉዋን አታናፐ ካሰ፥ ኪታንቻይ ከሶ ሱንን፥ የሱሳ ጌተቴዳ።✝

22 ሙሴ ዎጋ ማራዳን ጌይያ ዎዲ* ፖለቴዳ ዎደ ዮሴፎነ ማይራማ ጋጭኖ ናኣ ጾሳዉ ሼናዉ የሩሳላመ አክ ቤድኖ። 23 ሄዌኔካ ጎዳ ዎጋን፥ "አቱማ ናኣ ግዴዳ ባይራ ናአይ* ኡባይ ጾሳዉ ዱማቴዳዋ ግዳናዋ" ጌተት ጻፈቴዳዋዳንነ፥✝ 24 ቃይካ ጎዳ ዎጋን፥ "ላኡ ዶጎማቱዋ ዎይ ላኡ ሀራጰ ማራቱዋ" ጌተቶዋዳን፥ ጎዳዉ ያርሹዋ ያርሻናዉ አፌድኖ።

25 ሄ ዎደ ጽሎነ ገንጫ ግዴዳ ስሞና ጌተትያ እት ብታኒ የሩሳላመን ደኤ። እካ፥ እስራኤልያ አሳዉ አቶተ ህዶታ ናግያዋነ አያና ጌሻይ አ ቦላን ሸምፔዳ አሳ። 26 ጎዳን ኦከቴዳ ክርስቶሳ በኤናን ሀይቀናዋ አያና ጌሻን አዉ ቆንጭሴዳ።

27 እካ ሄ ዎደ አያና ጌሻይ ካለና፥ ጌሻ ጎልያ ገሌዳ። ናኣ የላዋንቱ ኤርያ ዎጋ ማራዳን፥ ኮሽያዋ አዉ ፖላናዉ ጉ ናኣ የሱሳ ኦይቂደ ገሎ ዎደ፥

28 ስሞነ ሞክ አክ ናኣ እድሚደ ጾሳ ጋላቲደ ሀዋ ያጌዳ:

29 "ጎዳዉ፥ ኔን ቃላ ገሎ ማራዳን፥

ሀእ ታና ነ አይልያ ሳሩዋን ኔኮ አፋ።

30,31 ጋሱካ፥ ታ አይፋቱ፥

አሳ ኡባ ስንን ኔን ጊግሴዳ፥

አሽያ ህዶታ በኤድኖ።

32 ሄዌካ እስራኤልያ ግደና አሳዉ፥

ቆንጨ እምያ ፖኡዋ።

ቃይ ነ አሳዉ እስራኤለዉ ቦንቹዋ።"

33 ዮሴፎነ አ ዳያ አ ድራዉ ሃሳየቴዳ የዎ ማላለቴድኖ። 34 ስሞንካ አንጂደ ማይራሞ፥ "ሀዌ ናአይ እስራኤልያን ጮራቶ ደንዱዋስነ ኩንደዉ ጋሶ ግዳናዉ፥ ቃይካ ኢታ ሃሳይያዋንቶ ማላ ግዳናዉ ዶረቴዳ። 35 ጮራቶካ ዎዛና ቆፋይ ቆንጮዋ ግዳናዉ፥ ነ ሸምፑካ ማሻን ቃንጾዋዳን ሴለታናዋ" ያጌዳ።

36 ቃይካ አሴራ ያራፐ ግዴዳ ፓኑኤላ ናታ ሃኖ ጌተትያ ናባታ ደአዉ፤ እዛካ ሎይ ጭማዱ። ባረ ዎዶሮተን ገሌዳ አስናና ላፑ ላይ ደኤዳዉኖ። 37 እዝ ላይይካ ሆስፑን ታማነ ኦይዱዋ ግዳና ጋካናዉ ጋላሳነ ቃማ ጌሻ ጎልያፐ ሻከተናን ጾማንነ ዎሳን ኪተታደ አምኤ* ግዳደ ጋምኣዱ።

38 ሄ ዎደካ ሺቃደ ጾሳ ጋላታዱ፤ ቃይካ የሩሳላመ አሳይ ዎዘታናዉ ናግያዋንቶ ኡባቶ ጋጭኖ ናኣ የሱሳባ ኦዳዱ።

39 ዮሴፎነ ማይራማ ጎዳ ህግያን አዛዘቴዳዋ ኡባ ፖሎዋፐ ጉየ ጋሊላ አዉራጃን ደእያ ባረንቱ ካታማ ናዝሬተ ስሜድኖ።✝ 40 ጉ ናአይካ ድጪደነ ምኒደ ቤዳ፤ አ ኤራንካ ኩሜዳ፤ ጾሳ አ ኬካተይ አ ቦላን ሸምፔዳ።

41 ዮሴፎነ ማይራማ ላይን ላይን ፓስጋ ባላ ቦንቻናዉ የሩሳላመ ካታማ ቢኖ።✝ 42 ናአዉካ ታማነ ላኡ ላይ ግዶ ዎደ ዶያዳን ባላዉ ህን የሩሳላመ ከሴድኖ። 43 ባላ ፖሎዋፐ ካላ ባረንቱ ጎለ ኡንቱንቱ ስሞደ ጉ ናኣ የሱስ ዮሴፎነ ማይራማ ኤረናን የሩሳላመን አት አጌዳ። 44 ኡንቱንቱና እትፐ ደእያዋ ማላትና እት ጋላሳ ኦግያ ሀመቴድኖ። ጉየፐ ቃይካ ባረንቱ ዳባቱዋናነ ባረንቱ ሲቀትያዋንቱ ማታን ኮሻ ዶሜድኖ።

45 ዮ ዎደ ኮዪደ ህን የሩሳላመ ስሜድኖ። 46 ሄዙ ጋላሳፐ ጉየ፥ ታማርስያዋንቱ ግዶን የሱስ ኡቲደ ኡንቱንቱ ግያዋ ስሲደነ ኡንቱንታ ኦቺደ ጌሻ ጎልያ ጋርሳን ደእያዋ በኤድኖ። 47 ስስያዋንቱ ኡባቱካ፥ አ አኬካንነ አ ዛሩዋን ማላለቴድኖ።

48 ዮሴፎነ አ ዳያ አ በኦ ዎደ ማላለቴድኖ። አ ዳያካ፥ "ታ ናአዉ፥ አያዉ ኑና ሀዋዳን ኦይ? ነ አቡነ ታነ ኔና ኮዪደ፥ ዳሮ መቶቴዶ" ያጋዱ።

49 የሱስካ ኡንቱንቶ፥ "አያዉ ታና ኮዪቴ? ታ አቡ ጎለን* ደአናዉ ታዉ ኮሽያዋ ኤርበይክቴ?" ያግ ዛሬዳ። 50 ሄዋ ያግ ኦዶፐ አትን፥ ኡንቱንቶ እ ኦዴዳ የዉ አያ ግንቶ ገልቤና።

51 ሄዋፐ ስሚደ፥ ኡንቱንቱና እትፐ ህን ናዝሬተ ቤዳ፤ ሄዋንካ ኡንቱንቶ አዛዘቴ። አ ዳያካ ሄዋ ኡባ ባረ ዎዛናን ዎዱ። 52 የሱስካ ኤራንነ ጌሳን፥ ሳባንካ ጾሳነ አሳ ስንን ድጬዳ።✝