1 ሄዋፐ ጉይያን፥ ሳሉዋን ዎልቃማ ማላይ ቤቴዳ። አዋ ማዬዳ እት ምሽራታ፥ አገና ቦላ ኤቄዳዉና፥ ታማነ ላኡ ጾልንትያ ካላቻ ባረ ሁጲያን ዎዳዉና ሄዋን ደአዉ። 2 ሄ ምሽራታ ሻሃራ፤ እዞ የሉዋ ኦይይ፥ ኡንኤና ዋሳዱ።

3 ሀራ እት ዎልቃማ ማላይ ሳሉዋን ቤቴዳ። ታሙ ካጭያና ደእያ ላፑ ሁጲያን ካላቻ ዎዳ እት ዎልቃማ ዞኦ ዳዊ ደኤ።✝ 4 ሄ ዳዊ ባረ ዱፍያን ሄዘን ኩሸ ጾልንትያ ሳሉዋፐ ዳፊደ፥ ሳኣን ኦሌዳ። ሄ ዳዊ የለት ዎሳናካ ናኣ ማናዉ የላና ሀንያ ምሽራት ስንን ኤቄዳ።✝

5 ምሽራታ አቱማ ናኣ፥ አይሁዳ ግደና አሳ ኡባ ብራታ ጻምኣን ሞዳናዋ የላዱ። ሽን ናአይ ጾሳኮነ አ አራታኮ፥ ፑደ ኤለካ አከቴዳ።✝ 6 ምሽራታ እት ሻአነ ላኡ ጼታነ ኡሱፑን ታሙ ጋላሳዉ ምዚደነ ኡሺደ ዎናዉ ጾሳይ ጊግስ ዎዳ ሳኣ ባዙዋ ባቃታዱ።

7 ሄዋፐ ጉይያን፥ ሳሉዋን ኦላይ ደንዴዳ። ምካኤል ባረ ኪታንቻቱዋና እትፐ ዳዊያ ኦለቴዳ፤ ዳዊካ ባረ ኪታንቻቱዋና ግዲደ፥ ዛር ኦለቴዳ።✝ 8 ሽን ዳዊ ጾነትና ዳዊያስነ አ ኪታንቻቶ ሳሉዋን ሳአይ ዬዳ። 9 ዎልቃማ ዳዊ፥ ጻላህያ ካፑዋ ዎይ ሴጻና ግያዌ፥ በን ሾሻይ፥ አላምያ ኡባ ባለያዌ ኦለቴዳ፤ እ ባረ ኪታንቻቱዋና እትፐ ዱገ ሳአዉ ኦለቴዳ።

10 ሄዋፐ ጉይያን፥ ታን ሳሉዋፐ ሀዋዳን ያግያ ኮሻ ስሳድ፤

"ጾሳ አቶተይ ሀእ ዬዳ።

ጾሳይ ባረዉ ካተ ግድያዋዳንካ፥

ባረ ዎልቃ በሴዳ፤

አ ክርስቶስ ባረ ማታ በሴዳ።

አያዉ ጎፐ፥

ቃማነ ጋላስ ጾሳ ስንን ኤቂደ፥

ኑ እሻቱዋ ሞትያዌ፥

ሳሉዋፐ ዱገ ኦለቴዳ።✝

11 ኑ እሻቱ ዶርሳ ሱንነ፥

ባረንቱ ቱሙ ማርካተን

ዳዊያ ኦለቲደ ጾኔድኖ።

ቃይ ኡንቱንቱ ባረንቱ ሸምፑዋ አ እምያዎ፥

ቃረትበይክኖ።

12 ሄዋ ድራዉ፥

ሳሉነ ሳሉዋ ግዶን ደእያዋንቱ፥

ናሸትተ።

ሽን ሳአዉነ አባዉ አዬሮ!

አያዉ ጎፐ፥

ጻላህያ ካፑ፥

ባረዉ ጉ ዎዲ አቴዳዋ ኤርያ ድራዉ፥

ዎልቃማ ሀንቁዋን፥

ዱገ ህንተንቱኮ ዎዳ"

ያጌዳ።

13 ቃይ ዳዊ ባረና ዱገ ሳኣ ኦሌዳዋ በኤዳዋፐ ጉይያን፥ ሄ አቱማ ናኣ የሌዳ ምሽራቶ የደርሱዋ ዶሜዳ። 14 ምሽራቶ ሾሻይ ቆሄና ማላ፥ ሄዙ ላይነ ባጋ ማደነ ኡሻደ እዛ ናገትያሳ ባዙዋ ፓላደ ባና ማላ፥ ላኡ ዎልቃማ አርጋን ቀፊ እዝዉ እመቴዳ።✝

15 ሄዋፐ ጉይያን፥ ምሽራቶ ድኡ ድኢደ አፋና ማላ፥ ሾሻይ ሻፋ ሃ ኬና ሃ ባረ ዶናፐ ምሽራት ጌዱዋን ጉሴዳ። 16 ሽን ቢታይ ምሽራቶ ማዴዳ፤ ቢታይ ባረ ዶና ዶዪደ፥ ዳዊያ ዶናፐ ከሴዳ ሃ ምት አጌዳ። 17 ዳዊ ምሽራትዉ ዳርስ ሀንቀቲደ፥ እዝ ዘረ ጾሳ አዛዙዋ ናግያ ኡባቱዋነ የሱስ ቆንጭሴዳ ቱሙ አማነትያዋንታ ኦላናዉ፥ 18 ቢደ አባ ዶናን ደእያ ሻፍያን ኤቄዳ።