ዮሃንሳ ሳፃ 8

ጻጸ ማጻፋ ላፑን ማታፋይ ዶየቴዳ

1 ዶርሳይ ላፑን ማታፋ ዶዬዳ ዎደ፥ ባካ ሳትያ ግድያዋ ኬና ሳሉ ጮኡ ጌዳ።

2 ሄዋፐ ጉይያን፥ ታን ላፑ ኪታንቻቱዋ ጾሳ ስንን ኤቂያዋንታ በኣድ፤ ኡንቱንቶ ላፑ ማላካታይ እመቴዳ።

3 እጻና ጩዋይያ ዎርቃ ሚሻ ኦይቄዳ ሀራ ኪታንቻይ ዪደ፥ ያርሽያ ሳ ማታን ኤቄዳ። ዎርቃፐ መቴዳ ያርሽያሳይ ካዉተ ኦይድያ ስንን ደኤ፤ ሄ ያርሽያ ሳ ቦላ ጌሻ ኡባቱዋ ዎሳ ጉጃና ማላ፥ ኪታንቻዉ ዳሮ እጻናይ እመቴዳ።✝8:3 አሞጻ 9:1፤ ከሳ 30:1፣ 3 4 እጻና ጩዋይ ጌሻቱዋ ዎሳና እትፐ ሄ ኪታንቻ ኩሽያፐ ፑደ ጾሳኮ ቤዳ። 5 ሄዋፐ ጉይያን፥ ኪታንቻይ እጻና ጩዋይያዋ አኪደ፥ ያርሽያ ሳፐ ታማ ቦንቁዋ አኪደ፥ አን ኩንዳ። ሄ እጻና ጩዋይያዋ ዱገ ሳኣ ኦልና፥ ጉጉንይ ጉሜዳ። ዋልቃንይ ዎልቃሜዳ፤ ቃይ ቢታይካ ቃጼዳ።✝8:5 ሳፃ 11:19፤ 16:18፤ ዎጋ 16:12፣ 18፤ ህዝ. 10:2፤ ከሳ 19:16

ማላካታቱ ፑነቴድኖ

6 ቃይ ላፑ ማላካታ ኦይቂደ ላፑ ኪታንቻቱ ማላካታ ፑናናዉ ጊጌድኖ።

7 ኮይሮ ኪታንቻይ ባረ ማላካታ ፑንና ሱና ዋላከቴዳ ሻቻይነ ታማይ ሳኣን ቡኬዳ። ሳኣፐ ሄዘን ኩሺ ጉደቴዳ፤ ምፐካ ሄዘን ኩሺ ጉደቴዳ፤ ማታ ኡባይካ ጉደቴዳ።✝8:7 ከሳ 9:23-25፤ ህዝ. 38:22

8 ላኤን ኪታንቻይካ ባረ ማላካታ ፑኔዳ። ዎልቃማ ደርያ ማላትያባይ ታማን ኤጺደ፥ አባን የገቴዳ፤ ያትና፥ አባፐ ሄዘን ኩሺ ሱ ግዴዳ። 9 አባን ደኡዋን ደእያ መታቱዋ ሄዘን ኩሺ ሀይቄዳ፤ ማርካበቱዋፐካ ሄዘን ኩሺ ዬዳ።

10 ሄዘን ኪታንቻይ ባረ ማላካታ ፑንና ሻፋፐነ ፑልቱዋ ሃፐ ሄዘን ኩሽያ ቦላ ሳሉዋፐ ጾምፕያዳን ኤጽያ ዎልቃማ ጾልንቲ ዎዳ።✝8:10 ኢሳ. 14:12 11 ሄ ጾልንትያ ሱንይ ጫሙዋ ጌተቴ። ሃፐ ሄዘን ኩሺ ጫሜዳ፤ ቃይ ሃይ ጫሜዳ ድራዉ፥ ዳሮ አሳይ ሄ ሃ ኡሺደ ሀይቄዳ።✝8:11 ኤር. 9:15

12 ኦይደን ኪታንቻይ ባረ ማላካታ ፑኔዳ። አዋፐ፥ አገናፐነ ጾልንትያፐ ሄዘን ኩሺ ደሸቴዳ፤ ኡንቱንቱ ፖኡዋፐካ ሄዘን ኩሺ ሜዳ። ሄዋ ድራዉ፥ ጋላሳፐ ሄዘን ኩሺ፥ ቃማፐካ ሄዘን ኩሺ ሜዳ።✝8:12 ኢሳ. 13:10፤ ህዝ. 32:7፤ ኢዩ. 2:10፣ 31፤ 3:15

13 እት አርጋንይ ሳሉዋን ፓልያዋ ታን በኣድ። ሄ አርጋንይ ባረ ቃላ ቁ ኦደ፥ "ሄዙ ኪታንቻቱ ፑናና በስያ የኮ ማላካታይ ፑነትያ ዎደ፥ ሳኣን ደእያ አሳዉ አዬሮ! አዬሮ! አዬሮ!" ያግያዋ ስሳድ።