ዮሃንሳ ሳፃ 17

ባብሎነ ቦላ ያና ሙራ

1 ሄዋፐ ጉይያን፥ ላፑ ከረቱ ደእያ ላፑ ኪታንቻቱዋፐ እቱ ታኮ ዪደ፥ ታና ሀዋዳን ያጌዳ፤ "ሃያ፤ ዳሮ ሻፋቱዋ ጋጻን ደእያ ዎሹምያ፥ ዎልቃማ ካታማታ፥ ዋና ሙረታነንቶ፥ ታን ኔና በሳና። 2 ሳኣን ደእያ ካታቱ እዝና ዎሹሜድኖ፤ ሳኣን ደእያ አሳይካ እዝ ዎይንያ ኤሳ ኡሽ ማቲደ እዝና ዎሹሜዳ" ያጌዳ።✝17:2 ኢሳ. 23:17፤ ኤር. 51:7

3 ሄ ኪታንቻይ ታና አያናን ባዙዋ አፌዳ። ሄዋን ታን እት ምሽራቶ ቦርያ ሱንይ ቦላ ኡባን ጻፈት ኡቴዳ ዞኦ ዶኣ ቶጌዳዉኖ በኣድ፤ ሄ ዶአዉ ላፑ ሁጲያን ታሙ ካጪ ደኤ። 4 ሄ ምሽራታ ቴራ ኦቻ ማላትያ ማዩዋነ ዞኦ ማዩዋ ማያዱ፤ እዛ ቃይ ዎርቃን፥ ቦንቾ ሹቻንነ እንቁዋ ጌተትያ አልኦ ሹቻን አሌቃዱ። እዛ ዎሹምያ ቱናባይነ ሸነይያባይ ኩሜዳ ዎርቃ ቡርጩኩዋ ባረ ኩሽያን ኦይቃዱ።✝17:4 ኤር. 51:7 5 እዝ ዴሙዋን ጹራ የዉዋ ብለይ ደእያ ሱንይ፥

"ዎልቃማ ባብሎኖ፤

ሳኣን ደእያ

ዎሹምያዋንቶነ

ሳኣን ደእያ

ሸነይያባዉ አቶ"

ያግያዌ ጻፈት ኡቴዳ።

6 ቃይ ሄ ምሽራታ ጌሻቱዋ ሱነ የሱሳዉ ማርካትሽን ዎዳዋንቱ ሱ ኡሻደ ማቴዳዉኖ ታን በኣደ ማላለታድ።

7 ኪታንቻይ ታና፥ "ኔን አያዉ ሀዋዳን ማላለታዲ? ታን ነዉ ምሽራት ጹራ የዉዋነ እዛ ቶኬዳ ላፑ ሁጲያን ታሙ ካጪ ደእያ ዱኣ ጹራ የዉዋ ኦዳና። 8 ኔን በኤዳ ዶአይ ካሰ ደኤ፤ ሽን ሀእ ባዋ። ሄ ዶአይ ጪሞ ኦላፐ ኤለ ከሲደ፥ ባሻዉ ባናዋ። አላሚ መቶደፐ ዶሚደ፥ ደኡዋ ማጻፋን ኡንቱንቱ ሱንይ ጻፈትቤና ሳኣን ደእያ አሳይ ዶኣ በኢደ ማላለታና። አያዉ ጎፐ፥ እ ካሰ ደኤ፤ ሀእ ባዋ፤ ሽን ስንፐ ያናዋ።✝17:8 ዳኔላ 7:7፤ ሳፃ 11:7፤ ማዝ. 69:28

9 "ሀዌ አዳ ኤራተነ አኬካ ኮዬ። ላፑ ሁጲ ምሽራታ ኡትያ ላፑ ደረቱዋ፤ ሄዋንቱ ቃይ ላፑ ካታቱዋ። 10 ኡንቱንቱፐ እቼሹ ካታቱ ኩንዴድኖ። እቱ ሀእ ጋካናስካ ሞዴ፤ የኮ ካቲ ይቤና። እ ዪደ፥ ጉ ዎድያ ታካናዉ በሴ። 11 ካሰ ደኤዳ ዶአይ፥ ሀእ ባይናዌ፥ እ ባረ ሁጰዉ ሆስፑን ዱኣ። እ ላፑ ዶአቱዋፐ እቱዋ፤ እ ያናዉ ቤ።

12 "ኔን በኤዳ ታሙ ካጨቱ ሞዳናዉ ዶምቤና ታሙ ካተቱዋ። ሽን ኡንቱንቱ ዶኣና እትፐ እት ሳተዉ ካተቱዋዳን ሞዳናዉ ኡንቱንቶ ማታይ እመታና።✝17:12 ዳኔላ 7:24 13 ኡንቱንቶ ኡባዉ እት ቆፋይ ደኤ፤ ኡንቱንቱ ባረንቱ ዎልቃነ ባረንቱ ማታ ዶአዉ እማና። 14 ኡንቱንቱ ዶርሳና ኦለታና፤ ሽን ዶርሳይነ ዶርሳና ደእያዋንቱ፥ እ ጼጌዳዋንቱነ ዶሬዳዋንቱ፥ አ ካልያ አማነቴዳዋንቱ፥ ሄ ካተቱዋ ጾናና፤ አያዉ ጎፐ፥ እ ጎዳቱዋ ጎዳነ ካተቱዋ ካትያ" ያጌዳ።

15 ኪታንቻይ ቃይካ ታና ሀዋዳን ያጌዳ፤ "ጫራታ ኡቴዳ ሄ ኔን በኤዳ ሃይ ያራቱዋ፥ ጮራ አሳ፥ አሳ ዛራቱዋነ ዱማ ዱማ ቢታ ቃላ። 16 ቃይ ኔን በኤዳ ታሙ ካጪነ ዶአይ ዎሹመዉኖ እጻናዋንታ። ኡንቱንቱ እዝዉ ደእያ ኡባባ አክ ድጋና። ቃይ እዞ ካሎ አሻናነ እዝ አሹዋ ም ድጋና፤ ያቲደ ኡንቱንቱ እዞ ታማን ጉዳና። 17 አያዉ ጎፐ፥ ጾሳ ቃላይ ቱማታና ጋካናዉ፥ ኡንቱንቱ ቆፋይ እቱዋ ግዳናዳን፥ ኡንቱንቱ ባረንቱ ሞድያ ዎልቃ ዶአዉ እማናዳንነ ጾሳይ ቆፔዳዋ ኡንቱንቱ ኦናዳን፥ ኡንቱንቱ ዎዛናን ጾሳይ አሙዋ ዎዳ።

18 "ሄ ኔን በኤዳ ምሽራታ ሳኣ ካተቱዋ ሞድያ ዎልቃማ ካታማቶ" ያጌዳ።