Miquéias 5

1 ህንተኖ፥ የሩሳላመ አሳቶ፥ ህንተ ኦላንቻቱዋ ሺሽተ! አያዉ ጎፐ፥ ኑን ሞርከቱዋን ዳደቴዳ፤ ኡንቱንቱካ እስራኤልያ ካለያዋ ጋፓታ ጋትማን ሾጫናዉ ሀኒኖ።

ቤተሌመፐ ካለያዌ ከሳናዌ ትምቢትያን ኦደቴዳ

2 መና ጎዳይ ሀዋዳን ያጌ፤ "ኔኖ ኤፍራታ፥ ቤተሌመ ካታማዉ፥ ኔን ይሁዳ ካታማቱዋ ግዶን ጉ፤ ሽን አዉ ደንዱ በንፐ ዶሚደ፥ መናፐ ግዴዳዌ፥ እስራኤልያ አሳ ሞድያዌ ታዉ ኔፐ ከሳና" ያጌ።✝5:2 ማቶሳ 2:6፤ ዮሃ. 7:42

3 ሄዋ ድራዉ፥ የሉዋ ኦይቀትያ ምሽራታ ሄ ናኣ የላና ጋካናዉ፥ መና ጎዳይ እስራኤልያ አሳ ሞርከቱዋ ኩሽያን አደ እማና። ሄዋፐ ጉይያን፥ ኦሞዱዋን ደእያ አ እሻቱ ስሚደ፥ ባረንቱ አሳና ዋላከታና። 4 እ ያና፤ መና ጎዳ ምኖተን፥ መና ጎዳ ባረ ጾሳ ሱን ግታተን ባረ አሳ ሄማና። እ ሳኣ ጋጻ ጋካናዉ ዎልቃማ ግድያ ድራዉ፥ ኡንቱንቱ ሳሮተን ደአና። 5 እ ኡንቱንቶ ሳሮተ ግዳናዋ።

መና ጎዳይ እስራኤልያ አሳ አሻናነ ኡንቱንቱ ሞርከቱዋካ ይሳና

አሶረ ጋድያ አሳቱ ኑ ጋድያ ዎራጅያ ዎደነ ኑ ጌሱዋካ የደርሲደ ገልያ ዎደ፥ ኑን አሳ ሄማናዉነ ካለናዉ ግድያነ ግዲደ ፓላህያ አሳ ደንደ፥ ኡንቱንቱና ኦላ ጋከታና። 6 ኡንቱንቱ አሶረ ጋድያ ኦላን ጾናና፤ ቃይ ሄ ጋድያን ደእያ ናምሩድ ኬጼዳ ጋድያ ሞዳና። አሶረ ጋድያ አሳቱ ኑ ጋድያ ዎራጅያ ዎደነ ኑ ዛዋካ የያ ዎደ፥ ኑ ጋድያ ሞድያዌ ኑና ኡንቱንቱፐ አሻና።✝5:6 ዶመ 10:8-11

7 ያቆባ ዛራቱ አትያዋንቱ ዳሮ ጋደ አሳ ግዶን መና ጎዳይ ኪቴዳ ጮኩዋ ማላነ ማታ ቦላን ዎያ ፑስያ ማላ ግዳናዋ። ጮኩነ ፑስ ያናዉ አሳ አዛዙዋ ናገናዋዳን፥ እስራኤልያ አሳይካ መና ጎዳፐ አትና፥ አሳ ናገና። 8 ያቆባ ዛራቱ አትያዋንቱ ካዉተቱዋ ግዶን፥ ዳሮ አሳ ግዶን፥ ባዙዋ ዶአቱዋ ግዶን ደእያ ጋሙዋ ማላነ ዶርሳ ዉድያ ግዶን ደእያ ዎዳላ ጋሙዋ ማላ ግዳናዋ። እ ሄዋና ካንያ ዎደ የረረቴነ መንሬ፤ ኦንነ አሻናዉ ዳንዳየና። 9 ነ ኩሺ ኔናና ኤቀትያዋንቱ ቦላ ደንዳና፤ ነ ሞርከቱ ኡባይካ ያና።

10 መና ጎዳይ ሀዋዳን ያጌ፤ "ሄ ጋላስ ታን ነ ፓራቱዋ ነ ግዶፐ ይሳና፤ ነ ፓራ ጋረቱዋካ መንሬና። 11 ታን ነ ጋድያ ካታማቱዋ ይሳና፤ ነ ጌሱዋካ ኡባ ላላና። 12 ቃይ ነ ካዩዋ ታን ይሳና፤ ሙሩንያዋንቱካ ሀዋፐ ስንናዉ ነ ግዶን ደእክኖ። 13 ታን ነ ኤቃ ምስለቱዋነ ነ ጎይናናዉ ኤሴዳ ሹቻቱዋ ነ ግዶፐ ይሳና፤ ሀዋፐ ስንናዉ ኔን ነ ኩሽያን መዳባዉ ጎይናካ። 14 ታን አሼሮ ግያ ጾሳት ምስልያ ነ ግዶፐ ቆላና፤ ነ ካታማቱዋካ ይሳና። 15 ታዉ አዛዘትቤና ካዉተቱዋ ቦላ ይሉዋንነ ሀንቁዋን ታን ሀሉዋ ከሳና" ያጌ።