ጾሳይ ባረ አሳዉ ደእያ ሲቁዋ
(11:1-11)
1 "እስራኤሊ ናአተን ደእያ ዎደ፥ ታን አ ሲቃድ፤ ታን ታ ናኣ ግብጼ ጋድያፐ ጼሳድ። 2 ታን ኡንቱንታ ዳርሳደ ጼስና፥ ኡንቱንቱ ታፐ ዳሮ ሃኪደ ቤድኖ። ባኣላ ጌተትያ ኤቃቶ ያርሹዋ ያርሼድኖ፤ ቃይ ኤቃ ምስለቶ እጻና ጩዋዬድኖ። 3 ኤፍሬማ አሳ ሀራቅያ ኦይቃደ ሀመ ታማርሴዳዌ ታና፤ ሽን ኡንቱንቱ ፓዳዌ ታና ግድያዋ ኡንቱንቱ ኤርክኖ። 4 ታን ኡንቱንቱ ቃረታንነ ሲቁዋ ዎዶሩዋን ጎቻድ፤ ኡንቱንቱ ሞርግያፐ ሞርገ ም ደንድ፤ ሆካደ ኡንቱንታ ሙዛድ።
5 "ኡንቱንቱ ታኮ ስመናን እጼዳ ድራዉ፥ ግብጼ ቢታ ስማና፤ ቃይ አሶረ ቢታ ካቲ ኡንቱንቱ ቦላ ካተታና። 6 ኡንቱንቱ ሞርክያ ማሻይ ኡንቱንቱ ካታማቱዋ ኦላና። ኡንቱንቱ ካታማቱዋ ፐንገቱዋካ መንሬና፤ ኡንቱንቱ ዞረታይካ ላለታና። 7 ታ አሳይ ታፐ ሃኪደ ባናዉ ቆፋ ቃቼዳ። ሁቁና ሞርገ ም ጋሱዋን ኡንቱንቱ ዋሳና፤ ሽን ኦንነ ሄ ሞርገ ም ኡንቱንቱ ሞርግያፐ ደንና።
8 "ኤፍሬማ፥ ታን ኔና ዋታደ አጎ? እስራኤልያዉ፥ ታን ኔና ዋታደ አ እሞ?11:8 ዛረ. 29:23 ታን ኔና ዋታደ አዳማ ግያ ካታማዳን ኦ? ታን ኔና ዋታደ ጻቦይማ ግያ ካታማዳን ኦ? ታን ኔና ሎይ ሲቅያ ድራዉ፥ ታ ዎዛናይ ሄዋ ኤኖ ጌና። 9 ታን ታ ሱልያ ሀንቁዋን ኡንቱንታ አይነ ኦከ፤ ቃይ ኤፍሬማ ላኤንዋ ይስከ። አያዉ ጎፐ፥ ታን ጾሳፐ አትና፥ አሳ ግድከ። ታን ጌሻ ጾሳይ ህንተ ግዶን ደአይ፤ ህንተኮ ሱሎ ሀንቁዋን ዪከ።
10 "ኡንቱንቱ መና ጎዳ ካላና፤ እካ ጋሙዋዳን ጉዳና። እ ጉድያ ዎደ፥ አ ናናይ አዋይ ዉልያ ባጋፐ ያና፤ 11 ግብጼ ጋድያፐ ካፎቱዋዳን፥ አሶረ ቢታፐካ ሀራጰቱዋዳን፥ ፓሊደ ያና። ታን ኡንቱንታ ኡንቱንቱ ጎልያን ጎልያን ዎና። ታን መና ጎዳይ ሀዋ ኦዳድ" ያጌ።
ጾሳይ ባረ አሳ ቦላ አዳ ፕርዳ
(11:12—13:16)
12 ኤፍሬማ አሳይ ዎርዱዋን፥ እስራኤልያ አሳይካ ጭሙዋን ታና ዶዴድኖ። ይሁዳ አሳይካ አማንያ ጌሻ ጾሳ ቦላ ጻልታሜዳ።