Provérbios 11

1 መና ጎዳይ ዎርዱዋ ሚዛናን ልክያዋንታ እጼ፤ ሽን ልከ ሚዛናን ልክያዋንቱን ናሸቴ።

2 ኦቶሩ ይያ ዎደ ካዉሻተይ ዬ፤ ሽን አሽከተና አዳ ኤራተይ ዬ።

3 ጽሎቱዋ ኡንቱንቱ ሱረተይ ካለ፤ ሽን አማነተናዋንታ ኡንቱንቱ ጌላተይ ይሴ።

4 ሀንቁዋ ጋላስ ዱረተይ ጎኤና፤ ሽን ጽሎተይ ሀይቁዋፐ አሼ።

5 ቦሪ ባይና ኡራ ኦግያ አ ጽሎተይ ሱርሴ፤ ሽን ኢታ ኡራይ ባረ ኢታተን ኩንዴ።

6 ሱረቱዋ ኡንቱንቱ ጽሎተይ አሼ፤ ሽን አማነተናዋንታ ኡንቱንቱ አሙ ጲረ ግዲደ ኦይቃና።

7 ኢታ አሳይ ሀይቂያ ዎደ፥ እ ናግያ ህዶታይካ አናና እትፐ ሀይቄ፤ እ ባረ ዎልቃን ጬቀትያዌ ኡባይካ ዬ።

8 ጽሉ መቱዋፐ አቴ፤ አ ድራዉ ኢታ ቦላ መቱ ዬ።

9 ጾሳ ኤረና ብታኒ ባረ ዶናን አሳ ይሴ፤ ሽን ጽሎቱ ኤራን አቲኖ።

10 ጽሎቱ ቦንቼትያ ዎደ፥ ካታማይ ናሸቴ፤ ቃይ ኢታቱ ሀይቂያ ዎደ፥ ሀሹ ጌ።

11 ጽሎቱዋ አንጁዋ ጋሱዋን ካታማይ ድጬ፤ ሽን ኢታ ኡራ ሃሳያይ ካታማ ይሴ።

12 ባረ ሾሩዋ ካያ ኡራዉ ዎዛናይ ባዋ፤ ሽን አኬካንቻ ኡራይ ጮኡ ጌ።

13 ዝግርያ አሳይ ጹራ ላሌ፤ ሽን አማነትያ አሳይ ጹራ ገን።

14 ካለያዌ ዮፐ፥ ካዉተይ ኩንዴ፤ ሽን ዳሮ ዞርያዋንቱ ደኦፐ፥ ሳሩ ደኤ።

15 ኤረና ኡራዉ ዋሰ ግድያ አሳይ ቱሙዋፐ መቶታና፤ ሄዋፐ ዋሰ ግደናን እጽያዌ ሎአ።

16 ኡሉ ኬካ ምሽራታ ቦንቼታዉ፤ ሽን መቀ ኢታ አሳይ ዱረተ ጻላላ ዱረቴ።

17 ኬካ አሳይ ባረዉ ሎኦባ ኦ፤ ሽን መቀ ኢታ አሳይ ባረና ቆሄ።

18 ኢታ አሳይ ደምያ ሚሻይ ጭምያ ሚሻ፤ ሽን ጽሎተ ዘርያ ኡራይ ቱሙ ዎይቱዋ ጫካና።

19 ጽሎተን ምኒደ ደእያ ኡራይ ፓጻ ደአና፤ ሽን ኢታተ ካልያ ኡራይ ሀይቃና።

20 መና ጎዳይ ኢታ ቆፋይ ደእያ አሳቱዋ እጼ፤ ሽን ሱረ ሀመትያዋንቱን ናሸቴ።

21 ኢታ አሳይ ሙረተናን አተና፤ ሽን ጽሎቱ አታናዋንታ።

22 አዱሳ ቆፍ ባይና ፑላንቻ ማጫ ምሽራት ፑላይ ጉዱን ሲያን አዳ ዎርቃ አሌቁዋ ማላ።

23 ጽሎቱዋ አሙዋ ፖሉ ሎኦ ጻላላ፤ ሽን ኢታቱዋ አሙዋ ፖሉ ሀንቁዋ ጻላላ።

24 እት እት አሳቱ ባረንቱ ሚሻ አሳዉ ጮ ላሊኖ፤ ሽን ኡንቱንቱ አቁ ያ ዳሬ። ሀራ አሳቱ ቃይ ባረንቱ ሚሻዉ ሎይ ኡዘቲኖ፤ ሽን ኡንቱንቱ አቁ ሃ ፓጬ።

25 ኬካ አሳይ ዱረታና፤ ሀራቱዋ ማድያ አሳይ ማደታና።

26 ካይ አልእና ዛልአናዉ ምንጅያ ኡራ አሳይ ሸቄ። ሽን ባረ ካ አሳይ ኮይያ ዎደ ዝልእያ አሳ አንጄ።

27 ሎኦባ ምንሲደ ኮይያ ኡራይ ናሸቻ ደሜ፤ ሽን ኢታባ ኮይያ ኡራ ኢታባይ ደሜ።

28 ባረ ዱረተን አማነትያ አሳይ ኩንዳና፤ ሽን ጽሎቱ ባልጉዋ ምዳን ዳሻና።

29 ባረ ሶ አሳ ቦላ ጫቡዋ ደንያ ኡራይ ጎኤታናባይ አያይነ ባዋ። ቦዛቱካ አዳ ኤራንቻቶ ቆማ ግዳና።

30 ጽሎ አሳይ ደኡዋ አይፍያ አይፍያ ም ማላ፤ ሸምፑዋ አሽያዋንቱ አዳ ኤራንቻቱዋ።

31 ጽሎቱ ሳኣን ባረንቱ ኦሱዋ ጋትያ አክያዋ ግዶፐ፥ ኢታቱነ ናጋራንቻቱ ባረንቱ ኦሶ አካና ጋቲ ዋን ዳራንዴሻ!✝11:31 1 ጰጽ. 4:18