Provérbios 3

ጾሳን አማነትያዋ

1 ታ ናአዉ፥ ታን ኔና ታማርስያዋ ዶጎፓ፤ ታ አዛዞቱዋካ ነ ዎዛናን ዎ። 2 አያዉ ጎፐ፥ ኡንቱንቱ ነ ላይ አዱሳና፤ እሻሎ ደኡዋነ ሳሮተ ነዉ ጉጃና። 3 አገና ሲቁነ ቱማተይ ኔፐ ሃኮፕኖ፤ ኡንቱንታ ነ ቆያን ቃቻ፤ ነ ዎዛናንካ ኡንቱንታ ጻፋ። 4 ያቶፐ፥ ኔን ጾሳነ አሳ ስንን ሳበታናነ ናሸታና።✝3:4 ሉቃሳ 2:52

5 ነ ፖሎ ዎዛናን መና ጎዳ አማነታ፤ ነ አኬካን ዘምፖፓ። 6 ኔን ኦያ ኦሱዋ ኡባን አ ስንያ፤ እ ኔና ሱረ ኦግያ ካለና። 7 ኔና ነ ሁጲያን አዳ ኤራንቻ ከሶፓ፤ መና ጎዳዉ ያያ፤ ኢታፐካ ሃካ።✝3:7 ሮመ 12:16 8 ሄዌ ነ ቦላ ፓጻ ዎና፤ ነ መቀካ ምንሳና። 9 መና ጎዳ ነ ዱረተን ቦንቻ፤ ኮይሮ አይፌዳ ካ ኡባፐካ ጼራ አዉ እምያዋን አ ቦንቻ። 10 ያቶፐ፥ ነ ዬሰቱዋን ካይ ኩማና፤ ነ ባካ አይፈ ዎይንያ ኤሳይ ኩሚደ ፓላሀና።

11 ታ ናአዉ፥ መና ጎዳ ሴራ ካፓ፤ እ ኔና ሴርያ ዎደካ ላንጮፓ።✝3:11 ኢዮባ 5:11✝3:11-12 እብራ. 12:5-6 12 አያዉ ጎፐ፥ አዉ ባረ ሲቅያ ናኣ ሴርያዋዳን፥ መና ጎዳይ ባረ ዶስያ ኡራ ሴሬ።✝3:12 ሳፃ 3:19 13 አዳ ኤራተ ደምያ ኡራይ፥ አኬካካ ባረዋ ኦያ ኡራይ አንጀቴዳዋ። 14 አያዉ ጎፐ፥ አፐ ደምያ ጎአይ ዎርቃፐነ ብራፐ ደምያ ጎኣፐ አነ ኬኬ። 15 አዳ ኤራተይ እንቁዋፐ ሎይ አልኤ፤ ኔን ደማናዉ አሞትያ ኡባይ አዳ ኤራተና ልከተና። 16 አዳ ኤራተይ ነ ላይ አዱሴ፤ እ ነዉ ዱረተነ ቦንቹዋ ጉጄ። 17 አ ኦገቱ ናሸችያ ኦገቱዋ፤ አ ሎሱዋ ኡባይካ ሳሩዋ። 18 እ ባረና ኦይቂያዋንቶ ደኡዋ ም፤ አ ምንስ ኦይቂያ ኡባቱካ አንጀቴዳዋንታ።

19 መና ጎዳይ ባረ አዳ ኤራተን ሳኣ መዳ፤ ባረ አኬካንካ ሳሎቱዋ ምንሴዳ። 20 አ ኤራተን ሻፋቱ ጎጊኖ፤ ሻራቱዋፐካ እራይ ቡኬ።

21 ታ ናአዉ፥ ሎኦ አዳ ኤራተነ አዱስ ቆፕያዋ ናጋ፤ ኡንቱንቱ ኔፐ ሻከቶፕኖ። 22 ኡንቱንቱ ነዉ ደኡዋ ግዳና፤ ኡንቱንቱ ነዉ እሻሉዋነ ናሸቻ ደኡዋ እማና። 23 ሄ ዎደ ኔን ነ ኦግያን ህርግ ባይናን ሀመታና፤ ነ ገዲካ በተና። 24 ኔን ግሴዳ ዎደ፥ ያያካ፤ ግሳደካ ማልኦ ገምእሹዋ ገምእሻና። 25 አኬከናን ጋክያ ባሻዉ፥ ዎይ ኢታቱ ይያ ዮ ያያካ። 26 አያዉ ጎፐ፥ መና ጎዳይ ነዉ አማነትያዋ ግዳና፤ ነ ገዲካ ጲርያን ኦይቀተናዳን፥ እ ኔና ናጋና።

27 ነዉ ዎልቃይ ደእሺና፥ መቶቴዳዎ ሎኦባ ኦያዋ አጎፓ። 28 ሀእ ነዉ ደእሺና፥ ነ ሾሮ፥ "ስማደ ያ፤ ታን ነዉ ዎንት እማና" ያጎፓ። 29 ኔናን አማነቲደ፥ ነ ማታን ደእሺና፥ ነ ሾሩዋ ቦላ ኢታባ ኦናዉ ቆፖፓ። 30 ኔና ናቂቤና አሳ፥ ጮ ሞቶፓ። 31 ሱገ ኦያ አሳቱዋ ቁሎፓ፤ ኡንቱንቱ ኢታ ኦሱዋካ ካሎፓ። 32 አያዉ ጎፐ፥ መና ጎዳይ ኢታ ኦያዋንታ እጼ፤ ሽን ሱረቱዋ እ ኡሎፐ ሲቄ። 33 መና ጎዳ ሸቃይ ኢታ ኦያዋንቱ ሶይና፤ ሽን አ አንጁ ሱረባ ሀንያዋንቱ ሶይና። 34 ኦቶረቲደ ቅሊጭያዋንታ ጾሳይካ ቅሊጬ፤ ሽን ባረንታ ካዉሽያዋንታ ናሼ።✝3:34 ያቆባ 4:6፤ 1 ጰጽ. 5:5 35 አዳ ኤራንቻቱ ቦንቹዋ ደማና፤ ሽን ቦዛቱ ካዉሻና።