1 ሄዋ ድራዉ፥ ክርስቶሳ የሱሳና ደእያዋንቱ ቦላን ፕርዳይ ሀእ ባዋ፤ 2 አያዉ ጎፐ፥ ክርስቶሳ የሱሳ ባጋና ኑዉ ደኡዋ እምያ ጌሻ አያና ህጊ ታና* ናጋራ ህግያ አይለተፐነ ሀይቁዋ ህግያ አይለተፐ ከሴዳ። 3 አሳ አሳተይ ዳቡራንቻ ግድያ ድራዉ፥ ህጊ ኦናዉ ዳንዳይቤናዋ ጾሳይ ኦዳ፤ ናጋራንቻቱዋ አሳተ ማላ አሳተና ደእያ ባረ ናኣ፥ አሳይ ኦዳ ናጋራዉ ያርሹዋ ግዳናዉ ጾሳይ ኪቲደ፥ አሳ አሳተ ግዶን ደእያ ናጋራ ፕርዴዳ። 4 ጌሻ አያናይ ኮይያዋዳን ደእያዋንቱፐ አትን፥ ኑ አሳተይ ኮይያዋዳን ደአናዋንቱ ቦላ፥ ኑ ቦላ፥ ህግያ ጽሎ አዛዙ ፖለታና ማላ፥ ጾሳይ ሀዋ ኦዳ።

5 ባረንቱ አሳተይ ኮይያዋዳን ደእያዋንቱ ባረንቱ አሳተባ ቆፒኖ፤ ሽን ጌሻ አያናይ ኮይያዋዳን ደእያዋንቱ ጌሻ አያናባ ቆፒኖ። 6 አሳተባ ቆፉሳይ ሀይቁዋ አሄ፤ ሽን ጌሻ አያናባ ቆፉሳይ ደኡዋነ ሳሮተ አሄ። 7 አሳተባ ቆፉሳይ ጾሳዉ እጾ፤ አያዉ ጎፐ፥ አሳተይ ጾሳ ህገዉ ኤኖ ጌና፤ ቃይ ኤኖ ጋናዉካ አዉ ዳንዳየተና። 8 ባረንቱ አሳተዉ ኤኖ ግያዋንቱ ጾሳ ናሸቻናዉ ዳንዳይክኖ።

9 ሽን ጾሳ አያናይ ህንተንቱን ደኦፐ፥ ጌሻ አያናይ ግያዋዳን ደኢታፐ አትን፥ ህንተ አሳተይ ኮይያዋዳን ደእክታ። ሽን ኦንነ ክርስቶሳ አያናይ ባይናዋ ግዶፐ፥ ሄ ኡራይ ክርስቶሳዋ ግደና። 10 ሽን ክርስቶስ ህንተንቱን ደኦፐ፥ ህንተ አሳተይ ናጋራ ጋሱዋን ሀይቄዳዋ፤ ሽን ህንተ አያናይ ጽሎተ ጋሱዋን ህንተንቱን ፓጻ ደኤ። 11 ሽን የሱሳ ሀይቁዋፐ ደንዳ ጾሳ አያናይ ህንተ ግዶን ደኦፐ፥ ሀይቁዋፐ ክርስቶሳ ደንዳ ጾሳይ ቃይ ህንተንቱን ደእያ ባረ ጌሻ አያናን፥ ሀይቂያ ህንተ አሳተዉካ ደኡዋ እማና።

12 ስም ታናዳን አማንያዋንቶ፥ ኑን አጩዋና ደኤቶ፤ ኑ አሳተይ ኮይያዋዳን ደአናዉ ኑዉ በሰና። 13 አያዉ ጎፐ፥ ህንተ ህንተ አሳተይ ግያዋዳን ደኦፐ፥ ህንተ ሀይቃና፤ ሽን ህንተ ህንተ ናጋራ ኦሱዋ ጌሻ አያናን ዎፐ፥ ፓጻ ደአና። 14 ጾሳ አያናይ ካለያ ኡባቱ ጾሳ ናና። 15 አያዉ ጎፐ፥ ኑን ኑ ኮሻ ቁ ኦደ፥ "አባ! ታ አቦ" ያጊደ ጼስያ፥ ኑና ጾሳ ናና ከስያ ጌሻ አያና ጾሳፐ አኬዶፐ አትን፥ ላኤንዋ ያያናዉ አይለ ከስያ አያና አክበይኮ። 16 ጾሳ አያናይ ባረ ሁጰዉ ኑ አያናና ግዲደ፥ ኑን ጾሳ ናና ግድያዋ ማርካቴ። 17 ኑን አ ናና ግዶፐ፥ እ ባረ አሳዉ ምንጄዳ አንጁዋ ላታና፤ ቃይ ኑን ጾሳይ ክርስቶሳዉ ምንጄዳዋካ አናና ላታና፤ ኑን ክርስቶሳ ዋይያ አናና ሻኮፐ፥ አ ቦንቹዋካ አናና ሻካና።

18 አያዉ ጎፐ፥ ኑን ሀእ ዋየትያ ዋይያ ኑዉ ስንፐ ቆንጫና ቦንቹዋና ጋናዉ፥ ኡባካ ዳንዳየተና ጋደ ታን ቆፓይ። 19 ጾሳይ መዳ መታ ኡባይ ጾሳ ናናይ ቆንጫናዋ ሎይ ላሞት ኡቴዳ። 20 አያዉ ጎፐ፥ መታ ኡባይ ማዱ ባይናባ ግዳናዳን፥ ጾሳይ አ ቦላ ፕርዴዳ፤ ስንፐ ደማና ጊደ ናሸቻን ናግ ኡታናዳን ኦዳ ጾሳይ ኮዬዳ ድራዉ ሀኔዳፐ አትን፥ መታ ኡባይ ባረ ሁጰዉ ኮዬዳዋን ግደና። 21 መታ ኡባይ ባረ ሁጰዉ ባሻ አይለተፐ እት ጋላስ ከሳናዋ፤ ቃይ ሄ መታቱ ጾሳ ናናይ አይለተፐ ከሴዳ ቦንቾ ከሳ ሻካና። 22 አያዉ ጎፐ፥ መታ ኡባይ እትፐ ሀዋ ጋካናዉ፥ ማጫ አሳ የሉ ኦይቂና ኦልያዋዳን፥ ሳኩዋን ኦልያዋ ኑን ኤሬቶ። 23 ቃይ ሄዋ ጻላላ ግደና፤ ኑን፥ ጌሻ አያና ጾሳ ባይራ እሞታዳን ኦደ አኬዳዋንቱ፥ ኑ ሁጰዉ ጾሳይ ኑና ባረ ናና ኦናዳንነ ኑ ኩመን አሳተ ዎዛናዳን ናጊደ፥ ኑ ግዶን ኦሌቶ። 24 አያዉ ጎፐ፥ ኑን ጾሳይ እማና ጌዳዋን አቴዶ። ሽን ኑን ጾሳይ እማና ጌዳዋ በኦፐ፥ ያትና፥ ሄዌ ናሸቻን ናግያዋ ግደና፤ አያዉ ጎፐ፥ ባረ በእያዋ ደማና ጊደ፥ ናሸቻን ናግያዌ ኦኔ? 25 ሽን ኑን በኤናዋ ደማና ጊደ፥ ናሸቻን ናጎፐ፥ ሄዋ ዳንዳዪደ ናጌቶ።

26 ሀዋዳን ቃይ ጌሻ አያናይ ኑ ዳቡራ ማዳናዉ ዬ፤ አያዉ ጎፐ፥ ኑን ጾሳ ዎት ዎሳናዉ በስንቶ ኤሮኮ፤ ሽን ጌሻ አያናይ ባረ ሁጰዉ ቃላን ቆንጭሳናዉ ዳንዳየተና ኦልያን ኑዉ ጋናቴ። 27 ቃይ አሳ ዎዛና ብድያ ጾሳይ፥ ጌሻ አያናይ እ ኮይያዋዳን፥ ጾሳ ናቶ ጋናትያ ድራዉ፥ ጌሻ አያና ቆፋይ አየንቶ ኤሬ።

28 ጾሳይ ባረና ሲቅያዋንቶ፥ ባረ ቆፋዳን ጼሴዳዋንቶ፥ ኡባ የዉዋ ሎኦተዉ ኦያዋ ኑን ኤሬቶ። 29 ጾሳይ ባረ ናአይ ጮራ እሻቱዋ ግዶን ባይራ ግዳናዳን፥ እ ካሰ ኤሬዳዋንታ ቃይ ባረ ናኣ ማላታናዳን፥ ካሰቲደ ቆፋ ቃቼዳ። 30 ጾሳይ ካሰቲደ ቆፔዳዋንታ፥ ኡንቱንታ ቃይ ጼሴዳ፤ ሄ ጼሴዳዋንታካ ጌሼዳ፤ ሄ ጌሼዳዋንታካ ቃይ ቦንቼዳ።

31 ያትና፥ ኑን ሀዋ ኡባ ዋጋኔ? ጾሳይ ኑ ባጋ ግዶፐ፥ ኑና ኦን ኤቀታናዌ? 32 እ ሀራይ አቶ ባረ ናኣካ ዋይያፐ ጉየ አሽቤና፤ ሽን አ ኑዉ ኡባዉ አደ እም አጌዳ። እ ባረ ናኣ እሜዳዌ ቃይ ኑዉ ኡባባ ጮ እመኔ?

33 ጾሳይ ዶሬዳዋንታ ኦኔ ሞታናዌ? ጾሳይ ባረ ሁጰዉ ኡንቱንታ ጽልሴዳ። 34 ያትና፥ ኡንቱንቱ ቦላ ፕርዳናዉ ዳንዳይያዌ ኦኔ? ሄዋ ጎፐ፥ ሀይቁዋፐ ደንዲደ፥ ጾሳፐ ኡሸቻ ባጋና ኡቴዳ፥ ክርስቶስ የሱሳ፤ እ ቃይ ኑዉ ጋናቴ።

35 ስም ኑና ክርስቶሳ ሲቁዋፐ ሻካናዌ ኦኔ? ዋዪ ዎይ መቱ ዎይ የደርሱ ዎይ ኮሻይ ዎይ ካሉ ዎይ ያሻይ ዎይ ኦላይ ኑና ሻካኔ? 36 ጾሳ ማጻፋይ፥ "ኑን ነ ድራዉ፥ ኡባ ጋላስ ሀይቄቶ፤ ሹካዉ አፍያ ዶርሳዳን ፓይደቴቶ" ያጌ።✝ 37 ሽን ኑን ኑና ሲቄዳ አን ሀ የዉዋ ኡባን ኑና ጾንያዋንቱፐ አቶ።

38,39 አያዉ ጎፐ፥ ሀይቁዋ ግድና፥ ደኡዋ፥ ኪታንቻቱዋ ግድና፥ ሞድያዋንታ፥ ሀእ ደእያዋንታ ግድና፥ ስንፐ ያናዋ፥ ዎልቃማቱዋ ግድና፥ ቦላ ሳሉዋ ግድና፥ ጋርሳ ሳኣ፥ አይ መታ ግድናካ፥ ኑ ጎዳ ክርስቶሳ የሱሳን ደእያ ጾሳ ሲቁዋፐ ኑና ሻካናዉ ዳንዳየናዋ ታን ኤራድ።