ኤርማሳ 18

ኤርማስ ኡርቃ መያ ብታንያ ሶ ቤዳ

1 መና ጎዳፐ ኤርማሳዉ ዬዳ ቃላይ ሀዋ፤ 2 "ደንዳ፤ ኡርቃ መያ ብታንያ ጎለ ባ። ያን ታን ኔና ታ ቃላ ስሳና" ያጌዳ። 3 ታን ዱገ ኡርቃ መያ ብታንያ ጎለ ባደ፥ እ ባረ መያ ይንግርያዋን ኡርቃ መያዋ በኣድ። 4 እ መሽና፥ ሚሻይ አ ኩሽያን ባዬዳ። እ ሄ ኡርቃ ዛሪደ ሙናቂደ፥ ባረና ሎእያ ሀራ ሚሻ ከሲደ መዳ።

5 ሄ ዎድያን መና ጎዳ ቃላይ፥ ሀዋዳን ያጊደ፥ ታኮ ዬዳ፤ 6 "እስራኤልያ አሳቶ፥ ሀ ኡርቃ መያ ብታኒ ኦያዋዳን፥ ታን ህንተና ኦናዉ ዳንዳይክታ? ያጌ መና ጎዳይ። እስራኤልያ አሳቶ፥ በእተ፤ ኡርቃይ ባረና መያዋ ኩሽያን ደእያዋዳን፥ ህንተካ ታ ኩሽያን ደኢታ። 7 አይ ዎደ ግዶፐነ፥ ታን እት ቢታባ ዎይ እት ካዉተባ፥ ‘ታን ህንተና ቆላና፥ ዮዳናነ ይሳና’ ጋደ ኦድና፥ 8 ሄ ታን ኦዴዳ ካዉተይ ባረ ኢታተፐ አጊደ ስሞፐ፥ ታን ኡንቱንቱ ቦላ አሀና ጌዳ ኢታባ አሄናን አጋ ባሻና። 9 ቃይ አይ ዎደ ግዶፐነ፥ ታን እት ቢታባ ዎይ እት ካዉተባ፥ ታን ህንተና ኬጻናነ ቶካና ጋደ ኦድና፥ 10 ሄ ካዉተይ ታን ኦድያዋ ስሰናን እጾፐ ታ ስንን ኢታባ ኦፐ፥ ታን ኦና ጌዳ ሎኦባ ኦናን አጋሻና።

11 "ሄዋ ድራዉ፥ ሀእ ይሁዳ አሳቶነ የሩሳላመን ደእያዋንቱ ሀዋዳን ያጋ፤ መና ጎዳይ ያጌ፤ በእተ፥ ታን ህንተ ቦላ ኢታባ መይነ ሀልቻድ። ህንተ ኡባይካ ህንተ ኢታ ኦግያፐ ስምተ፤ ህንተ ኦግያነ ህንተ ኦሱዋ ላምተ ያጌ ያጋ። 12 ሽን ኡንቱንቱ፥ ‘ሄዌ አይነ ማደና! ኑን ኑ ሀልቼዳዋዳን ሀናና፤ ኑን ሁጲያን ሁጲያን ኑ ኢታ ዎዛና ሙመተዳን ኦና’ ያጋና" ያጌዳ።

13 ሄዋ ድራዉ፥ መና ጎዳይ ሀዋዳን ያጌ፤

"ሀዋ ማላባ ስስ ኤሪቴ?

ያጊደ አነ ካዉተቱዋ ግዶን ላልእተ።

ወዶራታ እስራኤልያ ሎይ ሸነይያዋ ኦዱ።

14 እ ባረዉ፥ ሊባኖሳ ደርያ ቦላን ደእያ ሻቻይ፥

ዛላ ጼራፐ ይ ኤሪ?

ሄ ደርያፐ ጎግያ እርጻ ሃይ መል ኤሪ?

15 ሽን ታ አሳቱ ታና ዶጌድኖ፤

ኡንቱንቱ ፓና ጾሳቶ እጻና ጩዋዪኖ።

ባረንቱ ኦግያፐ፥ ባረንቱ በን ሎሱዋፐ በቴድኖ፤

ኡንቱንቱ ኦግያ አጊደ፥ ጋጻና ቤድኖ።

16 ኡንቱንቱ ባረንቱ ቢታ ዳጋንያባነ፥

መናዉ ካቴዳዋ ከሴድኖ።

ያና አያ ኦንነ ሸነቴነ ባረ ሁጲያ ቃ።

17 አዋይ ዉልያ ባጋ ጫርኩዋዳን፥

ታን ኡንቱንታ ኡንቱንቱ ሞርከቱዋ ስንን ላላና።

ኡንቱንቱ መቱዋ ጋላስ ታን ኡንቱንቶ ዞክያ ዛራናፐ አትና፥

ታ ሶምኡዋ ሃሳይከ" ያጌ።

ኤርማሳ ቦላ ማቀቴዳ ማቁዋ

18 አሳቱ ሀዋዳን ያጌድኖ፤ "ሃ ዪተ፤ አነ ኤርማሳ ቦላ ማቀቴቶ። አያዉ ጎፐ፥ ቄሳቱ ታማርስያ ህጊ፥ አዳ ኤራንቻቱ እምያ ዞሪ፥ ትምቢትያ ኦድያዋንቱ ኦድያ ቃላይ የና። ሃ ዪተ፤ አነ አ ኑ እንጻርሳን ጲሮይተ። እ ኦድያ ቃላ ስሰናን አጌቶ" ያጌድኖ።

19 አቤት መና ጎዳዉ፥ ታ ኦድያዋ ስሳ፤ ታ ሞርከቱ ታ ቦላ ሃሳይያዋ ሀይዛ። 20 ሎኦ ኦዳ አሳዉ ኢታ ዛሪእ? ሽን ኡንቱንቱ ታዉ ኦላ ቦኪኖ። ታን ነ ሀንቁ ኡንቱንቱፐ ስማና ማላ፥ ኡንቱንቱ ድራዉ ሎኦባ ሃሳያናዉ ነ ስንን ኤቄዳዋ ቆፓ። 21 ሄዋ ድራዉ፥ ኡንቱንቱ ናናቱዋ ኮሻዉ አደ እማ፤ ኡንቱንታካ ማሻዉ አደ እማ። ኡንቱንቱ ማጫ አሳቱካ ናአይ ባይናዋንታነ አምኤ ግድኖ። ኡንቱንቱ አቱማ አሳቱካ ዎያ ሀርግያን ጋከትኖ፤ ኡንቱንቱ ዎዳላቱካ ኦላን ሲፈትኖ። 22 ኡንቱንቱ ቆፐናን ኔን ኡንቱንቱ ቦላ ቦንቂያዋንታ የድና፥ ኡንቱንቱ ጎልያን ዋሱ ከሶ። አያዉ ጎፐ፥ ኡንቱንቱ ታና ኩንድሳናዉ ኦላ ቦኬድኖ፤ ታ ገድያዉካ ጲርያ ዎድኖ። 23 ሽን አቤት መና ጎዳዉ፥ ኡንቱንቱ ታና ዎናዉ ማቀቴዳዋ ኡባ ኔን ኤራሳ። ኔን ኡንቱንቱ ኢታተ አቶ ጎፓ፥ ዎይ ኡንቱንቱ ናጋራ ነ ስንፐ ቁጮፓ። ኡንቱንቱ ነ ስንን ጾነቲደ ኩንድኖ። ነ ሀንቁዋ ዎደ ኔን ኡንቱንታ ሀዋዳን ኦ።