ኤርማሳ 43

ኤርማስ ግብጼ ቤዳ

1 መና ጎዳይ ኡንቱንቱ ጾሳይ ኪቴዳ ቃላ ኡባ ኤርማስ ኡንቱንቶ ኦዲደ ዉርሴዳዋፐ ጉይያን፥ 2 ሆሻያ ናአይ አዛርያስ፥ ቃሬሀ ናኣ ዮሀናንነ ኦቶራንቻ አሳይ ኡባይ ኤርማሳ ሀዋዳን ያጌድኖ፤ "ኔን ዎርዱዋ ኦዳሳ! መና ጎዳይ ኑ ጾሳይ ኑን ግብጼ ቢደ ኡተና ማላ ኦዳናዉ፥ ኔና ኑኮ ሙለ ኪትቤና። 3 ሽን ባብሎነ ቢታ አሳይ ኑና ዎናዳን ዎይ ኦሞዲደ ባረንቱ ቢታ አፋናዳን፥ ኔን ኑና ኡንቱንቱ ኩሽያን አደ እማና ማላ፥ ኔና ኑ ቦላን ደንዳዌ ኔርያ ናኣ ባሮካ" ያጌድኖ።

4 ሄዋ ድራዉ፥ ቃሬሀ ናአይ ዮሀናን፥ ኦላ ጋዳዋቱ ኡባይነ አሳይ ኡባይ ይሁዳ ቢታን ደአናዉ፥ መና ጎዳይ ኡንቱንታ አዛዜዳ አዛዙዋ ፖለናን እጼድኖ። 5 ቃሬሀ ናአይ ዮሀናንነ ኦላ ጋዳዋቱ ኡባይ ባረንቱ ላለቴዳ ካዉተቱዋ ኡባፐ ይሁዳን ደአናዉ ስሜዳ ይሁዳ አሳ ባረንቱና አኪደ፥ ግብጼ ቤድኖ።✝43:5-7 2 ካታ. 25:26 6 ቃይ ካትያ ናግያዋንቱ ካፑ ናቡዛራዳን ሳፋና ናኣ፥ አህቃማ ናኣ ጋዳልያና እትፐ ደአና ማላ አሼዳ አቱማ አሳቱዋ፥ ማጫ አሳቱዋ፥ ናናቱዋነ ካትያ ማጫ ናናቱዋ ኡባ አፌድኖ። ቃይካ ትምቢትያ ኦድያ ኤርማሳነ ኔርያ ናኣ ባሮካካ አፌድኖ። 7 ሄዋዳን ሀኒደ፥ መና ጎዳይ አዛዜዳዋ እጺደ፥ ግብጼ ቢታ ገሊደ፥ ጻፍናሳ ግያ ካታማ ጋካናዉ ቤድኖ።

8 ጻፍናሳን መና ጎዳ ቃላይ ኤርማሳኮ ሀዋዳን ያጊደ ዬዳ፤ 9 "ዎልቃማ ሹቻቱዋ ነ ኩሽያን ኦይቃ አካደ፥ ይሁዳ አሳይ በእሽና፥ ጻፍናሳን ደእያ ግብጼ ካትያ ጎልያ ገልያ ሳፐ ስን ባጋና ደእያ ባሱዋን ሞጋ። 10 ኡንቱንታ ሀዋዳን ያጋ፤ ‘ኡባፐ ዎልቃማ መና ጎዳይ፥ እስራኤልያ ጾሳይ ሀዋዳን ያጌ፤ "ታን ኪታደ፥ ታ ቆማ ባብሎነ ካትያ ናቡካዳናጾራ አህሳና፤ ሀ ሞገቴዳ ሹቻቱዋ ቦላን አ ካዉተ አራታ ዎና። ያቶፐ እ ባረ ካዉተ ዱንካንያ አ ቦላን ኤሳና። 11 እ ዪደ ግብጼ ቢታ ኦላና። ሀይቆ ደእያዋንቱ ሀይቃና፤ ኦሞዶ ደእያዋንቱካ ኦሞደታና፤ ቃይ ኦላን ሀይቃናዉ ደእያዋንቱካ ኦላን ሀይቃና። 12 ግብጼ ጾሳቱዋ ኬቱዋ እ ታማን ኦይና፤ ኤቃቱዋካ ጹጋና፥ ዎይ ኦሞዶ አኪደ አፋና። ሄንንቻይ ባረ ጫላ ማይያዋዳን፥ እ ግብጼ ቢታ ማያና። ያቲደ ሄዋፐ ሳሮ ባና። 13 ግብጼ ቢታን ሄልዮፖልሳ ግያ ካታማን ደእያ ሀዉልትያ እ መንሬና፤ ግብጼ ጾሳቱዋ ጎለቱዋካ ታማን ጹጋና" ያጌ’ ያጋ" ያጌዳ።