ኤርማሳ 36

ባሩክ ጻ ማጻፋ አሳዉ ናባቤዳ

1 እዮስያሳ ናአይ ይሁዳ ካቲ እዮአቄም ካተቴዳ ኦይደን ላይን፥ መና ጎዳይ ኤርማሳ ሀዋዳን ያጌዳ፤✝36:1 2 ካታ. 24:1፤ 2 ኦዱዋ 36:5-7፤ ዳኔላ 1:1-2 2 "እት ጻ ማጻፋ አካደ፥ ታን እዮስያሳ ዎድያን ኮይሮ ነዉ ኦዴዳ ጋላሳፐ ዶማደ፥ ሀች ጋካናዉ እስራኤልያ ቦላ፥ ይሁዳ ቦላነ ሀራ ካዉተቱዋ ኡባ ቦላ ሃሳዬዳ ቃላ ኡባ ጻፋ። 3 ታን ይሁዳ አሳ ቦላ አሀና ጋደ ሀልቼዳ ቦሻ ኡባ ስሲደ፥ ኦን ኤሪ፥ ኡንቱንቱ ባረንቱ ኢታ ኦሱዋፐ ስማነንቶነ። ታን ኡንቱንቱ ናቁዋነ ኡንቱንቱ ናጋራ አቶ ጋና" ያጌዳ።

4 ሄዋ ድራዉ፥ ኤርማስ ኔርያ ናኣ ባሮካ ጼሴዳ፤ መና ጎዳይ አዉ ኦዴዳባ ኡባ ባሮካዉ ኦድና፥ እ ጻ ማጻፋን ጻፌዳ። 5 ሄዋፐ ጉይያን፥ ኤርማስ ባሮካ፥ "ታን ቃሾ ጎልያን ደእያ ድራዉ፥ መና ጎዳ ጌሻ ጎልያ ገላናዉ ዳንዳይከ። 6 ሄዋ ድራዉ፥ ኔን አሳይ ጾምያ ጋላስ መና ጎዳ ጎልያ ባደ፥ ታን ኦድና፥ ኔን ጻ ማጻፋን ጻፌዳ መና ጎዳ ቃላ ኡንቱንቶ ናባባ፤ ባረንቱ ካታማቱዋፐ ዬዳ ይሁዳ አሳዉ ኡባዉካ ናባባ። 7 ሀ አሳ ቦላ መና ጎዳይ አዋዬዳ ሀንቁነ ይሉ ኢታ ግድያ ድራዉ፥ ኦን ኤሪ፥ ኡንቱንቱ ባረንቱ ኢታ ኦሱዋፐ ስሚደ፥ መና ጎዳ ዎሳነንቶነ" ያጌዳ። 8 ኔርያ ናአይ ባሩክ ትምቢትያ ኦድያ ኤርማስ አዛዜዳዋዳን፥ መና ጎዳ ጎልያን መና ጎዳ ቃላ ኡባ ናባቤዳ።

9 እዮስያሳ ናአይ ይሁዳ ካቲ እዮአቄም ካተቴዳ እቼሸን ላይን፥ ኡዱፑን አግናን፥ የሩሳላመን ደእያ አሳዉነ ይሁዳ ካታማቱዋፐ ዬዳ አሳዉ ኡባዉ መና ጎዳ ስንን ጾማናዳን አዋዬድኖ። 10 ባሩክ መና ጎዳ ጌሻ ጎልያን፥ ቆሞ ባጋ ዳባባን፥ ኦራ ፐንግያ ግያ ሳን ደእያ፥ ጻፍያ ሳፋና ናኣ፥ ጋማርያ ክፍልያን ኤቂደ፥ ኤርማሳ ቃላይ ጻፈቲደ ጻ ማጻፋ አሳዉ ኡባዉ ናባቤዳ።

ባሩክ ጻ ማጻፋ ካፓቶ ናባቤዳ

11 ሳፋና ናኣ ናአይ፥ ጋማርያ ናአይ ምካይ ማጻፋፐ መና ጎዳ ቃላ ባሩክ ናባብሽና ስሴዳ ዎደ፥ 12 ካትያ ጎልያን ጻፊ ኡትያ ክፍልያ ቤዳ። እ ብያ ዎደ፥ ጻፊ ኤልሻማእ፥ ሻማእያ ናአይ ዳላይ፥ አክቦራ ናአይ ኤልናታን፥ ሳፋና ናአይ ጋማሪ፥ ሀናንያ ናአይ ጽድቄነ ሀራ ካፓቱ ሄዋን ኡቴድኖ። 13 ባሩክ አሳዉ ማጻፋፐ ናባብሽና ስሴዳ ቃላ ኡባ ምካይ ኡንቱንቶ ኦዴዳ። 14 ካፓቱ ናታንያ ናኣ ይሁዳ ባሩካኮ ኪቲደ፥ "አሳዉ ኔን ናባቤዳ ማጻፋ አካደ ሃያ" ያጌድኖ። ናታኒ ሸሌምያ ናኣ፤ ሸሌም ኩሻ ናኣ። ያግና ባሩክ ማጻፋ አኪደ፥ ኡንቱንቱኮ ዬዳ። 15 ኡንቱንቱካ አ፥ "አነ ኡታደ፥ ኑዉ ማጻፋ ናባባ" ያጌድኖ።

ባሩክ ማጻፋ ናባቤዳ። 16 እ ናባቤዳ ቃላ ኡባ ስሴድኖ፤ ኡባይካ ያዪደ፥ እቱ እቱዋ ጼሊደ፥ ባሮካ፥ "ሀ ቃላ ኡባ ኑን ካትያዉ ኦዳናዉ ኮሼ" ያጌድኖ። 17 ቃይካ ዛሪደ፥ "ኔን ሀ ቃላ ኡባ ዎታደ ጻፌደንቶ ኑዉ ኦዳ። ሀዋ ነዉ ኤርማስ ባረ ዶናፐ ኦድና ጻፋዲ?" ያጌድኖ።

18 ባሩክ፥ "ኤ፥ ሀ ቃላ ኡባ ኤርማስ ባረ ዶናፐ ታዉ ኦዴዳ፤ ታን ቃላምያን ሀ ጻ ማጻፋን ጻፋድ" ያጌዳ።

19 ኡንቱንቱ ባሮካ፥ "ኔንነ ኤርማስ ቢደ ቆሰትተ፤ ህንተ ደእያ ሳኣካ ኦንነ ኤሮፖ" ያጌድኖ።

ካቲ ጻ ማጻፋ ጹጌዳ

20 ካፓቱ ማጻፋ ጻፍያ ኤልሻማአ ክፍልያን ዎዋፐ ጉይያን፥ ካቲ ደእያ ዳባባ ቢደ፥ ሀኔዳዋ ኡባ ካትያዉ ኦዴድኖ። 21 ሄ ማጻፋ አሀና ማላ፥ ካቲ ይሁዳ ኪቴዳ፤ ይሁዳይ ጻ ማጻፋ ኤልሻማአ ክፍልያፐ አሂደ፥ ካትያዉነ አ ዩሹዋን ኤቄዳ ካፓቶ ናባቤዳ። 22 ኡዱፑን አግናን ሳአይ ባልጉዋ ግድያ ድራዉ፥ ካቲ ባልጉዋ አያ ጎልያን ኡቴዳ። ሄ ዎደ ካትያ ስንን ደእያ ጮጭያን ታማይ ኤጼ። 23 ይሁዳይ ሄዙ ዎይ ኦይዱ ሳአቱዋ ናባቤዳዋፐ ጉይያን፥ ካቲ ሄ ሳአቱዋ ጻ ማጻፋፐ ሳንጽያን ቃንጽ ቃንጺደ፥ ታማን ኦሌዳ፤ ሄዋዳን ኦደ፥ ሄ ማጻፋ ሙለናካ ጹግ አጌዳ። 24 ሀ ቃላ ኡባ ስሲደካ ካዉነ አናና ኦያ ካፓቱ አይነ ያይበይክኖ፤ ዎይ ካዮቲደ፥ ባረንቱ ማዩዋ ፔበይክኖ። 25 ሀራይ አቶ ኤልናታን፥ ዳላይነ ጋማሪ ካቲ ሄ ማጻፋ ጹገናዳን ዎስናካ፥ ኡንቱንቱ ዎሳ ስሰናን እጼዳ። 26 ካትያ ናኣ ይራህማኤላ፥ አዝርኤላ ናኣ ሳራያነ አብድኤላ ናኣ ሸሌምያ፥ ጻፍያ ባሮካነ ትምቢትያ ኦድያ ኤርማሳ ኦይቃና ማላ ካቲ አዛዜዳ። ሽን መና ጎዳይ ኡንቱንታ ቆሴዳ።

ኤርማስ ዛር ጻፌዳ ጻ ማጻፋ

27 ኤርማስ ኦድና፥ ባሩክ ጻፌዳ ቃላይ ደእያ ማጻፋ ካቲ ጹግ ስምና፥ መና ጎዳ ቃላይ ኤርማሳኮ ሀዋዳን ያጊደ ዬዳ፤ 28 "ሀእካ ሀራ ጻ ማጻፋ አካደ፥ ይሁዳ ካቲ እዮአቄም ካሰ ጹጌዳ ጻ ማጻፋ ግዶን ደእያ ቃላ ኡባ ጻፋ። 29 ቃይ ይሁዳ ካትያ እዮአቄማ ሀዋዳን ያጋ፦ ‘መና ጎዳይ ሀዋዳን ያጌ፤ "ኔን፥ ባብሎነ ካቲ ቱሙዋፐ ዪደ፥ ሀ ቢታ ባይዛና፤ ቃይ እዝ ግዶን ደእያ አሳነ መህያካ ዉርሳና" ጋደ አያዉ ጻፋዲ?’ ያጋደ ማጻፋ ጹጋዳ። 30 ሄዋ ድራዉ፥ ታን መና ጎዳይ ነዉ ይሁዳ ካትያ ዮአቄማዉ ሀዋ ኦዳይ: ዳዊታ ካዉተ አራታን ኡትያ ዛሪ ነዉ ኡባካ ደኤና። ነ አሃይካ ጮ ኦለቲደ፥ ጋላስ አዋ ሱሉዋንነ ቃማ ሜጉዋን ሾጨታና። 31 ህንተ ናጋራ ድራዉ ኔና፥ ነ ዛርያነ ኔናና ኦያ ኡባ ታን ሙራና። ህንተ ታን ኦዴዳዋ ስሰናን እጼዳ ድራዉ፥ ታን ኦዴዳ ኢታባ ኡባ ህንተ ቦላነ ይሁዳንነ የሩሳላመን ደእያ አሳ ቦላ አሀና ያጌ ያጋ" ያጌዳ።

32 ሄዋፐ ጉይያን፥ ኤርማስ ሀራ ጻ ማጻፋ አኪደ፥ ኔርያ ናኣ ጻፍያ ባሮካዉ እሜዳ። ባሩክ ይሁዳ ካቲ እዮአቄም ታማን ጹጌዳ ጻ ማጻፋ ቃላ ኡባ ኤርማስ አዉ ዶናን ኦድና ጻፌዳ። ቃይ ኤርማስ ሄዋ ማላትያ ሀራ ቃላካ ጉጅን፥ ኡባካ ባሩክ ጻፌዳ።