ኤርማሳ 22

ኤርማስ ይሁዳ ካትያ ሶ አሳዉ ኦዴዳ ቃላ

1 መና ጎዳይ ሀዋዳን ያጌ፤ "ባ፤ ዱገ ይሁዳ ካትያ ጎለ ባደ፥ ያን ሀ ቃላ ኦዳ። 2 ‘ኔኖ ይሁዳ ካትያዉ፥ ዳዊታ ካዉተ አራታን ኡትያዎ፥ ኔንካ ነ ቆማቱካ ሀ ፐንግያና ገልያ ነ አሳይ ኡባይካ መና ጎዳ ቃላ ስስተ! 3 መና ጎዳይ ሀዋዳን ያጌ፤ "ሱረ ፕርዳነ ጽሎባ ኦተ። ቦንቀቴዳዋንታ ኡቁንያዋንቱ ኩሽያፐ አሽተ። በተቱዋ ቦላ፥ አዉ ባይና ናናቱዋ ቦላነ አስናቱ ሀይቄዳ ማጫ አሳቱዋ ቦላ ገንያባ ዎይ ማካላባ ኦፕተ። ቃይ ጽሎ አሳ ሱ ሀ ሳኣን ጉሶፕተ። 4 ህንተ ታን ጌዳዋዳን ቱሙ አዛዘቶፐ፥ ዳዊታ ካዉተ አራታን ኡትያ ካተቱ ፓራነ ፓራ ጋርያ ቶጊደ፥ ባረንቱ ኦሳንቻቱዋናነ ባረንቱ አሳና ሀ ካትያ ጎልያ ፐንገቱዋና ገላና። 5 ሽን ህንተ አዛዘተናን እጾፐ፥ ሀ ካትያ ጎሊ ኦና ግዳና ያጋደ ታን መና ጎዳይ ታ ሁጲያን ጫቃይ" ያጌ’ ያጋ" ያጌ።✝22:5 ማቶሳ 23:38፤ ሉቃሳ 13:35

6 መና ጎዳይ ይሁዳ ካትያ ጎልያባ ሀዋዳን ያጌ፤ "ኔን ታዉ ጋላኣደ ቢታነ ሊባኖሳ አሳ ጼራ ማላ ግዶፐካ፥ ታን ኔና ባዙዋነ አሳይ ደኤና ካታማ ኦና። 7 ታን ኔና ኮልያዋንታ ሁጲያን ሁጲያን ኦላ ሚሻ ኦይደ፥ ነዉ ኪታና። ኡንቱንቱ ዝጋፐ ማሰቴዳ ነ ቱቀቱዋ ቃንጸሬደ፥ ታማን ኦላና።

8 "ጮራ ካዉተፐ አሳይ ሄ ካታማ ላንቂያና አና። እቱ እቱዋ፥ ‘መና ጎዳይ አያዉ ሀ ዎልቃማ ካታማ ሀዋዳን ኦዴ?’ ያጊደ ኦቻና። 9 ኡንቱንቱ፥ ‘ኡንቱንቱ መና ጎዳ ባረንቱ ጾሳና ጫቀቴዳ ጫቁዋ አጌዳ ግሻሳነ ሀራ ጾሳቶ ጎይኔዳነ ኦዳ ግሻሳ’ ያጋና" ያጌ።

ኤርማስ ሻሉማባ ኦዴዳ ቃላ

10 ሀይቂዳ ካትያ እዮስያሳዉ ዬኮፕተ ዎይ ካዮቶፕተ። ሄዋ አጊደ፥ ኦሞደቲደ ቤዳ ሻሉማዉ*22:10 ሻሉማ፦ ሀ ሱንይ ሀራ ሳኣን፥ "እዮአካዛ" ጌተቴዳ። ሴለቲደ ዬክተ። አያዉ ጎፐ፥ እ ኡባካ ጉየ ስመና፤ ባረ የለቴዳ ቢታ ላኤን በኤና።

11 ባረ አዉዋ ድራዉ ይሁዳን ካተቲደ ደኢድ፥ ሀ ሳኣፐ ቤዳ እዮስያሳ ናኣ ሻሉማባ መና ጎዳይ ሀዋዳን ያጌ፤ "እ ኡባካ ጉየ ስመና።✝22:11 2 ካታ. 23:31-34፤ 2 ኦዱዋ 36:1-4 12 እ ኦሞደቲደ ቤዳ ቢታን ሀይቃና። ኡባካ ሀ ቢታ በኤና" ያጌ።

ኤርማስ እዮአቄማባ ኦዴዳ ቃላ

13 ባረ ጎልያ ናቁዋን ኬጽያዎ፥ ጽሎ ግደና ኦግያን ፖቅያ ቦላ ፖቅያ ጉጅያዎ፥ ባረ ጋድያ አሳዉ አይነ እመናንነ ዎልቃ ጋትያ ጭገናን ኦስስያዎ፥ አዉ አየ! 14 እ፥ "ታን ታዉ አኮ ፖቅያና ደእያ ዎልቃማ ጎልያ ኬጻና" ያጌ። ባረ ጎልያዉ ዎልቃማ ማስኮተቱዋ፤ ከሲደ ዝጋ ማሰን ቦላ ካሚደ፥ ዞኦ ቃላምያ ኦኬ።

15 ባረዉ ኔን ዳሮ ዝጋን ኬጼዳዌ ኔና ሎኦ ካትያ ከሴ ጋደ ቆፓዲ? ነ አዉዋ እዮስያሳዉ ምያዌነ ኡሽያዌ ዬዴ? እ ሱረ ፕርዳነ ጽሎባ ኦዳ። ሄዋ ድራዉ፥ አዉ ኡባባይካ እንጀቴዳ። 16 እ ህዬሳቶነ መቶታንቻቶ ሱረ ፕርድያ ድራዉ፥ አዉ ኡባባይካ ሀኔዳ። መና ጎዳ ኤሬ ያግያዌ ሀዋ። 17 ሽን ሀራባ አጊደ፥ ነ አይፊነ ነ ዎዛናይ ጃምያዌ ነ ጎኣ ደማናሳነ ጽሎ ሱ ጉሳናሳ፥ አሳ ናቃናሳነ ኡቁናናሳ።

18 ሄዋ ድራዉ፥ መና ጎዳይ እዮስያሳ ናኣ፥ ይሁዳ ካትያ እዮአቄማባ ሀዋዳን ያጌ፤✝22:18 2 ካታ. 23:36—24:6፤ 2 ኦዱዋ 36:5-7 "እ ሀይቂያ ዎደ ኡንቱንቱ አዉ፥ ‘አዬ! አየ! ታ እሻዉ!’ ያጊደ ዬክክኖ። ቃይ፥ ‘ታ ጎዳዉ፥ አየ! ታ ካትያዉ፥ አየ!’ ያጊደ ዝላልክኖ። 19 አ ሞጉካ ሀርያ ሞጉዋ ማላ ግዳናዋ። አ አሃይ ጎሸቲደ፥ የሩሳላመ ፐንገቱዋፐ ያ ባጋን ኦለታና" ያጌ።

የሩሳላመ ጋክያ መቱዋባ ኤርማስ ኦዴዳ ቃላ

20 ጾሳይ የሩሳላመባ ሀዋዳን ያጌ፤ "ባ፤ ፑደ ሊባኖሳ ባደ፥ ያን ዋሳ። ባሳነ ቢታን ዋሱዋ ጹልሳ። አባርማ ደርያንካ ዋሳ። አያዉ ጎፐ፥ ኦላዉ ኔናና ዙፐትያዋንቱ ኡባይ ጾነቴድኖ። 21 ኔን ሳሮ ደእሺና፥ ታን ነዉ ኦዳድ፤ ሽን ኔን፥ ‘ታን ስስከ’ ያጋዳ። ነ ያላጋተደፐ ዶሚደካ ነ ሀኑ ሀዋ፤ ኔን ታዉ አዛዘተናን እጻዳ። 22 ነ ሄንንቻቱዋ ኡባ ጫርኩ አፋና፤ ኦላዉ ኔናና ዙፐትያዋንቱካ ኦሞደቲደ ባና። ሄ ዎደ ነ ኢታተ ኡባ ድራዉ፥ ዬላታናነ ካዉሻና። 23 ህንተኖ፥ ሊባኖሳ ዝጋን ኬጸቴዳ ጎልያን ደእያዋንቶ፥ ኦይይ ኦይቄዳ ማጫ ምሽራትዋ ማላ ኡንኡ ህንተ ቦላ ፑቱ ግንቶ፥ ዋን ኦላንድቴሻ!" ያጌ።

24 መና ጎዳይ ሀዋዳን ያጌ፤ "ታ ደኡ ኤሮ! ኔን እዮአቄማ ናአይ፥ ይሁዳ ካቲ ዮኣኪን፥ ታ ኡሸቻ ኩሽያን ደእያ ታ አታምያ ምግዱዋ ግድንቶካ ታ ኔና ከሳ የጋና።✝22:24 2 ካታ. 24:8-15፤ 2 ኦዱዋ 36:9-10 25 ኔና ዎናዉ ኮይያዋንቶ፥ ኔን ያይያ ባብሎነ ካትያ ናቡካዳናጾራዉነ አ ኦላንቻቶ ታን ኔና አደ እማና። 26 ታን ኔናካ ኔና የሌዳ ነ አቶካ ህንተ የለታ ቢታ ግደና ሀራ ቢታዉ ኦላና፤ ህንተ ላኡካ ያን ሀይቃና። 27 ህንተ ስማናዉ ላሞትያ ቢታ ኡባካ ስምክታ" ያጌ።

28 ባረዉ ሀ ብታኒ ዮኣኪን፥ ካዳነ መኤዳ ባረቴ? እ ኦንነ ኮየና ሚሼ? አያዉ እነ አ ናናቱ የደርሰቲደ፥ ባረንቱ ኤረና ቢታን ኦለቲደ አቴድኖ? 29 ሀነ ቢታቴ፥ ቢታቴ፥ ቢታቴ! መና ጎዳ ቃላ ስሳ! 30 መና ጎዳይ ሀዋዳን ያጌ፤ "ሀ ብታንያ፥ ‘ናአይ ባይና አሳ፥ ባረ ላይ ኡባን ደኡ እንጀተና አሳ’ ጋደ ጻፋ። አያዉ ጎፐ፥ አ ዘረፐ እቶነ እንጀተና፤ ዳዊታ ካዉተ አራታን ኡትያዌ ዎይ ይሁዳን ካተትያዌ ኡንቱንቱፐ እቱነ ደኤና" ያጌ።