ኤርማሳ 47

ፕልስጼማ ፕርዳ

1 ግብጼ ካቲ ጋዛ ኦሊደ ጾናናፐ ካሰቲደ፥ ፕልስጼማ ቢታ ጼልያዋን መና ጎዳፐ ትምቢትያ ኦድያ ኤርማሳኮ ዬዳ ቃላይ ሀዋ።✝47:1-7 ኢሳ. 14:29-31፤ ህዝ. 25:15-17፤ ኢዩ. 3:4-8፤ አሞጻ 1:6-8፤ ሶፎ. 2:4-7፤ ዛካ. 9:5-7 2 መና ጎዳይ ሀዋዳን ያጌ፤ "በእተ፥ ሁጲሳ ባጋ ቢታፐ ሃይ ቃናነ ድኡ ገሌዳ ኩን ሃዳን ጎጋና። ቢታነ ቢታ ቦላን ደእያዋ ኡባ፥ ካታማቱዋነ ካታማቱዋ ግዶን ደእያ አሳ ኡባካ ሙካና። ያቶፐ አሳይ ዋሳና፤ ሄ ቢታን ደእያ ኡባይ ዬካና። 3 አያዉ ጎፐ፥ ኡንቱንቱ ፓራቱዋ ኮትያ፥ ፓራ ጋረቱዋ ጊረነ ጋረቱዋ ይንግርያዋን ጎንዶርሳ ስሳና፤ አዎቱ ባረንቱ ኩሺ አርጋጬዳ ድራዉ፥ ባረንቱ ናናቱዋ ማዳናዉ ጉየ ስምክኖ። 4 ፕልስጼማ አሳ ይሳናዉነ ጺሮሳነ ሲዶና አሳይ ፕልስጼማቱዋን ማደተናዳን፥ አቴዳዋንታ ቢታፐ ዎናዉ ዎዲ ጋኬዳ። መና ጎዳይ ፕልስጼማ አሳቱዋ፥ ሄዋንቱካ ሜድተራነ አባ ሃን ዶደቴዳ ሳኣን አቴዳዋንታ ካፍቶራፐ ዬዳዋንታ ይሳና ሀኔ። 5 ጋዛ አሳይ ዎልቃማ ካዩዋ ካዮቴዳ፤ አስቃሎና አሳይካ ስርጵ ጌዳ። ህንተኖ፥ አባ ዛንጋራን ባሻፐ አቴዳዋንቶ፥ ህንተ አዉደ ጋካናዉ፥ ህንተ ቦላ ቃንጸረደ ካዮቲቴ?

6 "ህንተ፥ ‘ኔኖ መና ጎዳ ማሻዉ፥ ኔን ጮኡ ጌናን እጽያዌ አዉደ ጋካናሴ? ነ ሾኩዋን ስማ ገላ! ጮኡ ጋደ ሸምፓ!’ ያጊታ። 7 ሽን መና ጎዳይ አ አዛዝና፥ እ ዋን ጮኡ ጎ ጊቴ? አስቃሎና ቦላነ አባ ዛንጋራን ቢታን ደእያ አሳ ቦላ እ አ ሱንድጌዳ" ያጌ።