1 እዮአቄማ ናኣ፥ ይሁዳ ካትያ ዮኣኪና ይሁዳ ሞድያዋንቱና፥ ኩሽያ ኦሱዋ ሂላቱዋናነ ብራታ ቆጽያዋንቱና የሩሳላመፐ ባብሎነ ካቲ ናቡካዳናጾር ኦሞዲደ፥ ባብሎነ አፋ ስምና፥ መና ጎዳይ ታና ሳፃ በሴዳ፤ ታን መና ጎዳ ጌሻ ጎልያዉ ስን ባጋና ባላስያ ቴራ ኦይኬዳ ላኡ ኬሻቱዋ በኣድ።✝ 2 እት ኬሻን ኮይሮ ቴሬዳዋ ማላትያ ዳሮ ሎኦ ባላስያ ቴራይ ደኤ። ላኤን ኬሻን ቃይ ማናዉ ጊገና ዳሮፐ ኢታ ባላስያ ቴራይ ደኤ። 3 መና ጎዳይ ታና፥ "ኤርማሳ፥ ሄዌ ኔን በእያዌ አዬ?" ያጊደ ኦቼዳ።

ታን፥ "ባላስያ ቴራ በአይ። ሎኦ ቴራይ ሎይ ሎአ፤ ኢታ ቴራይ ቃይ ማናዉ ጊገና ሎይ ኢታ" ያጋደ ኦዳድ።

4 ሄዋፐ ጉይያን፥ መና ጎዳ ቃላይ ታኮ ዬዳ፤ 5 "መና ጎዳይ እስራኤልያ ጾሳይ ሀዋዳን ያጌ፤ ‘ታን ይሁዳ ቢታፐ ኦሞዱዋን ባብሎነ ቢታ የዴዳ አሳቱዋ፥ ሀ ሎኦ ባላስያ ቴራዳን ሎአ ጋና። 6 ታን ኬካ አይፍያን ኡንቱንታ ጼላና፤ ቃይ ታን ኡንቱንታ ዛራደ ሀ ቢታ አሀና። ታን ኡንቱንታ ኬጻናፐ አትና ኮልከ። ታን ኡንቱንታ ቶካናፐ አትና ሾድከ። 7 ታን መና ጎዳ ግድያዋ ኡንቱንቱ ኤራናዳን፥ ታን ኡንቱንቶ ዎዛና እማና። ኡንቱንቱ ባረንቱ ኩመን ዎዛናፐ ታኮ ስማናዉ ደእያ ድራዉ፥ ኡንቱንቱ ታ አሳ ግዳና፤ ታንካ ኡንቱንቱ ጾሳ ግዳና’ ያጌ።

8 "ቃይ መና ጎዳይ ሀዋዳን ያጌ፤ ‘ይሁዳ ካትያ ሰደቅያሳ፥ አ ካፓቱዋ፥ ሀ ቢታን አቴዳ የሩሳላመ አሳ አቴዳዋንታነ ግብጼ ቢታን ደእያዋንታ፥ ማናዉ ጊገና ሄ ሎይ ኢታ ባላስያ ቴራዳን ኢታ ጋና። 9 ላላደ የድያ ቢታ ኡባን ታን ኡንቱንታ ሀ ሳኣ ካዉተቱዋን ኡንቱንታ በእያ ኡባዉ ዳጋማነ ሸቃ፥ ቦርያነ ሌምሱዋ፥ ቅሊጩዋነ ቦሄቴዳዋ ኦና። 10 ታን ኡንቱንቶነ ኡንቱንቱ ማይዛ አዋቶ እሜዳ ቢታፐ ኡንቱንቱ ኡባና ያና ጋካናዉ፥ ማሻ፥ ኮሻነ ኢታ ሀርግያ ኡንቱንቱ ቦላ የዳና’ ያጌ" ያጌዳ።