ኤርማሳ 19

መኤዳ ባረታ ሌምሱዋ

1 መና ጎዳይ ሀዋዳን ያጌ፤ "ባ፤ ኡርቃ መያዋፐ ባሬታ ሻማ። ኔናና አማሬዳ ጋድያ ጭማቱዋነ አማሬዳ ቄስያ ጭማቱዋ አካደ፥ 2 ኮንኣ መኡዋ ፐንግያ ግያ ፐንግያ ላንቂያና አአደ፥ ህኖማ ዛንጋራ ባ፤ ያን ታን ነዉ ኦድያ ቃላ አዋያ።✝19:2 2 ካታ. 23:10፤ ኤር. 7:30-32፤ 32:34-35 3 ሀዋዳን ያጋ፤ ‘ህንተኖ ይሁዳ ካተቶ፥ ህንተኖ የሩሳላመ ካታማ አሳቶ፥ መና ጎዳ ቃላ ስስተ! ኡባፐ ዎልቃማ መና ጎዳይ፥ እስራኤልያ ጾሳይ ሀዋዳን ያጌ፤ "በእተ፥ ስስያ ኡባዉ ሀይዉ ኢትያ ፓላባ ሀ ቢታ ቦላ ታን አሀና። 4 አያዉ ጎፐ፥ አሳቱ ታና አጌድኖ፤ ኡንቱንቱ ዎይ ኡንቱንቱ አዎቱ፥ ዎይ ይሁዳ ካተቱ ኤረና ሀራ ጾሳቶ እጻና ጩዋዪደ ያርሽያዋን ሀ ሳኣ ቱንሴድኖ። ኡንቱንቱ ጽሎ አሳቱዋ ሱ ሀ ሳኣን ኩንድኖ። 5 ቃይ ታን ኡንቱንታ አዛዛቤናባ፥ ዎይ ኦዳቤናባ፥ ዎይ ታ ዎዛናን ቆፓቤናባ ኦድኖ፤ ኡንቱንቱ ባረንቱ አቱማ ናናቱዋ ባኣላዉ ታማን ጹግያ ያርሹዋ ኦደ ያርሻናዉ፥ ጎይንያ ቃ ሳአቱዋን ያርሽያ ሳ ግምቤድኖ።✝19:5 ዎጋ 18:21 6 ሄዋ ድራዉ፥ ሀ ሳአይ ቶፌታ ዎይ ህኖማ ዛንጋራ ጌተትያዌ አቲደ፥ ሹካ ዛንጋራ ያገቲደ ጼገታና ጋላሳቱ ዪኖ ያጌ መና ጎዳይ።

7 " ‘ "ይሁዳነ የሩሳላመ አሳ ሀልቹዋ ታን ሀ ሳኣን ፖለተናዳን ኦና። ኡንቱንቱ ባረንቱ ሞርከቱዋ ማሻንነ ባረንታ ዎናዉ ኮይያዋንቱ ኩሽያን ሀይቃናዳን ታን ኦና። ኡንቱንቱ አሃ ሳሉዋ ካፎቶነ ሳኣ ዶአቶ ቁማ ኦደ እማና። 8 ሀ ካታማ ባዙዋነ ቅሊጭያዋ ከሳና። ሄዋና አያ ኡባይ አ ባሻን ማላለቲደ፥ ፖራ! ያጋና። 9 ኡንቱንቱ ባረንቱ ማጫ ናናቱነ አቱማ ናናቱዋ አሹዋ ማናዳን ታን ኦና። ኡንቱንቱ ዎናዉ ኮይያ ሞርከቱ ኡንቱንታ ዋይስያ ዋይያንነ ዶድያ ዶዳን፥ ኡንቱንቱ ኡባይ እቱ እቱዋ አሹዋ ማና" ያጌ’ ያጋ።

10 "ሄዋፐ ጉይያን፥ ኔናና እትፐ ቤዳ አሳቱዋ ስንን ሄ ባረታ መን። 11 ኡንቱንታ ሀዋዳን ያጋ፤ ‘ኡባፐ ዎልቃማ መና ጎዳይ ሀዋዳን ያጌ፤ "ዛሪደ ኮልና ኦይቀናዳን ኦደ፥ እት አሳይ ባረታ መንያዋዳን፥ ታን ሀ ካዉተነ ሀ ካታማ መንሬና። አሳቱ አሃ ሞግያ ሳአይ ባይና ድራዉ፥ ቶፌታን ሞጋና። 12 ታን ሀ ሳኣነ አን ደእያ አሳ ኦናዌ ሀዋ፤ ታን መና ጎዳይ ሀ ካታማ ቶፌታዳን ኦና። 13 የሩሳላመ አሳ ጎለቱነ ይሁዳ ካተቱዋ ጎለቱ፥ ጎልያ ቦላን ደምባዪደ ኦድኖ ሳሉዋ ጾልንተቶ እጻና ጩዋዬዳነ ሀራ ጾሳቶ ኡሻ ያርሹዋ ጉሴዳ ጎለቱ ኡባይ ቶፌታ ግያ ሳኣዳን ቱኔዳዋንታ ግዳና" ያጌ’ ያጋ" ያጌ።

14 ሄዋፐ ጉይያን፥ ኤርማስ መና ጎዳይ ትምቢትያ ኦዳናዉ ኪቴዳ ቶፌታፐ ስሚደ ዪደ፥ መና ጎዳ ጌሻ ጎልያ ግዶን ደእያ ዳባባን ኤቄዳ። አሳ ኡባዉ ሀዋዳን ያጌዳ፤ 15 "ኡባፐ ዎልቃማ መና ጎዳይ፥ እስራኤልያ ጾሳይ ሀዋዳን ያጌ፤ ‘ስስተ፥ ታን ሀ ካታማ ቦላነ አ ሄራን ደእያ ሞቱ ኡባ ቦላ አሀና ጌዳ ኢታባ ኡባ ኡንቱንቱ ቦላ አሀና ሀናይ። አያዉ ጎፐ፥ ኡንቱንቱ ሞርጊ ማካላ ግዲደ፥ ታን ኦዴዳባ ስሰናን እጼድኖ’ ያጌ" ያጌዳ።