ኤርማሳ 29

ኤርማስ ባብሎነን ደእያ ኦሞደቴዳ አሳዉ የዴዳ ዳብዳቢያ

1 ትምቢትያ ኦድያ ኤርማስ ኦሞደቴዳዋንቱ ግዶን ደእያ አቴዳ ጭማቶ፥ ቄሳቶ፥ ትምቢትያ ኦድያዋንቶነ ናቡካዳናጾር የሩሳላመፐ ኦሞዲደ፥ ባብሎነ አፌዳ ሀራ አሳቶ ኡባዉ የሩሳላመፐ የዴዳ ዳብዳቢ ሀዋፐ ካሊደ ጻፈቴዳዋ።✝29:1 2 ካታ. 24:12-16፤ 2 ኦዱዋ 36:10 2 ሀዌ ሀኔዳዌ፥ ካቲ ዮኣኪን፥ ካታታ አ አታ፥ አ ኦሳንቻቱ፥ ይሁዳነ የሩሳላመ ካፓቱ፥ ኩሽያ ኦሱዋ ሂላንቻቱነ ብራታ ቆጽያዋንቱ የሩሳላመፐ ከስ ስምና። 3 ኤርማስ ይሁዳ ካቲ ሰደቅያስ ባብሎነ ካትያ ናቡካዳናጾራዉ ኪትያ ሳፋና ናኣ ኤልኣሳነ ህልቂያ ናኣ ጋማርያ ቦላን ሄ ዳብዳቢያ ኪቴዳ።

ዳብዳቢ ሀዋዳን ያጌዳ፤ 4 "ኡባፐ ዎልቃማ መና ጎዳይ፥ እስራኤልያ ጾሳይ፥ ታን የሩሳላመፐ ባብሎነ ኦሞድሳደ የዴዳ አሳዉ ኡባዉ ሀዋዳን ያጋይ፤ 5 ጎለቱዋ ኬጺደ፥ ኡንቱንቱን ደእተ። ካ ዘሪደ፥ አይፍያ ሚተ። 6 ማጫ አሳ አክተ፤ አኪደ ማጫዋ አቱማዋ የልተ። ህንተ ናናቶካ ማጫ አሳ ጊግሲደ እምተ፤ ህንተ ማጫ ናናቱዋካ አስናዉ እምተ። ኡንቱንቱካ ማጫዋ አቱማዋ የልኖ። ያን ፓይዱዋ ጮራትተ፤ ጉጾፕተ። 7 ቃይ ታን ህንተና ኦሞዶ የዴዳ ካታማዉ ሳሩ ደአናዳን ኮይተ። ሄ ካታማዉ መና ጎዳ ዎስተ። አያዉ ጎፐ፥ ‘አዉ ሳሩ ደኦፐ፥ ህንተዉካ ሳሩ ደአና’ ያጋይ።

8 "ኡባፐ ዎልቃማ መና ጎዳይ፥ እስራኤልያ ጾሳይ ሀዋዳን ያጌ፤ ‘ህንተ ግዶን ህንተ ትምቢትያ ኦድያዋንቱነ ሻሬቾቱ ኦድያባን ጭመቶፕተ። ኡንቱንቱ አኩመትያ አኩሙዋካ ስሶፕተ። 9 አያዉ ጎፐ፥ ኡንቱንቱ ታ ሱንን "ትምቢትያ" ጊደ ዎርዶባ ኦዲኖ፤ ታን ኡንቱንታ ኪታበይከ’ ያጌ መና ጎዳይ።

10 "መና ጎዳይ ሀዋዳን ያጌ፤ ‘ባብሎነ ላይይ ላፑን ታሙ ፖለትያ ዎደ፥ ታን ህንተ ድራዉ ያና፤ ታን ህንተና ህንተ ቢታ ዛራደ አሀና ጌዳ ሎኦ ቃላ ፖላና።✝29:10 2 ኦዱዋ 36:21፤ ኤር. 25:11፤ ዳኔላ 9:2 11 አያዉ ጎፐ፥ ታን ህንተዉ ሀልችያ ሀልቹዋ ታን መና ጎዳይ ኤራይ፤ ሄዌካ፥ ህንተዉ ስን ህዶታነ ናሸቻ እማና ማላ፥ ሳሮ ሀልቹዋፐ አትና፥ ኢታ ሀልቹዋ ግደና። 12 ሄዋፐ ጉይያን፥ ህንተ ታና ጼሳና፤ ታኮ ያናነ ታና ዎሳና፤ ታንካ ህንተዉ ስሳና። 13 ህንተ ታና ኮያና፤ ህንተ ታና ህንተ ፖሎ ዎዛናፐ ኮዬዳ ዎደ ደማና።✝29:13 ዛረ. 4:29 14 ታን ህንተዉ ቤታና። ታን ህንተና ኦሞዱዋፐ ዛራና። ታን ህንተና ላሌዳ ካዉተቱዋ ኡባፐነ ሳኣ ኡባፐ ሺሻና ያጌ መና ጎዳይ። ታን ህንተና ኦሞዶ የዳናፐ ካሰ ህንተ ደኤዳ ሳኣ ጉየ ዛራደ አሀና። ታን መና ጎዳይ ሀዋ ኦዳድ’ ያጌ።"

15 ህንተ፥ "መና ጎዳይ ትምቢትያ ኦድያባ ኑዉ ባብሎነን ደንዳ ያጌድታ። 16 ሄዋ ድራዉ፥ ዳዊታ ካዉተ አራታን ኡትያ ካትያባ፥ ሀ ካታማን ደእያ አሳ ኡባባነ ህንተናና ኦሞዱዋን ከስቤና ህንተ ዳቦቱዋባ መና ጎዳይ ሀዋዳን ያጌ። 17 ኤ፥ ኡባፐ ዎልቃማ መና ጎዳይ ሀዋዳን ያጌ፤ ‘ታን ኡንቱንቱ ቦላ ማሻ፥ ኮሻነ ኢታ ሀርግያ አሀና። ቃይ ታን ኡንቱንታ ማናዉ ጊገና ዎቄዳ ባላስያ ቴራ ማላ ኦና። 18 ታን ኡንቱንታ ማሻን፥ ኮሻንነ ኢታ ሀርግያን የደርሳና፤ ታን ኡንቱንቱ ሳኣን ደእያ ካዉተ ኡባዉ ዳጋማ ኦና። ቃይ ታን ኡንቱንታ ከሳደ የዴዳ ቢታ ኡባን ቃንገ፥ ዳጋማ፥ ቦርያነ ሸቃ ኦና። 19 አያዉ ጎፐ፥ ትምቢትያ ኦድያ ታ ቆማቱዋ ቦላ ታን ኡንቱንቶ ዛራ ዛራደ ኪቴዳ ታ ቃላ ኡንቱንቱ ስሰናን እጼድኖ ያጌ መና ጎዳይ። ህንተካ ኦሞደት ቤዳዋንቱ ስሰናን እጼድታ ያጌ መና ጎዳይ። 20 ታን የሩሳላመፐ ባብሎነ ኦሞድሳደ የዴዳ አሳቶ፥ ህንተ ኡባይካ ታ ቃላ፥ መና ጎዳ ቃላ ስስተ’ ያጌ።

21 "ሀናናዋ ጊደ ህንተዉ ታ ሱንን ዎርዶባ ኦድያ ቆላያ ናኣ አካባባነ ማእሴያ ናኣ ጽድቅያባ ኡባፐ ዎልቃማ መና ጎዳይ፥ እስራኤልያ ጾሳይ ሀዋዳን ያጌ፤ ‘ታን ኡንቱንታ ባብሎነ ካትያ ናቡካዳናጾራዉ አደ እማና። ህንተ ጼልሽን፥ እ ኡንቱንታ ዎና። 22 ሄዋፐ ጉይያን፥ ይሁዳፐ ኦሞደቲደ፥ ባብሎነ ቤዳ አሳይ እት ኡራ ሸቃናዉ ኮዮፐ፥ "መና ጎዳይ ኔና ባብሎነ ካቲ ታማን ጹጌዳ ጽድቅያዳንነ አካባዳን ኦ" ያጋና። 23 አያዉ ጎፐ፥ ኡንቱንቱ እስራኤልያን ሎይ ናጋራ ኦድኖ። ኡንቱንቱ ባረንቱ ሾሮቱዋ ማጫ አሳ ዎሹሜድኖ፤ ያቲደ ታን ኡንቱንታ አዛዛቤና ዎርዶባ ታ ሱንን ሃሳዪኖ። ሄዋ ኤርያዌ ታና፤ ሄዎ ታን ማርካ። ታን መና ጎዳይ ሀዋ ኦዳድ’ ያጌ" ያጌዳ።

ሻማእያ ዳብዳቢያ

24 ጾሳይ ነሄላምያ ሻማእያዉ ሀ ኪታ ኪታና ማላ፥ ኤርማሳዉ ኦዴዳ። 25 "ኡባፐ ዎልቃማ መና ጎዳይ፥ እስራኤልያ ጾሳይ ሀዋዳን ያጌ፤ ‘ኔን ነ ሱንን ዳብዳቢያ የሩሳላመን ደእያ አሳዉ ኡባዉ፥ ማእሴያ ናኣ ቄስያ ጻፋንያዉነ ሀራ ቄሳቱ ዋ ኡባዉ የዳዳ። ኔን ጻፋንያ ሀዋዳን ያጋዳ፤ 26 "መና ጎዳ ጎልያን ካፑዋ ግዳና ማላ፥ ኔና መና ጎዳይ ዮዳሄ ድራዉ ቄስያ ኦደ ሱንዳ። ትምቢትያ ኦዴቶ ግያ ጎይያ አሳቱዋ፥ ቃጲያንነ ቶላን ገልሳናዉ በሴ። 27 ሄዋ ድራዉ፥ ህንተ ግዶን ትምቢትያ ኦድያ አናቶታፐ ዬዳ ኤርማሳ አያዉ ሄዋዳን ኦበይኪ?" 28 ኑን ባብሎነን ደእሺና፥ ኤርማስ ጻፊደ፥ ኑዉ ሀዋዳን ያጊደ ኪቴዳ፤ ያን ህንተ ጋምአና። ጎለቱዋ ኬጺደ፥ ደእተ። ካ ዘሪደ፥ አይፍያ ሚተ’ ያጌዳ።"

29 ቄስያ ጻፋኒ ትምቢትያ ኦድያ ኤርማሳዉ ሀ ዳብዳቢያ ናባቤዳ። 30 መና ጎዳ ቃላይ ኤርማሳዉ ሀዋዳን ያጊደ ዬዳ፤ 31 "ኪታ ኦሞዱዋን አሳዉ ኡባዉ ሀዋዳን ያጋደ ኪታ፤ ‘ነሄላምያ ሻማእያባ መና ጎዳይ ሀዋዳን ያጌ፤ "ታን ኪተናን ሻማኢ ህንተዉ፥ ሀናናዋ ጊደ ኦዴዳ ድራዉነ ህንተና ዎርዱዋ አማንዳ ድራዉ፥ 32 ታን መና ጎዳይ ነሄላምያ ሻማእያነ አ ሶ አሳ ሙራና። ታ ቦላ እ ማካላባ ሃሳዬዳ ድራዉ፥ ሀ አሳ ግዶን አዉ እት ኡራይነ ፓጻ ደኤና። ቃይ እ ባረ ሁጲያንካ ታን ታ አሳዉ ኦና ኬካተ በኤና። ታን መና ጎዳይ ሀዋ ኦዳድ" ያጌ’ ያጋ" ያጌዳ።