ኤርማሳ 20

ኤርማሳነ ፓሽሁራ

1 ሄ ዎደ መና ጎዳ ጌሻ ጎልያን ካፑዋ ግድያ፥ እሜራ ናኣ ፓሽሁራ ግያ ቄሲ፥ ኤርማስ ሀ የዎቱ ትምቢትያ ኦድሽን ስሴዳ። 2 ፓሽሁር ትምቢትያ ኦድያ ኤርማሳ ደሽሴዳ፤ ቆሞ ቢንያማ ፐንግያ ግያ መና ጎዳ ጌሻ ጎልያ ገልያሳን ደእያ ዱ ሉኩዋን ቃሽሴዳ። 3 ዎንተ ጋላስ ፓሽሁር ኤርማሳ ቃሹዋፐ ብልና፥ ኤርማስ አዉ ሀዋዳን ያጌዳ፤ "ሀችፐ ዶምና፥ መና ጎዳይ ነ ሱን ፓሽሁራ ያገና፤ እ ነ ሱን ያን ሃን ዳጋማ ያጋና። 4 አያዉ ጎፐ፥ መና ጎዳይ ሀዋዳን ያጌ፤ ‘ታን ኔና ነ ሁጲያዉነ ነ ላገቱዋ ኡባዉ ዳጋማ ከሳና። ኡንቱንቱ ኔን ጼልሽን፥ ባረንቱ ሞርከቱዋ ማሻን ዉራና። ይሁዳ አሳ ኡባ ባብሎነ ካትያ ኩሽያን አደ እማና። እ ኡንቱንታ ኦሞዲደ፥ ባብሎነ አፋና፤ አፊደ ያን ማሻን ኡንቱንታ ዎና። 5 ሄዋዳንካ፥ ሀ ካታማ አቁዋ ፔሻ ኡባ፥ ኦ ከሴዳባ ኡባ፥ ዱረተ ኡባነ ይሁዳ ካተቱዋ ሚሻ ኡባ ታን ኡንቱንቱ ሞርከቶ አደ እማና። ኡንቱንቱ ኡንቱንታ ቦንቂ ኦይቂደ፥ ባብሎነ አፋና። 6 ቃይ ኔን ፓሽሁርካ ነ ሶን ደእያ አሳይ ኡባይ ኦሞደቲደ፥ ባብሎነ ባና። ኔን ትምቢትያ ኦዴዳ ነ ላገቱዋ ኡባናካ ያን ሀይቃናነ ያን ሞገታና’ ያጌ" ያጌዳ።

ኤርማስ ጾሳዉ ማጋኔዳ

7 አቤት መና ጎዳዉ፥ ኔን ታና ጭማዳ፤ ታንካ ጭመታድ። ኔን ታፐ ምናደ፥ ታና ጾናዳ። ጋላሳ ኩመን ታን አሳይ ሚጭያዋ ከሳድ፤ ኡባይ ታና ቅሊጬ። 8 ታን ሃሳይያ ዎድያን ኡባን ቂሳደ፥ "ማካላባይነ ባሻይ ጋኬዳ" ያጋደ ዋሳይ። መና ጎዳ ቃላይ ታዉ ጋላሳ ኩመንን ካያነ ቅሊጩዋ አሄዳ። 9 ታን፥ "ታን ጾሳባ ደንደ ሃሳይከ" ዎይ፥ "አ ሱንን ላኤን ኦድከ" ጎፐ፥ ጾሳ ቃላይ ታ መቀ ግዶን ቁምኤቲደ፥ ኤጽያ ታማ ማላ ግዲደ፥ ታ ዎዛናን ምቼ። ታን ግዶን ኦይቃደ አሻና ጋደ ዳቡራድ፤ ሽን ተአናዉ ዳንዳያበይከ። 10 ታን ዳሮ ሳሱከ ስሳድ፤ "ያን ሃን ዳጋማይ ደኤ! አነ አ ሞትተ! ኑንካ አ ሞቶይተ" ያጊኖ። ታዉ ማታ ላገቱ ኡባይ ታ ኩንደ ናጊደ፥ "ኦን ኤሪ፥ ኑን አ ኦይቃና ማላነ ኑ ሀሉዋ ከሳና ማላ፥ እ ጭመታናዉ ዳንዳዬ" ያጊኖ።

11 ሽን መና ጎዳይ ያሽስያ ቶራንቻዳን ታናና ደኤ። ሄዋ ድራዉ፥ ታና የደርስያዋንቱ በታና፤ ኡንቱንቱ ታና ጾንክኖ። ኡንቱንቶ ጊገና ድራዉ፥ ኡንቱንቱ ዎልቃማ ዬላ ዬላታና። ኡንቱንቱ ካዉሻይ ሙለካ ዶገተና። 12 አቤት ኡባፐ ዎልቃማ መና ጎዳዉ፥ ጽሎቱዋ ፓጭያዎ፥ ዎዛና ካሃ በእያዎ፥ ኔን ታ ሞርከቱዋ ቦላን ታ ሀሉዋ ከሳደ ታና በሳ። አያዉ ጎፐ፥ ታን ታ ሞቱዋ ነዉ አድ።

13 መና ጎዳዉ የጽተ! መና ጎዳ ጋላትተ! አያዉ ጎፐ፥ እ ህዬሳቱዋ ኢታቱዋ ኩሽያፐ አሼ።

14 ታን የለቴዳ ጋላሳይ ሸቀቴዳዋ ግዶ!✝20:14-18 ኢዮባ 3:1-19 ታ አታ ታና የሌዳ ጋላሳይ አንጀቶፖ! 15 ታ አዎ፥ "ነዉ ምሽራቾ፤ ነዉ አቱማ ናአይ የለቴዳ!" ያግ ኦዲደ፥ ዳሮ ናሸቼዳ ብታኒካ ሸቀቴዳዋ ግዶ! 16 ሄ ብታኒ መና ጎዳይ ቃረተናን አ የጊደ ይሴዳ ካታማቱዋዳን ሀኖ። ሄ ብታኒ ዎንታ ዋሱዋ፥ ጋላሳ ሴታን፥ "ኦላይ ጋኬዳ!" ግያ ኦዱዋ ስሶ። 17 አያዉ ጎፐ፥ ታ አታ ታዉ ዱፎ ግዳና ማላነ እ ኡሉካ ታና ዎጋ ኦይቂ ኡታና ማላ፥ ታና ኡሉዋን ዎቤና። 18 ታን መቱዋነ ካዩዋ በአናዉነ ላይ ኡባ ዬላታደ ዉርሳናዉ፥ አያዉ ታ አት ኡሉዋፐ ከሳድታሻ?