ኤርማሳ 48

ሞኣባ ፕርዳ

1 ሞኣባ ቢታ ጼልያዋን ኡባፐ ዎልቃማ መና ጎዳይ፥ እስራኤልያ ጾሳይ ሀዋዳን ያጌ፤✝48:1-47 ኢሳ. 15:1—16:14፤ 25:10-12፤ ህዝ. 25:8-11፤ አሞጻ 2:1-3፤ ሶፎ. 2:8-11 "ናቦ ካታማዉ አየ አና! አያዉ ጎፐ፥ እ ባያና። ቅርያታይማ ካታማይ ካዉሻናነ ኦሞደታና፤ ኡንቱንቱ ጌሱካ ካዉሻናነ መኤረታና። 2 ሀዋፐ ህን ባጋን ሞኣባ ጬቁ ያና። አያዉ ጎፐ፥ ሀሰቦና ካታማን ደእያ አሳይ ሞኣባ ቦላ፥ ‘ሃይተ! ሄ ቢታ አነ ኡባና ይሴቶ’ ያጊደ ኢታባ ማቀቴዳ። ኔኖ፥ ማድሜና ካታማትዉ፥ ኔናካ ስርጵ ኦና፤ ነ ጌዱዋ ኦላይ ካላና።

3 "ሆሮናይማ አሳይ፥ ‘ላለይነ ዎልቃማ ባሻይ ጋኬዳ’ ያጊደ ዋስያ ዋሱዋ ስስተ! 4 ሞኣበ መኤረታና፤ አ ናናቱ ዬክያ ዬኩዋ ስስተ! 5 ኡንቱንቱ ዬኪደ፥ ሉሂታ ፑደ ከሳና፤ ሆሮናይማ ዱገካ ባሻዉ ዋስያዋንቱ ዋሱዋ ስሲደ ዎና። 6 ኡንቱንቱ እቱ እቱዋ፥ ‘ባቃትተ! ህንተ ሸምፑዋ አሽተ!’ መላ ደምባን ደእያ አሮኤራ ካታማ ማላ ግድተ። 7 ኔኖ፥ ሞኣባ ቢታዉ፥ ኔን ነ ዎልቃንነ ነ ዱረተን ጬቀቴዳ ድራዉ፥ ኔንካ ኦሞደታና። ቃይ ካሞሻ ግያ ጾሳይካ ባረ ቄሳቱ ዋነ ባረ ሞድያዋንቱና እትፐ ኦሞደቲደ፥ ሀራሳ ባና። 8 መና ጎዳይ ኦዴዳዋዳን፥ ካታማቱዋ ኡባ ይስያዌ ያና፤ እት ካታምነ ደኤና፤ ዎምባይነ ደምባይ ኡባይ እትፐ ያና። 9 ሞኣባዉ እ ፓሊደ አትያ ቀፍያ እምተ። አ ካታማቱ ኡባይ አይነ ባይናዋ ግዳና፤ እት አሳይነ ኡንቱንቱን ደኤና።

10 "መና ጎዳ ኦሱዋ ሸነኮ ጊደ ኦያ ኡራይ ሸቀቴዳዋ ግዶ! ጾሳይ አዛዝ ዎና፥ ሱ ጉሰናዳን ባረ ማሻ ተእያ ኡራይካ ሸቀቴዳዋ ግዶ!

11 "ሞኣበ ያላጋተፐ ዶሚደ፥ እሻሉዋን ደኤዳ አሳ ማላ፤ እ ሀራ ቢታዉ ኦሞደትቤና። ሞኣበ ባፐ ባዉ ትገተናንነ ቃጸናን፥ ማልኡ ላመተናንነ ሳዉ አገናን፥ ኡቲደ ደእያ ዎይንያ ኤሳ ማላ። 12 ሞኣባ አ የግያዋንታ ታን መና ጎዳይ ኪትያ ጋላሳቱ ያና። ኡንቱንቱ አ አ የጊደ፥ ባፐ ጭንግርሳና፤ አ ባ መንሬና። 13 ያትና፥ እስራኤልያ አሳይ ባረ አማነቴዳ፥ ቤቴለን ደእያ ኤቃን ካዉሼዳዋዳን፥ ሞኣባ አሳይካ ባረ ጾሳን ካሞሻን ካዉሻና።

14 "ህንተ፥ ‘ኑን ዎልቃማ አሳነ ምኖ ኦላንቻ’ ጊደ አያዉ ጬቀቲቴ? 15 በእተ፥ ሞኣባ ቢታይነ ያን ደእያ ካታማቱ ባዬድኖ። አ ያላጋ አቱማ አሳቱካ ሹከታናዉ ዱገ ቤድኖ። ታን ካቲ፥ ኡባፐ ዎልቃማ መና ጎዳ ጌተትያዌ ሀዋ ኦዳይ። 16 ሞኣባ ባሻይ ማታቴዳ፤ ቱጋይ አ ቦላን ይያ ዎዲካ ኤሌሊደ ጋኬዳ።

17 "አ ዩሹዋን ደእያ አሳዉ፥ አ ዎጋተካ ኤርያ ኡባዉ፥ ‘ምኖ ግዴዳ ካዉተ ጻምአይ ዋን መኤዴ! ቦንቼቴዳ ጻምአይ ዋን ክንቼቴዴ!’ ያጊደ ዝላልተ።

18 "ህንተኖ፥ ድቦና ካታማን ደእያዋንቶ፥ ህንተ ቦንቾ ሳኣፐ ዎደ፥ መላ ቢታን ኡትተ። አያዉ ጎፐ፥ ሞኣባ ይስያዌ ህንተ ቦላንካ ያና፤ ህንተ ጌሱዋ ኡባካ ላላና።

19 "አሮኤራ ካታማን ደእያዋንቶ፥ ኦግያ ዶናን ኤቂደ ጼልተ፤ ከስ አኪደ ባቃትያ አቱማ አሳነ ማጫ አሳ፥ ‘አዬ ከሴዳዌ?’ ያጊደ ኦችተ።

20 "ኡንቱንቱ፥ ‘ሞኣበ መኤዳ ድራዉ ካዉሼዳ፤ አዉ ዬክተነ ዝላልተ! ሞኣበ ባዬዳዋ አርኖና ሻፋ ላንቂያን አዋይተ!’ ያጊደ ዛራና።

21 "ገዝያን ደእያ ሆሎና፥ ያህጻ፥ መፋኣታ፥ 22 ድቦና፥ ናቦ፥ ቤት-ድብላታይማ፥ 23 ቅርያታይማ፥ ቤት-ጋሙላ፥ ቤት-ማኦና፥ 24 ቅርያታነ፥ ቦጽራ ጌተትያ ካታማቱዋ ቦላንነ ማታንነ ሃኩዋን ደእያ ሞኣባ ካታማቱዋ ቦላን ፕርዳይ ዬዳ። 25 ሞኣባ ካጪ ቃንጸቴዳ፤ አ ቀሲካ መኤዳ።

26 "መና ጎዳ ቦላን ኦቶረቴዳ ድራዉ፥ ሞኣባ ኡሺደ ማይተ። ባረ ጮሼዳ ጮሻ ቦላን ጎንዶረቶ፤ አሳይ ኡባይካ አ ቦላን ቅሊጮ። 27 ካሰ ኔን እስራኤልያ ቦላን ቅሊጫበይኪ? አባ ሃሳይያ ዎደ፥ ኔን ካደ ሁጲያ ቃዳዌ እስራኤሊ ካይሶቱዋ ግዶፐ ኦይቀቲኔየ?

28 "ህንተኖ፥ ሞኣባን ደእያዋንቶ፥ ካታማፐ ከስ ቢደ፥ ሹቻ ጎንጎሉዋ ግዶን ደእተ። አፉዋ ዶናን ባረ ጎልያ ኬጽያ ሀራጳት ማላ ግድተ። 29 ሞኣበ ሎይ ኦቶረቴዳ፤ ሞኣባ አሳይ አይ ኬሻ አይንቶ፥ አሌቅንቶነ ኦቶረትንቶ፥ ቃይ ባረንታ ኡንቱንቱ አይ ኬሻ ቂስ ዎደንቶ፥ ታን ስሳድ። 30 ታን መና ጎዳይ ኡንቱንቱ አሌቁዋ ኤራይ፤ ሽን አይነ ማደና፤ ኡንቱንቱ ጬቁካ አያካ ኦና። 31 ሄዋ ድራዉ፥ ታን ሞኣባዉ ዋሳይ፤ ቂርሄሬሳ አሳዉካ ካዮታደ ዬካይ።

32 "ህንተኖ፥ ሲብማ አሳዉ፥ ያእዜራ አሳዉ ዬክያዋፐ አደ ታን ህንተዉ ዬካይ። ህንተ ታሺ ዳሺደ፥ ማጽያ አባ ፕኒደ፥ ያእዜራ ጋኬዳ ዎይንያ ቱራ ማላ፤ ሽን ህንተ ኦፍን ቴራነ ህንተ ዎይንያ ዉርጩዋ ቦንቂያዋንቱ ዪደ ይስድጌድኖ። 33 ሎኦ ካይ አይፍያ ሞኣባ ቢታፐ ፓሽካይነ ናሸቻይ አከት ክቼዳ። ዎይንያ ቴራ ጉምእያ ሳአቱዋፐካ ዎይንያ ኤሳይ ጎገናዳን ተአ ድጋድ። ኦንነ ላኤን አ እልሊድ ጉምኤና። አሳ ኮሻይ ስሰቶፐካ፥ ናሸቻ ኮሻ ግደና።

34 "ኡንቱንቱ ሀሰቦናንነ ኤልኣለን ዋስያ ዋሱ ያሃጻ ጋካናዉ ስሰቴ። ቃይ ጾኣሮፐ ቢደ፥ ሆሮናይማነ ኤግላት-ሻሊሽያ ጋካናዉ ስሰቴ። ሀራይ አቶ ንምሪማ ሃይካ መሌዳ።

35 "ታን ሞኣባን አሳይ ጎይንያ ቃ ሳአቱዋን ያርሽያዋንታ ባረንቱ ጾሳቶ እጻና ጩዋይያዋንታ ይሳና። ታን መና ጎዳይ ሀዋ ኦዳይ። 36 ኡንቱንቱ ካሰ ደሜዳ ዱረተይ ኡባይ ሀእ ይክቼዳ ድራዉ፥ ታ ዎዛናይ ሞኣባዉነ ቂርሄሬሳ አሳዉ ባልያን ህጽጽያን ዬክያዋዳን ዬኬ። 37 ኡንቱንቱ ኡባይ ባረንቱ ሁጲያነ ባረንቱ ቡቻ ሜዴድኖ፤ ባረንቱ ኩሽያካ ቃንጺደ ማዱድኖ፤ ቃይ ባረንቱ ጼሳንካ ማቃ ዳንጬድኖ። 38 ሞኣባን ደእያ ጎልያ ሁጲያ ኡባንነ ዳባባን ዬኩዋፐ አትና፥ ሀራባይ ባዋ። አያዉ ጎፐ፥ ሞኣባ ታን ኦንነ ኮየና ኦቱዋዳን መንድ። ታን መና ጎዳይ ሀዋ ኦዳይ።

39 "ሞኣበ አይ መኡዋ መኤዴ! አ አሳይነ አይ ዋሱዋ ዋስ! ሞኣበ ዬላቲደ፥ ባረ ዞክያ ዎራ አይ ዛሩዋ ዛሪ! ሄዋ ድራዉ፥ ሞኣበ ባረ ዩሹዋን ደእያ ኡባቶ ሚጭያዋነ ዳጋምያባ ግዴዳ" ያጌ።

40 መና ጎዳይ ሀዋዳን ያጌ፤ "አርጋንይ ባረ ቀፍያ ፕድ ኦ ፓሊደ ይያዋዳን፥ ሞርኪ ሞኣባ ቦላን ያና። 41 አ ካታማቱ ኦይቀታና፤ አ ጌሳቱካ አከታና። ሄ ጋላስ ሞኣባ ምኖ ኦላንቻቱዋ ዎዛናይካ ኦይይ ኦይቄዳ ማጫ ምሽራት ዎዛና ማላ ግዳናዋ። 42 ሞኣበ ታ ቦላን፥ መና ጎዳ ቦላን ማካሌዳ ድራዉ ያና፤ ሀዋፐ ስንዉ እ ካዉተ ግደና።

43 "ህንተኖ፥ ሞኣባን ደእያዋንቶ፥ ያሽያዌ፥ ኦላይነ ጲሪ ህንተና ናጌ። ታን መና ጎዳይ ሀዋ ኦዳይ። 44 ያሽያዋፐ ባቃቲደ ዎጽያ ኦንነ ኦላን ኩንዳና፤ ቃይ ኦላፐ ፑደ ከስያ ኦንነ ጲርያን ኦይቀታና። አያዉ ጎፐ፥ ታን ሞኣባ ሙርያ ዎድያን ሄዋ ኦና። መና ጎዳይ ሀዋ ኦዳይ።

45 "ባቃቲደ ቤዳዋንቱ ዎልቃ ዪደ፥ ሀሰቦና ካታማ ኩዋን ኤቄድኖ። አያዉ ጎፐ፥ ሀሰቦና ካታማፐ ታማይ፥ ቃይ ካቲ ስሆን በን ደኤዳ ጎልያፐ ላጩ ከሲደ፥ ሞኣባ ቢታ ኡባነ አን ደእያ ማካላንቻ አሳ ማና። 46 ሞኣባ አሳዉ፥ ህንተዉ አየ አና! ካሞሻ ግያ ጾሳዉ ጎይንያዋንቱ ዬድኖ፤ ኡንቱንቱ አቱማ ናናቱነ ማጫ ናናቱ ኦሞደቲደ ቤድኖ።

47 "ግዶፐነ፥ ዉርሰ ዎደቱዋን ታን ሞኣባ አሳዉ ዛራደ ሳኣ እሻልሳና። ታን መና ጎዳይ ሀዋ ኦዳይ" ያጌ።

ሞኣባ ቦላ ኦደቴዳ ትምቢቲ ሀዋን ዉሬዳ።