ኤርማሳ 52

የሩሳላመ ኩንደባዉ ኪተቴዳ ጉጃ ኦዱዋ

1 ሰደቅያስ ካተትያ ዎደ፥ ላይይ አዉ ላታማነ እታ፤ የሩሳላመን እ ታማነ እት ላይ ካተቴዳ። አ አት ሱንይ ሀሙጻሎ፤ አ ሊብና ካታማን ደእያ ኤርማሳ ናቶ። 2 እዮአቄም ኦዳዋዳን፥ ሰደቅያስካ መና ጎዳ ስንን ኢታባ ኦዳ። 3 መና ጎዳይ የሩሳላመ አሳ ቦላነ ይሁዳ አሳ ቦላ ሀንቀቴዳ ድራዉ፥ ዉርሰን ኡንቱንታ ባረ ስንፐ ድጌዳ።

ሰደቅያስ ባብሎነ ካትያ ቦላ ማካሊደ ደንዴ። 4 ሰደቅያስ ካተቴዳ ኡዱፑን ላይ፥ ታማን አግናን፥ ታማን ጋላስ ባብሎነ ካቲ ናቡካዳናጾር ባረ ኦላንቻቱዋ ኡባ አክ ዪደ፥ የሩሳላመ ዶዴዳ። ኡንቱንቱ አ ዩሹዋንካ ቢታ ኬላ ኬሌድኖ።✝52:4 ህዝ. 24:2 5 ሰደቅያስ ካተቴዳ ታማነ እተን ላይ ጋካናዉ፥ የሩሳላመ ካታማይ ዶደቲደ ጋምኤዳ።

6 ሄዋ ጋሱዋን ቢታን ኮሻይ ሱልና፥ ሄ ላይ ኦይደን አግናን፥ ኡዱፑን ጋላሳን፥ ሄ ቢታ አሳዉ ምያባይ ዬዳ። 7 ያን ደእሽን ካታማ ዩሹዋ ግምቢ እት ባጋና ኮለቴዳ። ባብሎነ አሳይ ካታማ ዩይ አደ ናጎፐካ፥ ይሁዳ ካትያ ኦላንቻቱ ሙለ ኡባይ ቃማ ካትያ አታክልትያ ሳኣ አፍያ ኦግያ ኦይቂደ፥ ላኡ ድርሳ ግምበቱዋ እትፐ ጋያ ፐንግያና ከሲደ ባቃቴድኖ። ኡንቱንቱ ዮርዳኖሳ ድልቡዋኮ ስሚደ ቤድኖ።✝52:7 ህዝ. 33:21 8 ሽን ባብሎነ ኦላንቻቱ ካትያ ሰደቅያሳ የደርሲደ፥ እያርኮ ደምባ ጋደ ኦይቄድኖ። አ ኦላንቻቱ ኡባይ አፐ ሻከቲደ ላለቴድኖ።

9 ሄዋፐ ጉይያን፥ ኡንቱንቱ አ ሀማታ ቢታን፥ ርብላ ካታማን ደእያ ባብሎነ ካትያኮ አፌድኖ። ያን ናቡካዳናጾር ሰደቅያሳ ቦላ ፕርዴዳ። 10 ቃይ ሰደቅያሳ ናናቱዋ ሰደቅያስ ጼልሽን፥ ባብሎነ ካቲ ዎዳ። ይሁዳ ካፖቱዋ ኡባካ ኡንቱንቱ ያን ርብላ ካታማን ዎድኖ። 11 ሄዋፐ ጉይያን፥ ሰደቅያሳ አይፈቱዋ ዎጭ ከሲደ፥ ሳንሳላታን አ ቃቺደ፥ ባብሎነ ቢታ አኪደ አፌድኖ። እ ሀይቃና ጋካናዉ፥ ያን ቃሾ ጎልያን አ ዎድኖ።✝52:11 ህዝ. 12:13

ጌሻ ጎሊ ኮለቴዳ

12 ናቡካዳናጾር ባብሎነን ካተቴዳ ታማነ ኡዱፑን ላይን፥ እቼሸን አግናን፥ ታማን ጋላሳን፥ ካትያ ኦሳንቻቱዋፐ እቱ፥ ካትያ ናግያዋንቱ ካፑ ናቡዛራዳን የሩሳላመ ገሌዳ። 13 መና ጎዳ ጌሻ ጎልያ፥ ካትያ ጎልያነ የሩሳላመን ደእያ ኬቱዋ ኡባ ታማን ጹጌዳ፤ ዎልቃማ ጎልያ ግያ ጎልያ ኡባ ጹጌዳ።✝52:13 1 ካታ. 9:8 14 ባብሎነ ኦላንቻቱ ኡባይ ካትያ ናግያዋንቱ ካፑዋ አዛዙዋን፥ የሩሳላመ ካታማ ዩሹዋን ደእያ ድርሳ ግምቢያ ኡባ ቆሌድኖ። 15 ናቡዛራዳን አማሬዳ ህዬሳቱዋ፥ ካታማን አቴዳ አሳቱዋነ ካዲደ ባብሎነ ኦላንቻቱዋን ጋከቴዳ አሳቱዋ ኩሽያ ሂላ ኤርያ አሳቱዋናካ ጉጂደ፥ ኦሞዶ አፌዳ። 16 ሽን ናቡዛራዳን ህዬሳቱዋፐ አማሬዳዋንታ ዎይንያ ቱራ ቶካናዳንነ ጋድያ ጎሻናዳን፥ ይሁዳን አሼዳ።

17 ባብሎነ አሳቱ መና ጎዳ ጌሻ ጎልያ ስንን ደእያ ናሃስያፐ መዳ ቱሳቱዋ፥ ሚሻቱዋ ዎያ ጋረቱዋነ አኮ-ከርያ መንሬድኖ፤ ናስያ ኡባ ባብሎነ አፌድኖ።✝52:17-23 1 ካታ. 7:15-47 18 ሄዋዳንካ፥ ቃይ ከረቱዋ፥ አካፋቱዋ፥ ጾምፕያ ሻሉዋ ጼራ ፕትያባቱዋ፥ ኩይጻሮቱዋ፥ እጻና ሳነቱዋነ ያርሽያ ዎደ ጎኤትያ ናሃስያ ሚሻቱዋ ኡባ አክ አፌድኖ። 19 ካትያ ናግያዋንቱ ካፑ ናቡዛራዳን ቃይካ ዎርቃፐነ ብራፐ ኦሰቴዳ ድስተቱዋ፥ ታማ አክያ ሚሻቱዋ፥ ኩይጻሮቱዋ፥ ከረቱዋ፥ ጾምፕያ ዎያ ባላቱዋ፥ እጻና ሳነቱዋነ ኡሻ ያርሾ ጎኤትያ ኦቶቱዋ አክ ቤዳ። 20 ካቲ ሶሎሞን መና ጎዳ ጌሻ ጎልያን ኦሰትያባቶ መዳ ላኡ ቱሳቱ፥ አባ ጋጳቲ፥ አፐ ጋርሳና ደእያ ታማነ ላኡ ኮሩማቱዋ ምስለቱነ ሚሻቱዋ ዎያ ጋረቱ መቴዳ ናሃስያ ብራታቱ ሚዛናን ልካናዉ ዳንዳየተናዋ ኬሻ ዳራ። 21 ላኡ ቱሳቱካ እት ማላ ግዲደ፥ እቱ እቱ ታማነ ሆስፑን ዋ አዱሳ። ኡንቱንቱ ጼሳ ዩሹ ታማነ ላኡ ዋ። ኡንቱንቶ ግዱ ኮፋ ግዲደ፥ ብራታይ ኦይዱ ብራያ ኬሻ ኦርዶ። 22 ላኡ ቱሳቱዋ ሁጲያንካ ናሃስያፐ ኦሰቴዳ ጉምቦቱ ደኢኖ። እት ጉምቡዋ ጌሳይ እቼሹ ዋ ግዲደ፥ ዩሹ ግትያ ምስልያንነ ሮማንያ ቴራ ምስልያን አሌቀት ኡቴዳ። ላኤን ጉምቡካ አ ማላ። 23 ጉምቦቶ ምይያን ምይያን ደእያ ሮማነቱዋ ምስለቱ ኡዱፑን ታማነ ኡሱፑና፤ ዩሹዋን ደእያ ግትያ ማላትያ ምስለቱዋፐ ቦላ ባጋና ደእያ ሮማንያ ምስለቱ ኡባና እት ጼታ።

ይሁዳ አሳይ ኦሞደቲደ ባብሎነ ቤዳ

24 ካትያ ናግያዋንቱ ካፑ ናቡዛራዳን ቄስያ ኡባቱዋ ካፑዋ ሳራያ፥ አፐ ካልያ ቄስያ ጻፋንያነ ፐንግያ ናግያ ሀራ ሄዙ አሳቱዋ ኦይቄዳ። 25 ቃይ ሄ ዎደ ጋካናዉ፥ ካታማን ደእያ አሳፐ ኦላ ጋዳዋ፥ ካትያ ዞርያዋንቱፐ ላፑን አሳቱዋ አፌዳ። ኦላ ጋዳዋ ጻፍያ፥ ሄዌነ ኦላንቻቱዋ አሳ ግዶፐ ቆሪደ ከስያዋነ ሀራ ኡሱፑን ታሙ ዎልቃማ አሳቱዋ አፌዳ። 26 ካፑ ናቡዛራዳን ኡንቱንታ ኡባ አኪደ፥ ባብሎነ ካትያኮ፥ ርብላ ካታማ አፌዳ። 27 ያን ርብላ ካታማን፥ ሀማታ ቢታን ባብሎነ ካቲ ኡንቱንታ ኡባ ዎዳ። ሄዋዳን ሀኒደ፥ ይሁዳ አሳይ ባረ ቢታፐ ደንዲደ፥ ኦሞዶ ቤዳ።

28 ናቡካዳናጾር ካተቴዳ ላፑን ላይን ሄዙ ሻአነ ላታማነ ሄዙ አሳ ይሁዳፐ ኦሞዴዳ። 29 ቃይ ታማነ ሆስፑን ላይን ሆስፑን ጼታነ ሀታማነ ላኡ አሳ የሩሳላመፐ ኦሞዴዳ። 30 ናቡካዳናጾር ካተቴዳ ላታማነ ሄዘን ላይን ካትያ ናግያዋንቱ ካፑ ናቡዛራዳን ላፑን ጼታነ ኦይታማነ እቼሹ አሳ ኦሞዴዳ። አሳ ፓይዱ ኡባና ኦይዱ ሻአነ ኡሱፑን ጼታ።

31 ኤዊል-ማሮዳክ ካተቴዳ ላይ ይሁዳ ካትያ ዮኣኪና ቦንቺደ፥ ቃሹዋፐ ብሌዳ። ሄዌ ሀኔዳዌ ዮኣኪን ኦሞደት ቃሸቲደ ቤዳ ሀታማነ ላፑን ላይ፥ ታማነ ላኤን አግናን፥ ላታማነ እቼሸን ጋላሳና። 32 ኤዊል-ማሮዳክ ዮአኪናና ማልኦ ቃላ ሃሳዪደ፥ ባብሎነን ኦሞዱዋን ደእያ ሀራ ካተቱዋ ኡባፐ አደ፥ አ ቦንቼዳ። 33 ሄዋ ድራዉ፥ ዮኣኪን ቃሾ ጎልያን ማዬዳ ማዩዋ ላሜዳ። እ አቴዳ ባረ ደኡዋ ላይ ኡባን ካትያ ማዳፐ ሜዳ። 34 ዮኣኪን ሀይቃና ጋካናዉ፥ ሀች ሀች አዉ ኮሽያባ ኡባ ባብሎነ ካቲ እሜዳ።