ኤርማሳ 21

የሩሳላመ ጾነታናዋ ትምቢቲ ኦደቴዳ

1 ካቲ ሰደቅያስ ማልክያ ናኣ ፓሽሁራነ ማእሴያ ናኣ ቄስያ ሶፎናሳ ሀ ኦሻ ኦቻና ማላ፥ መና ጎዳይ ኤርማሳኮ ኪቴዳ። 2 ኡንቱንቱ፥ "ባብሎነ ካቲ ናቡካዳናጾር ባረ ኦላንቻቱዋና ሀ ካታማ ዩይ አደ ዶዴዳ ድራዉ፥ አነ ኑዉ መና ጎዳ ኦቻ። ኦን ኤሪ፥ መና ጎዳይ በንዋዳን፥ ማላልስያ ኦሱዋ ኑ ድራዉ ኦደ፥ አ ጉየ ዛራነንቶነ" ያጌድኖ።✝21:2 2 ካታ. 25:1-11፤ 2 ኦዱዋ 36:17-21

3 ኤርማስ ኡንቱንቶ ዛሪደ፥ ሀዋዳን ያጌዳ፤ "ቢደ ሰደቅያሳዉ ያግተ፤ 4 መና ጎዳይ እስራኤልያ ጾሳይ ሀዋዳን ያጌ፤ ‘ኔን ባብሎነ ካትያናነ ግምቢያፐ ካረና ነ ካታማ ዶድያ አ ኦላንቻቱዋና ኦለትያ፥ ነ ኩሽያን ደእያ ኦላ ሚሻ ታን ጉየ ነ ቦላ ዛራና። ቃይ ኡንቱንታ ኡባካ ሀ ካታማትዉ ግዶ ገልሳና። 5 ታን ታ ሁጲያን የዴዳ ኩሽያን፥ ዎልቃማ ቀስያን፥ ይሉዋን፥ ሀንቁዋንነ ዎልቃማ ሴራን ኔና ኦላና። 6 ታን ሀ ካታማን ደእያዋንታ፥ አሳካ መህያካ ሾጫና። ኡንቱንቱ ኢታ ሀርግያን ዉራና። 7 ሄዋፐ ጉይያን፥ ይሁዳ ካትያ ሰደቅያሳ፥ አ ኦሳንቻቱዋነ ኢታ ሀርግያፐ፥ ማሻፐነ ኮሻፐ ፓላሄዳ፥ ሀ ካታማ አሳ ኡባ፥ ባብሎነ ካትያ ናቡካዳናጾራዉነ ኡንቱንታ ዎናዉ ኮይያ ሞርከቶ ታን መና ጎዳይ አደ እማና። እ ኡንቱንቱ ቃራ ማሻን ሲፋና። እ ኡንቱንቶ ቃረተና፥ ዎይ ሳሊደ አገና፥ ዎይ ማረና’ ያጌ ያግተ" ያጌዳ።

8 መና ጎዳይ ኤርማሳ፥ "ጉጃደካ አሳዉ ሀዋዳን ያጋደ ኦዳ፤ ጾሳይ ሀዋዳን ያጌ፤ ‘በእተ፥ ታን ህንተ ስንን ደኡዋ ኦግያነ ሀይቁዋ ኦግያ ዎድ። 9 ሀ ካታማ ግዶን ታክያ አሳይ ኦንነ ማሻን፥ ኮሻን ዎይ ኢታ ሀርግያን ሀይቃና። ሽን ካታማፐ ከሲደ ቢደ፥ ካታማ ዶዲደ ኦይቄዳ ባብሎነቶ ባረ ኩሽያ እምያ አሳይ ኦንነ ፓጻ አታናዋ፤ ሄ ኡራይ ባረ ሸምፑዋ ጻላላ አሻና። 10 አያዉ ጎፐ፥ ታን ሀ ካታማዉ ኬካናዉ ግደናን ኢታናዉ ታ ቆፋ ቃቻድ። ባብሎነ ካትያዉ አ አደ እማና፤ እካ ሀ ካታማ ታማን ጹጋና። ታን መና ጎዳይ ሀዋ ኦዳድ’ ያጌ" ያጋ።

11 ቃይካ ይሁዳ ካትያ ጎልያ አሳዉ ሀዋዳን ያጋ፤ መና ጎዳ ቃላ ስስተ! 12 ህንተኖ፥ ዳዊታ ዛረቶ፥ መና ጎዳይ ህንተና ሀዋዳን ያጌ፤ "ዎንትና ዎንትና ሱረ ፕርድተ፤ ቦንቀቴዳዋንታ ኡቁንያዋንቱ ኩሽያፐ አሽተ። ሄዌ ዮፐ፥ ህንተ ኢታ ኦሱዋ ጋሱዋን ታ ሀንቁ ታማዳን ኤጽ ከሳና፤ ኦንነ አ ቶይሰና ያጌ ያጋ" ያጌዳ።

13 መና ጎዳይ ሀዋዳን ያጌ፤ "ኔኖ፥ የሩሳላመ፥ ኔን ደምባን ደእያ ዛላዳን፥ ዛንጋራፐ ፑደ ቁ ጋደ ቤታሳ፤ ሽን ታን ኔናና ኦለታና። ኔን፥ ‘ኦንነ ታ ቦላ ጻለና ዎይ ታ ደኢያሳ ገለና’ ያጋሳ፤ 14 ሽን ታን መና ጎዳይ ኔና ነ ኦሱዋዳን ሙራና። ታን ነ ካተ ጎልያን ታማ ኦይና፤ ነ ዩሹዋን ደእያዋ ኡባ ም ይሳና" ያጌ።