ኤርማሳ 6

የሩሳላመ ሞርክያን ዶደቴዳ

1 ቃይካ ጾሳይ፥ "ህንተኖ፥ ቢንያማ አሳቶ፥ ህንተ ሸምፑዋ አሻናዉ ባቃትተ! የሩሳላመፐ ከስተ! ታቆአ ካታማን ማላካታ ፑንተ! ቤት-ሀካሬማ ግያ ሳን ማላታ በስተ! አያዉ ጎፐ፥ ሁጲሳ ባጋፐ ኢታባይነ ባላ ባሻይ ያና ሀኔ። 2 ታን ሎእያነ ናሸችያ ጽዮነ ካታማቱዋ ይሳና። 3 ሞርከቱ ሄንንቻቱዋዳን ባረንቱ ዉድያ አኪደ፥ አ ቦላ ያና። አ ዩሹዋን ባረንቱ ዱንካንያ ኤሳና፤ ባረንቱ ዉድያነ ባረንቱ ሳኣን ሳኣን ሄማና። 4 ኡንቱንቱ እቱ እቱዋ፥ ‘የሩሳላመና ኦለታናዉ ጊግተ! ደንድተ! አነ ኑን አ ሴታ ጋላስ ኦሌቶ። ሽን አየ አና! ሳአይ ቃሜ፤ ኦማርሳ ኩዋይ አዱቂ አዱቂ ቤ። 5 ሄዋ ድራዉ፥ ደንድተ! አነ ቃማ ኦሌቶ፤ አ ጌሱዋ ላሌቶ’ ያጊደ ማቀቲኖ" ያጌ።

6 ኡባፐ ዎልቃማ መና ጎዳይ ሀዋዳን ያጌ፤ "ምቱዋ ቃንጽተ። የሩሳላመ ግምቢያ ማታን ቢታ ዶሪደ ድድቅተ። ሄ ካታማን ናቁ ኩሜዳ ድራዉ፥ እ ሙረታናዉ በሴ። 7 ኦላይ ባረ ሃ ፑልትያዋዳን፥ እካ ባረ ኢታተ ፑልቴ። ማካላባይነ ባሻባይ አ ግዶን ስሰቴ። ኡባ ገደ አ ሳአይነ ማዱይ ታ ስንን ቤቴ። 8 ኔኖ የሩሳላመ፥ ታን ኔና ሴርያዋ አካ። አከናን እጾፐ፥ ታን ኔፐ ሻከታናነ ነ ቢታ እት አሳይነ ደኤና ባድነ ቢታ ከሳና" ያጌ።

እስራኤልያ አሳ ማካላ

9 ኡባፐ ዎልቃማ መና ጎዳይ ሀዋዳን ያጌ፤ "ዎይንያ ቴራ ማጽያዋዳን፥ እስራኤልያ አሳ አቴዳዋንታ ሎይደ ማጽተ። ዎይንያ ቴራ ቆርያ አሳዳን፥ ህንተ ኩሽያ ዳሻቱዋ ግዶ ላኤንዋካ የድተ" ያጌ።

10 ታን ኦስ ኦዶሻ? ኦና ሴሮሻ? ኦን ስሳንዴሻ? በእተ፥ ኡንቱንቱ ስሰና ማላ፥ ኡንቱንቱ ሀይይ ባረት ኡቴዳ። በእተ፥ መና ጎዳ ቃላይ ኡንቱንቶ ቅሊጭያዋ ግዴዳ፤ ኡንቱንቱ አን ናሸትክኖ። 11 ሄዋ ድራዉ፥ መና ጎዳ ሀንቁ ታናን ኩም ኡቴዳ። ታን ሀ ሀንቁዋ ተአናዉ ዳንዳይከ።

ያትና፥ ጾሳይ ታና ሀዋዳን ያጌ፤ "ታ ሀንቁዋ ኦግያን ደእያ ናናቱዋ ቦላነ ሺቄዳ ያላጋ አሳ ቦላ ትጋ። ማቻቶካ አስናካ፥ ጭም ዉሬዳ አሳካ እ አክ ባና። 12 ታን ሄ ቢታን ደእያዋንቱ ቦላ ታ ኩሽያ የድያ ዎደ፥ ኡንቱንቱ ጎለቱ፥ ኡንቱንቱ ጎሻናካ ኡንቱንቱ ማቼቱዋናካ ኡባይ ሀራቶ እመታና" ያጌ መና ጎዳይ።✝6:12-15 ኤር. 8:10-12

13 ቃይካ ጾሳይ ሀዋዳን ያጌ፤ "ጉይካ ዳሩካ ኡባይ ዎያ ማናዉ ይርገቴ። ትምቢትያ ኦድያዋንቱካ ቄሳቱ ካ ኡባይ አሳ ጭሚኖ። 14 ታ አሳ ማዱ ሳከናባ ጊደ፥ ጉ ልያ ዎኖ። ሳሩ ባይናን፥ ‘ሳሮ፤ ሳሮ!’ ያጊኖ።✝6:14 ህዝ. 13:10 15 ሀ ሸነይያ ኦሱዋ ኦደ፥ ኡንቱንቱ ዬላቴድኖ? ቱይት፥ ኡንቱንቱ ሙለካ ዬላትበይክኖ። ኡንቱንቱ ዬላይ አየንቶካ ኤርክኖ። ሄዋ ድራዉ፥ ኡንቱንቱካ ኩንዴዳዋንቱ ግዶን ኩንዳና። ታን ኡንቱንታ ሙርያ ዎደ፥ ኡንቱንታ ካዉሻና" ያጌ መና ጎዳይ።

16 መና ጎዳይ ሀዋዳን ያጌ፤ "ኦግያን ኤቂደ ጼልተ፤ በን ሎሶቱ ደኢያሳ ኦችተ። ‘ሎኦ ኦጊ ሀቃን ደኢ?’ ያጊደ ኦችተነ አን ሀመትተ። ያቲደ ህንተዉ ሸምፕ አክተ። ያግና ህንተ፥ ‘ኑን ሄ ኦግያን ሀመቶኮ!’ ያጌድታ። 17 ታን ናግያዋንታ ህንተ ቦላ ሱንደ፥ ‘ማላካታይ ፑነትያ ዎደ ስስተ!’ ያጋደ ኦዳድ። ሽን ህንተ፥ ‘ኑን ስሶኮ’ ያጌድታ።

18 "ሄዋ ድራዉ፥ ካዉተቶ፥ ስስተ! ማባራቶ፥ ታን ታ አሳ ኦያዋ ኤርተ! 19 ሳኣን ደእያ አሳቶ፥ ሀዋ ስስተ! ታን ኡንቱንቱ ኢታ ቆፋ ድራዉ፥ ኢታባ ሀ አሳ ቦላ አሃድ። አያዉ ጎፐ፥ ኡንቱንቱ ታ ቃላ ስሰናን እጼድኖ፤ ታ ህግያካ ኦል ባሼድኖ። 20 ሳባ ግያ ቢታፐ ዬዳ እጻናይ ዎይ ሃኮ ቢታፐ ዬዳ ሳዊያ ቅማሚ ታዉ አይሴ? ህንተ ጹግያ ያርሹካ አከተና። ህንተ ያርሹ ታና ናሸቼና" ያጌ።

21 ሄዋ ድራዉ፥ መና ጎዳይ ሀዋዳን ያጌ፤ "በእተ፥ ታን ሀ አሳ ስንን በቱዋ ዎና። አዎቱነ ናናቱ እትፐ ኡንቱንቱን በታና። ሾሮቱነ ላገቱ ያና" ያጌ።

ሁጲሳ ባጋፐ ዶድያ ኦላንቻቱዋ

22 ቃይካ መና ጎዳይ ሀዋዳን ያጌ፤ "በእተ፥ ሁጲሳ ባጋ ቢታፐ ኦላንቻቱ ዪኖ፤ እት ዎልቃማ ካዉተይ ሳኣ ጋጻፐ ደንዴ። 23 ኡንቱንቱ ዎንዳፍያነ ቶራ ኦይቄድኖ። ኡንቱንቱ ቃረት ባይናዋንታነ የድ ማረናዋንታ። ኡንቱንቱ ባረንቱ ፓራን ፕሪጽያ ዎደ፥ አባይ ጉምያዋዳን ጉሚኖ። ህንተኖ፥ ጽዮነ ካታማ አሳቶ፥ ኡንቱንቱ ህንተና ኦላናዉ እት አሳዳን ሳልፔድኖ" ያጌ።

24 ኑን ሄ ኦዱዋ ስስና፥ ኑ ኩሺ ህልስ ጌዳ። ምሽራቶ ኦይይ ኦይቂያዋዳን፥ ኑና መቱ ኡንኤዳ። 25 ሾይቃ ከሶፕተ፤ ኦግያናካ ሀመቶፕተ። አያዉ ጎፐ፥ ሞርኪ ማሻ ኦይቄዳ፤ ያና ሃናካ ዳጋንያባይ ደኤ። 26 ሀእ ታ አሳዉ፥ ማቃ ማዪደ፥ ብድንን ጎንዶረትተ፤ ባረ መጽ እት ናአዉ ዬክያዋዳን ሴላ ዬኩዋ ዬክተ። አያዉ ጎፐ፥ ይስያዌ አኬከናን ደእሺና፥ ኑ ቦላ ያና።

27 ጾሳይ ኤርማሳ ሀዋዳን ያጌ፤ "ኤርማሳ፥ ኔን ኡንቱንቱ ኦግያ ጾሞሳና ማላነ ፓጫና ማላ፥ ታን ኔና ብራታ ፓጭያ አሳ ከሳድ፤ ታ አሳካ ፓጨትያ ብራታ ከሳድ። 28 ኡንቱንቱ ኡባይ ዝግር ዩይያ፥ ኦድና አከና ማካላንቻ። ኡንቱንቱ ናሃስያነ ብራታ፤ ኡንቱንቱ ኡባይካ ባይዙዋ ኦኖ። 29 ብራታ ቦላን ደእያ ሽኣ ጹጊደ ጌሻና ማላ፥ ዎምፒናይ ዎልቃፐ ዎምፒነቴ። ሽን ጌሻናዉ ዋየቴዳ ዋዪ ኡባይካ መላ፤ ታ አሳ ግዶን ደእያ ኢታቱ ክችበይክኖ። 30 መና ጎዳይ ኡንቱንታ ኦል አጌዳ ድራዉ፥ ኡንቱንቱ ኦለቴዳ ብራ ጌተቲኖ" ያጌ።