ኤርማሳ 30

ጾሳይ ባረ አሳዉ እማና ጌዳ ህዶታ

1 መና ጎዳፐ ኤርማሳዉ ዬዳ ቃላይ ሀዋ። 2 መና ጎዳይ እስራኤልያ ጾሳይ ሀዋዳን ያጌ፤ "ኤርማሳ፥ ታን ነዉ ኦዴዳ ቃላ ኡባ ጻ ማጻፋን ጻፋ። 3 ታ አሳ እስራኤልያነ ይሁዳ ኦሞዱዋፐ ጉየ ዛራደ እሻልስያ ጋላሳቱ ያና፤ ታን ኡንቱንቱ ማይዛ አዋቶ እሜዳ ቢታዉ ኡንቱንታ ዛራና ያጌ መና ጎዳይ፤ ኡንቱንቱካ ላታናዋንታ። መና ጎዳይ ሀዋ ኦዳይ" ያጌ።

4 መና ጎዳይ እስራኤልያ አሳባነ ይሁዳ አሳዋ ኦዴዳ ቃላይ ሀዋ። 5 መና ጎዳይ ሀዋዳን ያጌ፤ "ታን አሳይ ያሻዉ ዋስያ ዋሱዋ ስሳድ፤ ዳጋማ ዋሶፐ አትና፥ ሀዌ ሳሮ ዋሶ ግደና። 6 አነ ላልእተነ ዎችተ! አቱማ አስ ባንኪደ፥ ናኣ የላናዉ ዳንዳዪ? ያትና፥ አቱማ አሳይ ኡባይ ኦይይ ኦይቄዳ ማጫ አሳዳን፥ ባረ ኩሽያን ባረ ኡሉዋ ኦይቃ ደእሽን ታን በእያዌ አዬ? አሳ ኡባ ሶምኢ አያዉ ቶሱ ጌዴ? 7 አየ አና! ሄ ጋላሳይ ኢታ ጋላሳ፤ ሄዋ ማላ ጋላስ ኡባካ ባዋ። ሄ ጋላሳይ ያቆባ ዛረቶ መቶ ዎደ ግዳናዋ። ግዶፐነ ኡንቱንቱ ሄዋፐ አታና" ያጌ።

8 ኡባፐ ዎልቃማ መና ጎዳይ ሀዋዳን ያጌ፤ "ሄ ጋላስ ታን ኡንቱንቱ ሞርግያፐ ሞርገ ም መንና፤ ኡንቱንቱ ቃሸቴዳ ሳንሳላታካ ዱና። ሀዋፐ ስንናዉ አላጋ ቢታ አሳይ ኡንቱንታ አይለየና። 9 ሄዋ አጊደ ኡንቱንቱ መና ጎዳዉ፥ ባረንቱ ጾሳዉ፥ ኦና፤ ታን ኡንቱንቶ ደንያ ካትያ ዳዊተዉ ኡንቱንቱ ሞደታና።

10 "ሄዋ ድራዉ፥ ታ ቆማቶ፥ ያቆባ ዛረቶ፥ ያዮፕተ!✝30:10-11 ኤር. 46:27-28 ህንተኖ፥ እስራኤላቶ፥ ዳጋሞፕተ! ህንተ ሃኮ ሳን ደእሺና፥ ታን ህንተና አሻና፤ ህንተ ዛራቱዋካ ኡንቱንቱ ኦሞደቲደ ቢታፐ የድሳና። ያቆባ ዛረ ስሚደ፥ አየንቶ ቦቼናን ሳሮ ደአና፤ ኡንቱንታ አይ አሳይነ ያሽሰና። ታን መና ጎዳይ ሀዋ ኦዳይ። 11 ታን ህንተና አሻናዉ ህንተናና ደአይ። ታን መና ጎዳይ ሀዋ ኦዳይ። ታን ህንተና ላሌዳዋ ኡባ ኡባና ይሳና፤ ሽን ህንተና ኡባና ይስከ። ታን ህንተና ልከ ፕርዳን ሙራና፤ ሙሩዋ ባይናን ህንተና ኡባና ጮ የድከ" ያጌ።

12 መና ጎዳይ ሀዋዳን ያጌ፤ "ህንተ ደሸይ ፓጸናዋ፤ ህንተ ማዱይካ ኢታ። 13 ህንተ የዉዋን ህንተና ማድያዌ ባዋ፤ ህንተ ማዱይካ ሊ ባዋ፤ ህንተዉ ፓጹ ባዋ። 14 ህንተ ሲቆቱ ኡባቱ ህንተና ዶጌድኖ፤ ኡንቱንቱ ህንተባ ግድክኖ። ህንተና ሞርክያዳን ሾጫድ፤ መቀ ባይና አሳይ ሙሪያዋዳን ሙራድ። አያዉ ጎፐ፥ ህንተ ባይዙ ዳልጌዳ፤ ህንተ ናጋራይካ ዳሬዳ። 15 ሀ ፓጸና ህንተ ደሸዉ አያዉ ዋሲቴ? ህንተ ባይዙ ዳልጊደ ድራዉነ ህንተ ናጋራይ ዳሪደ ድራዉ፥ ሀዋ ህንተ ቦላ ታን ኦይ።

16 "ሽን ህንተና ቢታ ከስ ሜዳ ኡባቱ ሜተታና፤ ህንተ ሞርከቱ ኡባቱካ ኦሞዶ ባና። ህንተና ቦንቄዳዋንቱ ቦንቀታና፤ ህንተባ ኦላን አኬዳዋንቱባካ ኦላን አካና። 17 ታን ህንተዉ ኬክሳና፤ ህንተ ማዱካ ፓና። አያዉ ጎፐ፥ ኡንቱንቱ ህንተና፥ ‘ሀዋንቱ ኦለቴዳዋንታ፤ ጽዮኖ ጊደ ኮይያዌ ባዋ’ ያጊኖ። ታን መና ጎዳይ ሀዋ ኦዳይ" ያጌ።

18 መና ጎዳይ ሀዋዳን ያጌ፤ "ታን ያቆባ ዛራቱዋ ጎልያ ኦሞደቶደፐ ጉየ ዛራደ፥ እሻልሳና፤ ኡንቱንቱ ደእያ ሳአዉካ ቃረታና። የሩሳላመ ካታማይካ ካሰ ባረ ኮለቴድኖ፥ ካትያ ጎሊካ ካሰ ባረ ሳኣን ስሚደ ኬጸታና። 19 ያን ደእያ አሳይ ኡባይ ጋላታ ማዝሙርያነ ናሸቻ የ የጻና። ታን ኡንቱንቱ ፓይዱዋ ዳርሳና፤ ኡንቱንቱ ፓይዱ ላኤን ጉጸና። ታን ኡንቱንቱ ቦንቼቴዳ ደርያ ኦና፤ ኡንቱንቱ ካትክኖ። 20 ኡንቱንቱ ዘረይ በን ዎደ ደኡዋዳን ደአና፤ ኡንቱንቱ ማባራይካ ታ ስንን ምን ኤቃና። ኡንቱንታ ኡንኤያዋንታ ኡባካ ታን ሙራና። 21 ኡንቱንቱ ካፑ ኡንቱንቱ አሳፐ እቱዋ ግዳናዋ፤ ኡንቱንታ ሞድያዌ ኡንቱንቱ ግዶፐ ከሳና። ታን አ ታ ማታ አሀና፤ እ ታኮ ሺቃና። ታን ሺሸናን ደእሺና፥ ጻሊደ ታኮ ሺቃናዉ ዳንዳይያዌ ኦኔ? ታን መና ጎዳይ ሀዋ ኦዳይ። 22 ሄዋ ድራዉ፥ ህንተ ታ አሳ ግዳና፤ ታንካ ህንተ ጾሳ ግዳናዋ" ያጌ።

23 በእተ፥ መና ጎዳ ሀንቁ ጎትያዳን ሀኔ፤ እካ ስርመቲደ፥ ኢታቱዋ ሁጲያን ያና። 24 መና ጎዳይ ባረ ዎዛና ሀልቹዋ ዉርሲደ ፖላና ጋካናዉ፥ አ ኤጽያ ሀንቁ ጉየ ስመና። ሄዋ ጉየፐ ይያ ዎደቱዋን ህንተ አኬካና።