ኤርማሳ 46

1 ካዉተቱዋባ ኦዳናዉ መና ጎዳይ ኤርማሳዉ ኪቴዳ ቃላይ ሀዋ።

ግብጼ ፕርዳ

2 እዮስያሳ ናአይ እዮአቄም ይሁዳን ካተቴዳ ኦይደን ላይን፥ ኤፍራጺሳ ሻፋ ማታን፥ ካርካሚሻ ግያ ሳኣን፥ ባብሎነ ካቲ ናቡካዳናጾር ጾኔዳ ግብጼ ካትያ ናኮ ኦላንቻቱዋባ ጾሳይ ሀዋዳን ያጌ፤✝46:2-26 ኢሳ. 19:1-25፤ ህዝ. 29:1—32:32 3 "ህንተ ዎጋ ጎንዳልያነ ቄር ጎንዳልያ ጊግስተ፤ ኦላዉ ሳልፕተ! 4 ህንተ ፓራ ብጻሊደ ቶግተ፤ ህንተ ሁጲያን ብራታ ቆብያ ዎደ፥ ህንተ ሳኣ ሳኣ ኦይቂተ! ህንተ ቶራ ሌፍተ፤ ህንተ ኦላ ማዩዋካ ማይተ! ያጊኖ።

5 "ሽን ሀዌ ታን በእያዌ አዬ? ግብጼ ኦላንቻቱ ያዪደ፥ ጉየ ስሜድኖ። ዎልቃማቱ ጾነቴድኖ፤ ጉየነ ጼለናን ኤሌሊደ ባቃቴድኖ። ኡንቱንቱ ዩሾ ኡባን ዳጋማይ ደኤ! መና ጎዳይ ሀዋ ኦዳይ። 6 ኤሌሊደ ዎጽያዋንቱ ከስ አካናዉ ዳንዳይክኖ፤ ምኖ ኦላንቻቱካ አታናዉ ዳንዳይክኖ። ሁጲሳ ባጋ ቢታን፥ ኤፍራጺሳ ሻፋ ማታን ኡባይካ በቲደ ኩንድ አጊኖ።

7 "ሄዌ ናይለ ሻፋይ ኩሚደ፥ ዩሹዋ ኡባ ኩምያዋዳን፥ ቢታ ኡባ ኩሜዳዌ ኦኔ? 8 ሄዌ ናይለ ሻፋይ ኩሚደ፥ ዩሹዋ ኡባ ኩምያዋዳን፥ ቢታ ኡባ ኩሜዳዌ ግብጼ! ግብጼ ሀዋዳን ያጌ፤ ‘ታን ክጻደ፥ ቢታን ሳኣን ኤላና፤ ካታማቱዋነ ካታማቱዋን አሳ ኡባ ባይዛና። 9 ፓራቶ፥ ፕሪጽተ! ፓራ ጋረቱዋ ላግያዋንቶ፥ ኤለካ ላግተ! ጎንዳልያ ኦይቄዳ ቶጵያፐነ ሊብያፐ*46:9 ሊብያፐ፦ እብራዌዋን "ፑጻ" ጌተቴ። ዬዳ ኦላንቻቶ፥ ከስተ! ሊድያፐ ዬዳ ዎንዳፍያ ዱከን ሎሄዳ ኦላንቻቶ፥ ዎራጅተ!’ ያጌ" ያጌዳ።

10 ሄ ጋላሳይ ጎዳይ፥ ኡባፐ ዎልቃማ መና ጎዳ ጋላሳ፥ ጾሳይ ባረ ሞርከቱዋ ቦላን ሀሉዋ ከስያ ጋላሳ። አ ማሻይ ካላና ጋካናዉ፥ ኡንቱንታ ማና፤ አላና ጋካናስካ ኡንቱንቱ ሱ ኡሻና። አያዉ ጎፐ፥ ጎዳይ፥ ኡባፐ ዎልቃማ መና ጎዳይ ሁጲሳ ባጋ ቢታን፥ ኤፍራጺሳ ሻፋ ማታን ኡንቱንታ ያርሹዋ ኦደ አካና። 11 ህንተኖ፥ ግብጼ አሳቶ፥ ጋላኣደ ቢታ ቢደ፥ ህንተዉ ኦከትያ ልያ ደምተ። ግዶ ሽን፥ ህንተ ጮ መላ ልያ ዳርሲታፐ አትና፥ ህንተዉ ፓጹ ሙለ ባዋ። 12 ህንተ ዬላ ካዉተቱ ስሴድኖ፤ ህንተ ዬክያ ዬኩዋ ቢታይ ሳአይ ስሴዳ። አያዉ ጎፐ፥ ህንተ ኦላንቻቱ እቱ እቱዋን በቲደ፥ ኡባይ እትፐ ኩንዴድኖ።

ናቡካዳናጾራ ዩሳ

13 ባብሎነ ካቲ ናቡካዳናጾር ግብጼ ቢታ ኦላናዉ ይያ ዎደ፥ መና ጎዳይ ትምቢትያ ኦድያ ኤርማሳዉ ኦዴዳ ቃላይ ሀዋ:✝46:13 ኤር. 43:10-13 14 "ሀዋ ግብጼን ኦዳ፤ ቃይ ግብጼ ካታማቱዋን ምግዶላን፥ መምፕሳንነ ጻፍናሳን አዋያ። ‘ኦላይ ህንተ ዩሹዋን ደእያ አሳ ኡባ ዉርሲድ ደእያ ድራዉ፥ ደንድ ኤቂደ ጊገትተ!’ ያጋ። 15 ህንተ ዎልቃማ ኦላንቻቱ አያዉ ኩንዴድኖ? መና ጎዳይ ኡንቱንታ ሱጌዳ ድራዉ ኩንዴድኖ። 16 ህንተ ኦላንቻቱ በቲደ ኩንዴድኖ። እቱ እቱዋ፥ ‘ደንድተ! ሀ ሞርክያ ማሻፐ አታናዉ፥ ኑ አሳኮ፥ ኑ ቢታ አነ ስሜቶ’ ያጊኖ። 17 ኡንቱንቱ ያን ግብጼ ካትያ ፓሮና፥ ‘ባረ ካጫን ጎኤተናን ጮ አያ ኦዳንቻ’ ጊደ ሱንና" ያጌዳ።

18 ኡባፐ ዎልቃማ መና ጎዳ ጌተትያ ካቲ ሀዋዳን ያጌ፤ "ታን ታ ደኡዋን ጫቃይ: ደረቱዋ ግዱዋን ታቦራ ደሪ፥ ዎይ አባ ላንቂያን ደእያ ቃርመሎሳ ደሪ አዱቂያዋዳን አዱቂያ ሞርኪ ህንተ ቦላ ያና። 19 ህንተኖ፥ ግብጼ ቢታን ደእያዋንቶ፥ ኦሞዱዋን ባናዉ ጊግተ። አያዉ ጎፐ፥ መምፒሳ ካታማይ ኮለቲደ፥ ኦንነ ደኤና ባዞ ግዳናዋ።

20 "ግብጼ ቢታይ ሎእያ ኡሳት ማላ፤ ሽን ሁጲሳ ባጋ ቢታፐ ይያ ዱክያ ኡዱንጽያን አ ሳኤታና። 21 ግብጼን ሚሻይ ጭገትያ ኦላንቻቱ ሞዳ ኮሩማቱዋ ማላ። ኤ፥ ኡንቱንቱካ እትፐ ጉየ ስሚደ ባቃቴድኖ፤ ኡንቱንቱ ባረንቱ ሳኣን ኤቂበይክኖ። አያዉ ጎፐ፥ ኡንቱንቱ ባየ ጋላሳይ፥ ኡንቱንቱ ሙረታና ዎዲ ጋክ ክቼዳ።

22 "ሞርከቱ ዎልቃን ገልያ ዎደ፥ ግብጼ አሳይ ባቃትያ ሾሻዳን ሶልዳና፤ ሄ ሞርከቱ ም ቃንጽያ አሳቱዋዳን፥ ካልታ አኪደ፥ አ ቦላ ያና። 23 አሳይ ስጽማ ዎራ ቡደ ይስያዋዳን፥ ግብጼ አሳ ሲፍ ዉርሳና። ታን መና ጎዳይ ሀዋ ኦዳይ። ሞርከቱዋ ፓይዱ ቦልያፐካ ጮራቴ፤ ኡንቱንታ ፓይዳናዉ ዳንዳየተና። 24 ግብጼ አሳይ ካዉሻና፤ ሁጲሳ ባጋፐ ይያ አሳቱዋ ኩሽያንካ አደ እመታና" ያጌ።

25 ኡባፐ ዎልቃማ መና ጎዳይ፥ እስራኤልያ ጾሳይ ሀዋዳን ያጌ፤ "ታን ቴብሳ ካታማ ጾሳ አሞና፥ ግብጼ ካትያ፥ ግብጼ ቢታነ ግብጼ ጾሳቱዋ፥ ግብጼ ካተቱዋነ ግብጼ ካትያን ዘምፕያዋንታ ኡባ ሙራና። 26 ኡንቱንቱ ዎናዉ ኮይያ ባብሎነ ካትያ ናቡካዳናጾራ ኩሽያንነ አ ኦላንቻቱዋ ኩሽያን አደ እማና።

"ሄዋፐ ስምና፥ ግብጼ ቢታይ ካሰዋዳን አሳይ ደእያ ቢታ ግዳናዋ። መና ጎዳይ ሀዋ ኦዳይ።

ጾሳይ ባረ አሳ አሻና

27 "ህንተኖ፥ ታ ቆማቶ፥ ያቆባ ዛረቶ፥ ያዮፕተ!✝46:27-28 ኤር. 30:10-11 ህንተኖ፥ እስራኤላቶ፥ ዳጋሞፕተ! ህንተ ሃኮ ሳን ደእሺና፥ ታን ህንተና አሻና፤ ህንተ ዛራቱዋካ ኡንቱንቱ ኦሞደቲደ ቢታፐ የድሳና። ያቆባ ዛራቱ ስሚደ፥ አየንቶ ቦቼናን ሳሮ ደአና። ኡንቱንታ አይ አሳይነ ያሽሰና። 28 ህንተኖ፥ ታ ቆማቶ፥ ያቆባ ዛረቶ፥ ታን መና ጎዳይ ህንተናና ደእያ ድራዉ፥ ያዮፕተ! ታን ህንተና ላሌዳ ካዉተቱዋ ኡባ ኡባና ይሳና፤ ሽን ህንተና ኡባና ይስከ። ታን ህንተና ልከ ፕርዳን ሙራና፤ ሙራይ ባይናን ህንተና ኡባና ጮ የድከ። ጾሳይ ሀዋ ኦዳይ" ያጌ።