ኤርማሳ 4

ስምተ ግያ ጼሳ

1 መና ጎዳይ ሀዋዳን ያጌ፤ "እስራኤልያ አሳዉ፥ ስሞፐ፥ ሃ ታኮ ስምተ። ህንተ ታን ሸነትያ ህንተ ኤቃቱዋ ታ ስንፐ ድጎፐ፥ ታፐ ዎራ ባና ዮፐነ 2 ህንተ ቱሙዋን፥ ሱረተንነ ጽሎተን፥ ‘መና ጎዳይ ኤሮ!’ ጊደ ጫቆፐ፥ ሄ ዎደ ካዉተቱ አን አንጀታናነ አን ጬቃና" ያጌ።

3 መና ጎዳይ ይሁዳ አሳዉነ የሩሳላመን ደእያዋንቶ ሀዋዳን ያጌ፤ "ህንተ ኦ ቢታ ጎሽተ፤ አጉን ቦላ ዘሮፕተ።✝4:3 ሆሰ 10:12 4 ህንተኖ፥ ይሁዳ አሳቶ፥ የሩሳላመን ደእያዋንቶ፥ ህንተ ህንተ ሁጲያ መና ጎዳዉ ቃጻርተ፤ ህንተ ዎዛና ሾኩዋ ድግተ። ሄዌ ዮፐ፥ ህንተ ኦዳ ኢታተ ድራዉ፥ ታ ሀንቁ ታማዳን ኤጽ ከሳና። አ ኦንነ ቶይሳናዉ ዳንዳየና" ያጌ።

ጾሳይ ሁጲሳ ባጋ ቢታፐ ኢታባ አዬ

5 ጾሳይ ሀዋዳን ያጌ፤ "ይሁዳን ኦድተ። የሩሳላመን፥ ‘ቢታ ኡባን ማላካታ ፑንተ!’ ያጊደ አዋይተ። ህንተ ቃላ ቂሲደ፥ ሀዋዳን ጊደ ዋስተ! ‘እትፐ ሺቅተ! አነ ግምቢ ዩይ አዳ ካታማ ደንድተ!’ ያግተ። 6 አሳይ ጽዮነ ባና ማላ ማላትተ! ህንተዉ ሳሮ አታናዉ ባቃትተ! ጋምኦፕተ! አያዉ ጎፐ፥ ታን ሁጲሳ ባጋ ቢታፐ ኢታባነ ዎልቃማ ባሻ አሀና ሀናይ። 7 ጋሙ ባረ ደእያ ቡራፐ ከስያዋዳን፥ ካዉተቱዋ ይስያዌ ባረ ሳኣፐ ደንዴ። ህንተ ቢታ ይሳናዉ ዬዳ። ህንተ ካታማቱ ባዪደ ኦና ግዳናዋ። 8 ሄዋ ድራዉ፥ ማቃ ማዪደ፥ ‘አዬ! አየ!’ ያጊደ ዝላልተነ ዬክተ። አያዉ ጎፐ፥ መና ጎዳ ሀንቁ ሱልያዌ ኑ ቦላፐ ክችቤና" ያጌ።

9 ቃይካ መና ጎዳይ፥ "ሄ ጋላስ፥ ካትያ ዎዛናይነ ካፖቱዋ ዎዛናይ ያያና። ቄሳቱ ካ ዳጋማና። ትምቢትያ ኦድያዋንቱካ፥ ‘ፖራ!’ ጊደ ዶና ኦይቃና" ያጌ።

10 ታን፥ "ሀእ ኡባ ሞድያ መና ጎዳዉ፥ ማሻይ ኡንቱንቱ ቆያን ዎያ ዎደ፥ ‘ህንተዉ ሳአይ ሳሮ ግዳና’ ያጋደ፥ ሀ አሳነ የሩሳላመ ሎይ ጭሙዋ ጭማዳ" ያጋድ።

11 ሄ ዎድያን ሀ አሳስነ የሩሳላመዉ፥ መና ጎዳይ ሀዋዳን ያጌ ጌተታና፤ "ባዙዋን አያይነ ባይና ቃ ደረቱዋፐ ምችያ ጫርኩ ታ አሳ ቦላ ጫርካና፤ ሽን ሄዌ ካ ሰጻናዉነ ጌሻናሳ ግደና። 12 ሄዋፐ ሎይ ዎልቃምያ ጫርኩ ታ አዛዙዋን ጫርካና፤ ሀእ ታን ኡንቱንቱ ቦላ ፕርዳና" ጌ ጌተታና።

ይሁዳ ቢታይ ሞርክያን ዶደቴዳ

13 በእተ፥ ሞርኪ ሻርያዳን ከሴ። አ ፓራ ጋረቱካ ጎትያ ማላ፤ አ ፓራቱ አርጋንፐካ አ ኤሌሊኖ። አየ አና ኑኖ! ባዋ ዬዶ!

14 ኔኖ የሩሳላመ፥ አታና ማላ፥ ነ ዎዛና ሜጫደ ኢታተፐ ጌሻ ድጋ! ኢታ ቆፋይ ነ ዎዛናን አዉደ ጋካናዉ ጋምአኔ? 15 ዳና ካታማፐነ ኤፍሬማ ደርያፐ ዬዳዋንቱ ኢታባ አዋዪኖ። 16 መና ጎዳይ ሀዋዳን ያጌ፤ "ካዉተቶ ኦድተ፤ የሩሳላምዉካ ሀዋዳን ያጊደ አዋይተ፤ ይሁዳ ካታማቱዋ ቦላን፥ ‘ሃኮ ቢታፐ ኦላ አዋይያ ኦላንቻቱ ይ ደኢኖ፤ 17 እ ታ ቦላ ማካሌዳ ድራዉ፥ ጋደን ደእያ ካ ናግያዋንቱዳን፥ ሄ ኦላንቻቱ ይሁዳ ዩሹዋን ዩይ አኖ’ ያግተ" ያጌ።

18 ይሁዳ አሳቶ፥ ህንተ ሀኑነ ህንተ ኦሱ ሀዋ ኡባ ህንተ ቦላ አሄዳ። ሀዌ ህንተዉ ሙሮ። እ አይ ኬሻ ጫምያቤ! ህንተ ዎዛና አይ ኬሻ ጫድያቤ!

ኤርማስ ባረ አሳ ግሻዉ ዝላሌዳ

19 አየ ታኖ! ታን ሀዋ ዎታ ዳንዳያኔ! አየ ታ ዎዛናዉ! ታ ዎዛናይ ድድቄ፤ ታን ጮኡ ጋናዉ ዳንዳይከ። አያዉ ጎፐ፥ ታን ማላካታ ፑኑዋነ ኦላ ዋሱዋ ስሳድ። 20 ኢታባይ ኢታባ ካሌ፤ ሙለ ቢታይ ባዬዳ። ታ ዱንካነቱነ ጋርዳቱ ኤለካ ዬድኖ። 21 አዉደ ጋካናዉ ኦላ ማላታ ጼላኔነ ማላካታ ፑኑሳ ስሳኔ?

22 ጾሳይ ሀዋዳን ያጌ፤ "ታ አሳይ ቦዛ፤ ኡንቱንቱ ታና ኤርክኖ። ኡንቱንቱ ቆፍ ባይና ናናቱዋ፤ ኡንቱንቶ አኬክ ባዋ። ኡንቱንቱ ኢታባ ኦናዉ ኤራንቻ፤ ሽን ሎኦባ ኦናዉ ኤርክኖ" ያጌ።

ኤርማስ በኤዳ ሳፃ

23 ታን ሳኣ ጼላድ፤ ሳአይ ጊግቤናዋነ አያይነ ባይና መላ ግድያዋ በኣድ። ቃይ ሳሎቱዋ ጼላድ፤ ኡንቱንቱን ፖኡ ባይናዋ በኣድ። 24 ደረቱዋ ጼላድ፤ ኡንቱንቱ ቃጽያዋነ ዞዘቱ ኡባይ ጉየነ ስንዉ ጋጅ ጋጅያዋ በኣድ። 25 ታን ጼላድ፤ ሽን አይ አሳነ በአበይከ፤ ሳሉዋ ካፎቱካ ኡባይ ፓሊደ ባቃቴድኖ። 26 ጼላድ፤ አራዳ ቢታይ መላ ግዴዳዋ በኣድ፤ መና ጎዳ ስንን፥ አ ሱሎ ሀንቁዋ ስንን ሄ ቢታ ካታማቱካ ዮደቴድኖ።

27 መና ጎዳይ ሀዋዳን ያጌ፤ "ሙለ ቢታይ ባያና፤ ሽን ታን አ ዉርሳ ይስከ። 28 ሄዋ ድራዉ፥ ሳአይ ዬካና፤ ሳሎቱካ ቦላን ማና። አያዉ ጎፐ፥ ታን ጋ ድጋድ፤ ማርሰትከ። ታን ቆፋ ቃቻ ክቻድ፤ አግከ" ያጌ።

29 ፓራ አሳቱነ ዎንዳፍያ አሳቱ ጋርማሙዋን፥ አሳይ ካታማ ኡባፐ ባቃታና። ባጋቱ ዎጺደ ዎራ ጋርሳ ገልና፥ ባጋቱ ቃይ ዛላ ሽቢኖ። ካታማይ ኡባይ ኦኒደ፥ ደእያ አሳ ዬዳ።

30 ኔኖ፥ ባያ ክቼዳኔ፥ ኔን አይ ኦይ? ነ ዞኦ ማዩዋ አያዉ ማያይ? ዎርቃ አሌቁዋ አያዉ ዎይ? ነ አይፍያ ስጲን አያዉ ኦካይ? ኔን ጮ መላ ኔና ሎይዳ። ነ ላገቱ ኔና ካድኖ፤ ኡንቱንቱ ኔና ዎናዉ ኮዪኖ። 31 ታን የሉዋ ኦይቀቴዳ ምሽራታ ዋስያዋ ማላ ዋሱዋ ስሳድ። እ ዋሱ ኮይሮ ናኣ የልያ ማጫ ምሽራት ኦልያ ማላ። ሄ ዋሱ፥ የሩሳላማ ሸምፑዋ ተኤታደ፥ ባረ ኩሽያ ምጫደ፥ "አየ ታኖ! ሄኮ ታና ዎናዉ ሀኒኖ!" ያጋደ ዋስያ ዋሱዋ።