ኤርማሳ 17

ይሁዳ ናጋራነ ሙሩዋ

1 ጾሳይ ሀዋዳን ያጌ፤ "ይሁዳ ናጋራይ ብራታ ቢርያን ጻፈቴዳ፤ ኡንቱንቱ ዎዛና ቦላነ ኡንቱንቱ ያርሽያሳን ደእያ ካጭያ ቦላ አልማዝያ ግያ ሹቻ ጼራን ቃጨቲደ ጻፈቴዳ። 2 ኡንቱንቱ ናናቱ እርጻ ም ኡባ ጋርሳን፥ ቃ ዞዘቱዋ ቦላንነ ቢታን ደእያ ደረቱዋ ቦላን፥ ጊግሴዳ ያርሽያ ሳአቱዋን አሼሮ ግያ ጾሳትዉ ኤሴዳ ምስልያዉ ጎይኒኖ። 3 ህንተ ቢታ ኡባ ቦላን ኦዳ ናጋራ አጮ ጭጋ ኦደ፥ ህንተ ሚሻነ ህንተ አቆቱዋ ኡባ ታን ህንተ ሞርከቶ እማና። 4 ታን ህንተና ላትሴዳ ቢታፐ ህንተ ባና፤ ታን ህንተና ህንተ ኤረና ቢታን ህንተ ሞርከቶ አይለያና። አያዉ ጎፐ፥ ህንተ ታ ሀንቁዋ ኦይሰድታ፤ እ መናዉ ኤጻና" ያጌ።

ዱማ ዱማ ሌምሳቱዋ

5 መና ጎዳይ ሀዋዳን ያጌ፤ "አሳን፥ ሀይቂያ አሳ ዎልቃን አማነትያዌነ ባረ ዎዛና መና ጎዳፐ ዎራ ዛርያዌ ሸቀቴዳዋ። 6 ሄ አሳይ ባዙዋን ዶሌዳ ሱፓ ም ማላ። ኬካባይ ይያ ዎደ በኤና። እ ባዙዋን፥ መላ ሳኣን፥ አሳይ ደኤና ማጽነ ቢታን ደአና።

7 "መና ጎዳን አማነትያ አሳይ፥ እ አማነትያዌ ጾሳ ግድያ አሳይ አንጀቴዳዋ። 8 እ ሃ ማታን ቶከቲደ፥ ባረ ጻጱዋ ጎግያ ሃዉ የዴዳ ም ማላ።✝17:8 ማዝ. 1:3 አዋ ሱሎካ እ ያየና። አያዉ ጎፐ፥ ሄ ም ሀይይ እርጽ እርጻሽን ደኤ። እራይ ቡከና ላይንካ ህርገና፤ አይፍያ አይፍያዋካ ቃንጸና።

9 "አሳ ዎዛናይ ኡባባፐ አ ጭምያዋነ ሎይ ኢታ። አ ኦን ኤራናዉ ዳንዳዪ? 10 መና ጎዳይ አሳዉ ኡባዉ አ ኦግያዳንነ አ ኦሱዋዳን ዛራናዉ፥ አሳ ዎዛና ብዳይነ አ ካሃ ፓጫይ" ያጌ።✝17:10 ማዝ. 62:12፤ ሳፃ 2:23

11 ጽለና ኦግያና ዱረትያ አሳይ ባረዋ ግደና ቁቁልያ ቆጽያ አካት ማላ። እ ባረ ላይ ብሮ ባጋዪደ፥ አ አጊደ ያና፤ ዉርሰን እ ቦዛ ግዳናዋ።

12 ኑ ጌሻ ጎሊ ኮይሮፐ ዶሚደ፥ ቦንቾ ካተቱዋ አራታዳን፥ ቃ ደርያ ሁጲያን ቤቴ። 13 አቤት መና ጎዳዉ፥ እስራኤሊ ህዶታን ናግያዎ፥ ኔና አጌዳ ኡባቱ ዬላታና። ኔና አጊደ ዎራ ብያዋንቱ፥ ኔና መና ጎዳ፥ ደኡዋ ሃ ፑልቱዋ አጌዳ ድራዉ፥ ኡንቱንቱ ባና ቦላ ጻፈታና።

ኤርማሳ ዎሳ

14 አቤት መና ጎዳዉ፥ ታና ፓ፤ ታን ፓጻና። ታና አሻ፤ ታን አታና። አያዉ ጎፐ፥ ኔን ታን ጋላትያዋ።

15 አሳቱ ታና፥ "መና ጎዳይ ኑና ናሴዳ ናሲ ሀቃን ደኢ? አነ ፖሎ!" ያጊኖ።

16 ሄንንቻ ግዳደ ነዉ ኦያዋ አጋበይከ፤ ኡንቱንቱ መቶታና ጋላሳ ታን አሞታበይከ። ታ ዶናፐ ከሴዳ ቃላ ኔን ኤራሳ። 17 ታና ዳጋንፓ። ኔን መቱዋ ጋላስ ታዉ ባቃታ አትያ ሳኣ። 18 ታና የደርስያዋንታ ዬላያ፤ ሽን ታና ዬላዮፓ። ኡንቱንታ ዳጋን፤ ሽን ታና ዳጋንፓ። ኡንቱንቱ ቦላ መቶ ጋላሳ አያ፤ ኡንቱንታ ላኡ ኩሽያ ሙሩዋ ሙራ።

ሳምባታ ቦንችያዋ

19 መና ጎዳይ ታና ሀዋዳን ያጌዳ፤ "ባ፥ ይሁዳ ካተቱ ካታማ ገልያነ ከስያ አሳይ ገልያ ፐንግያንነ ሀራ የሩሳላመ ፐንገቱዋ ኡባን ባደ ኤቃ። 20 ኡንቱንታ ሀዋዳን ያጋ፤ ‘ህንተኖ ይሁዳ ካተቶ፥ ህንተኖ ይሁዳ አሳቶ፥ ህንተኖ የሩሳላመ አሳቶ፥ ህንተኖ ሀ ፐንገቱዋና ገልያ አሳቶ፥ ኡባይካ መና ጎዳ ቃላ ስስተ! 21 መና ጎዳይ ሀዋዳን ያጌ፤ "ሳምባታ ጋላሳን ቶኩዋ ቶከና ማላነ አያነ ቶኪደ፥ የሩሳላመ ፐንግያና ገለና ማላ፥ ህንተዉ ናገትተ!✝17:21 ናህ. 13:15-22 22 ሳምባታ ጋላሳን ህንተ ጎልያፐ ቶኩዋ ቶኪደ ከሶፕተ፥ ዎይ አይ ኦሱዋነ ኦፕተ። ካሰ ህንተ አዎቱዋ ታን አዛዜዳዋዳን፥ ሳምባታ ጋላሳ ዱማዪደ ቦንችተ።✝17:22 ከሳ 20:8-10፤ ዛረ. 5:12-14 23 ግዶፐነ፥ ኡንቱንቱ ስስበይክኖ፤ ባረንቱ ሀይካ ታኮ የግበይክኖ። ኡንቱንቱ ስሰናንነ ታፐ ታማረናን እጼድኖ።

24 " ‘ "ሽን ህንተ ታን መና ጎዳይ ኦድያዋ ስሶፐ፥ ሳምባታ ጋላሳን አይ ቶኩዋነ ቶኪደ፥ ሀ ካታማ ፐንገቱዋና ገለናን አጎፐ፥ ሳምባታ ጋላሳ ዱማዪደ፥ አን አይ ኦሱዋነ ኦናን ቦንቾፐ፥ 25 ዳዊታ ካተቱዋ አራታን ኡትያ ካተቱ ባረንቱ ሞድያዋንቱና ፓራቱዋነ ፓራ ጋረቱዋ ቶጊደ፥ ሄ ፐንገቱዋና ገላና። ኡንቱንቱ ይሁዳ አሳናነ የሩሳላመ ካታማን ደእያ አሳና ገላና፤ ሀ ካታማይ መናዉ አሳይ ደእያ ካታማ ግዳናዋ።

26 " ‘ "አሳይ ጹግያ ያርሹዋነ ሀራ ያርሹዋ፥ ካ ያርሹዋ፥ እጻናነ ጋላታ ያርሹዋ አኪደ፥ ይሁዳ ካታማቱዋፐ፥ የሩሳላመ ዩሹዋን ደእያ ሞቱዋፐ፥ ቢንያማ ቢታፐ፥ ጋፐ፥ ገዝያፐነ ኔጌባፐ መና ጎዳ ጌሻ ጎልያ ያና።

27 " ‘ "ሽን ህንተ ሳምባታ ጋላሳቱዋ ዱማዪደ ቦንቻናዳንነ ሳምባታ ጋላሳቱዋን ቶኩዋ ቶኪደ፥ የሩሳላመ ፐንገቱዋና ገለናዳን፥ ታን ኦዴዳዋ ስሰናን እጾፐ፥ ታን ሄ ፐንገቱዋን ታማ ኦይና። የሩሳላመ ካትያ ጎለቱዋ ማና። ሄ ታማይ ቶኤና" ያጌ’ ያጋ" ያጌዳ።