ኤርማሳ 16

ጾሳይ ኤርማሳ አዛዜዳዋ

1 መና ጎዳ ቃላይ፥ ሀዋዳን ያጊደ፥ ታኮ ዬዳ፤ 2 "ኔን ማቻቶ አኮፓ፤ ማጫዋ አቱማዋካ ሀ ሳኣን የሎፓ። 3 ሀ ሳኣን የለቴዳ ማጫ ናናቱነ አቱማ ናናቱ፥ ኡንቱንታ የሌዳ አየቱነ አዎቱ ትምቢትያ ታን መና ጎዳይ ነዉ ሀዋ ኦዳይ። 4 ኡንቱንቱ ኢታ ሀርግያን ሀይቃና፤ ኡንቱንቶ ዬከተና፥ ዎይ ኡንቱንቱ ሞገትክኖ፤ ኡንቱንቱ አሃይ ቢታ ቦላን ፕቱዋ ማላ ግዳናዋ። ኡንቱንቱ ማሻንነ ኮሻን ዉራና፤ ኡንቱንቱ አሹ ሳሉዋ ካፎቶነ ሳኣ ዶአቶ ቁማ ግዳናዋ" ያጌዳ።

5 መና ጎዳይ ታዉ ሀዋዳን ያጌዳ፤ "ዬኮ ጎልያ ገሎፓ፤ ዬካናዉ ዎይ ቃረታናዉ ቦፓ። አያዉ ጎፐ፥ ታን መና ጎዳይ ሀ አሳ ቦላፐ ታ ሳሮተ፥ አገና ታ ሲቁዋነ ታ ማሮታ ድጋ ክቻድ። 6 ዎጋቱካ ጉቱካ ሀ ቢታን ሀይቃና፤ ኡንቱንቱ ሞገትክኖ። አይ አሳይነ ኡንቱንቶ ዬከና፤ አይ አሳይነ ኡንቱንቶ ጎምኦረና ዎይ ሁጲያ ሜድሲደ ካዮተና። 7 ዬክያ አሳዉ ሃ ኡሻዉ አፊደ፥ ቁማ አናና እትፐ ሚድነ ኡሺደ፥ ካዩዋ ባለያዌ እቱነ ደኤና። ሀራይ አቶ አታ ዎይ አዉ ሀይቄዳ ኡራካ ባለያባይ ባዋ።

8 "ግብራይ ደእያ ጎልያካ ገሎፓ፤ ማናዉነ ኡሻናዉ ኡንቱንቱና እትፐ ኡቶፓ። 9 ኡባፐ ዎልቃማ መና ጎዳይ፥ እስራኤልያ ጾሳይ ሀዋ ኦዳይ። በአ፥ ታን ናሸቻነ እልልሳ ኮሻ፥ ማቻቶ ቡላችያዋነ ቡላቼትያን ኮሻ ሀ ሳኣፐ ድጋና። ሄዋ አሳይ ባረ ላይን ባረ አይፍያን በአና።✝16:9 ኤር. 7:34፤ 25:10፤ ሳፃ 18:23

10 "ኔን ሀ ቃላ ኡባ ሀ አሳዉ ኦድያ ዎደ፥ ኡንቱንቱ ኔና፥ መና ጎዳይ አያዉ ሀዋ ማላ ዎልቃማ ኢታባ ኑ ቦላ አዋዬዴ? ኑን አያ ባይዜዶ? መና ጎዳዉ፥ ኑ ጾሳዉ፥ ‘ኑን ኦዳ ናጋራይ አዬ?’ ያጋና። 11 ሄ ዎደ ኔን ኡንቱንቶ ያጋ፤ ‘ "ታን መና ጎዳይ ሀዋ ኦዳዌ ካሰ ህንተ አዎቱ ታና አጌዳ ድራሳ፥ ኡንቱንቱ ሀራ ጾሳቱዋ ካሌዳ ድራሳ፥ ኡንቱንቶ ኦዳነ ጎይኔዳ ድራሳ፥ ታና አጌዳነ ታ ህግያ ናገናን እጼዳ ድራሳነ 12 ህንተ ካሰ ህንተ አዎቱዋፐካ አ ኢቴዳ ድራሳ። በእተ፥ ህንተ ሁጲያን ሁጲያን ህንተ ኢታ ዎዛና ሙመተ ካሌድታ፤ ታዉ አዛዘተናን እጼድታ። 13 ሄዋ ድራዉ፥ ታን ህንተና ሀ ቢታፐ ደንደ፥ ህንተ ዎይ ህንተ አዎቱ ኤረና ቢታ ኦላና። ያን ህንተ ሀራ ጾሳቶ ጋላስነ ቃማ ሀጋዛና። ሙለካ ህንተዉ ቃረትከ" ያጌ’ ያጋ" ያጌዳ።

ጾሳይ እስራኤላቱዋ ዛሪደ አሀና

14 መና ጎዳይ ሀዋዳን ያጌ፤ " ‘እስራኤልያ አሳ ግብጼ ቢታፐ ከሴዳ መና ጎዳይ ኤሮ’ ያጊደ ጫቀና ዎዲ ያና። 15 ‘እስራኤልያ አሳ ሁጲሳ ባጋ ቢታፐነ ኡንቱንታ እ ላሌዳ ቢታቱዋ ኡባፐ ዛሪደ አሄዳ መና ጎዳይ ኤሮ’ ያጊደ ጫቃና። አያዉ ጎፐ፥ ታን ኡንቱንቱ ካሰ ኡንቱንቱ አዋቶ እሜዳ ቡዞ ቢታ ዛራደ አሀና" ያጌ።

ይያ ሙሩዋ

16 መና ጎዳይ ሀዋዳን ያጌ፤ "በእተ፥ ታን ሞልያ ኦይቂያ ዳሮ አሳቶ ኪታይ፤ ኡንቱንቱ ኡንቱንታ ኦይቃና። ሄዋፐ ጉይያን፥ ታን ዳሮ ሻንካንቻቶ ኪታና፤ ሻንካንቻቱ ደርያ ኡባፐ፥ ዞዝያ ኡባፐነ ሹቻ ኮፖቱዋፐ ኡንቱንታ ሻንካቲደ ከሳና። 17 አያዉ ጎፐ፥ ታን ኡንቱንቱ ኦግያ ኡባ በአይ። ኡንቱንቱ ታፐ ቆሰትበይክኖ፤ ኡንቱንቱ ናጋራይካ ታ አይፍያፐ ጌምቤና። 18 ታን ኡንቱንቱ ኢታተነ ኡንቱንቱ ናጋራ ድራዉ ኡንቱንቶ ላኡ ኩሽያ ዛራና። አያዉ ጎፐ፥ ኡንቱንቱ ባረንቱ እጸቴዳ ኤቃቱዋን፥ ሄ አሃ ማላትያዋንቱን ታ ቢታ ቱንሴድኖነ ባረንቱ ሸነይያ ምስለቱዋን ታ ላታ ኩንድኖ" ያጌ።

ኤርማሳ ዎሳ

19 አቤት መና ጎዳዉ፥ ታ ዎልቃዉ፥ ታ ዎልቃማ ሚጻዉ፥ መቱዋ ጋላሳን ታን ባቃታ አትያ ሳአዉ፥ ካዉተቱ ሳኣ ጋጻፐ ኔኮ ያና። ዪደ ሀዋዳን ያጋና፤ "ኑ አዎቱ ፓናነ ማደና ዎርዶ ጾሳቱዋ ጻላላ ላቴድኖ። 20 ዎን አሳይ ባረዉ ጾሳቱዋ መናዉ ዳንዳዪየ? ዳንዳየና! እ መንቶካ ኡንቱንቱ ቱሙ ጾሳቱዋ ግድክኖ!" ያጋና።

21 ጾሳይ ሀዋዳን ያጌ፤ "ሄዋ ድራዉ፥ ታን ኡንቱንታ ኤርሳና። እት ገደነ ታ ዎልቃነ ታ ምኖተ ኡንቱንታ ኤርሳና፤ ያቶፐ ኡንቱንቱ ታ ሱንይ መና ጎዳ ግድያዋ ኤራና" ያጌ።