ኤርማሳ 40

ኤርማስ ጋዳልያና ደኤዳ

1 ካትያ ናግያዋንቱ ካፑ ናቡዛራዳን ኤርማሳ ራማን ብል ስምና፥ መና ጎዳ ቃላይ ኤርማሳኮ ዬዳ። ኤርማስ ካሰ ናቡዛራዳን የሩሳላመፐነ ይሁዳፐ ኦሞዲደ፥ ባብሎነ ቢታ አፋናዉ ሳንሳላታን ቃቼዳ አሳ ግዶን ደኤ።

2 ካትያ ናግያዋንቱ ካፑ ኤርማሳ ዱማ ከሲደ፥ ሀዋዳን ያጌዳ፤ "መና ጎዳይ ነ ጾሳይ ሀ ባየ ሀ ቢታ ቦላን አሀና ጌዳ። 3 ጌዳዋዳን ሀእ መና ጎዳይ አሄዳ፤ መና ጎዳ ቦላን ህንተ ናጋራ ኦዳ ድራዉነ አዉ አዛዘተናን እጼዳ ድራዉ፥ ሀዌ ኡባይ ሀኔዳ። 4 በአ፥ ሀእ ታን ነ ኩሽያን ደእያ ሳንሳላታ ብላደ ኔና የዳድ። ታናና ባብሎነ ቢታ ባና ጎፐ ደንዳ፤ ታን ነዉ ኮሽያባ ኡባ ኩንና። ባብሎነ ቢታ ባናዉ ኮያና ዮፐ ቦፓ። ቢታይ ኡባይ ነ ስንን ደኤ፤ ኔና ሎኤዳ ሳኣ ሀቃነ ባ" ያጌዳ።

5 ኤርማስ አ ማታፐ ቤናን ደእሺና፥ ናቡዛራዳን ጉጂደካ ያጌዳ፤ "ሳፋና ናኣ ናኣ፥ አህቃማ ናኣ ጋዳልያኮ ባ፤ አያዉ ጎፐ፥ ባብሎነ ካቲ ናቡካዳናጾር አ ይሁዳ ካታማቱዋ ሞድያዋ ኦደ ሱንዳ። ሄዋ ድራዉ፥ አናና እትፐ ግዳደ፥ ሄዋን አሳና ደአ። ዎይ ኔና ሎኤዳ ሳኣ ሀቃነ ባ" ያጌዳ። ሄዋፐ ጉይያን፥ ካትያ ናግያዋንቱ ካፑ አዉ ቁማነ ሀራ ሽንቃ እሚደ የዴዳ። 6 ኤርማስ ምጽጳን ደእያ አህቃማ ናኣ ጋዳልያኮ ቤዳ። እ ሄዋን አቴዳ አሳና እትፐ ደኤዳ።

ጋዳሊ ይሁዳ ሞዴዳ

7 ይሁዳ ኦላ ጋዳዋቱዋፐነ ኦላንቻቱዋፐ አማሬዳዋንቱ ባረንቱ ኩሽያ ባብሎነ ካትያዉ ብሮ እምበይክኖ። ኡንቱንቱ ባብሎነ ካቲ ጋዳልያ ሄ ቢታ ሞድያዋ ኦደ ሱንዳዋነ ባብሎነ ቢታ ኦሞደቲደ ቤናን ይሁዳን አቴዳ ህዬሳቶ ካፑዋ ኦዳዋ ስሴድኖ።✝40:7-9 2 ካታ. 25:22-24 8 ናታንያ ናአይ እስማኤል፥ ቃሬሀ ናናቱ ዮሀናንነ ዮናታን፥ ታንሁሜታ ናአይ ሳራይ፥ ናጾፋ ካታማፐ ዬዳ ኤፋያ ናናቱነ ማእካ ካታማፐ ዬዳ እት ብታንያ ናአይ ያዛኒ ባረንቱ ኦላንቻቱዋ ኡባና ጋዳልያኮ ምጽጳ ዬድኖ። 9 ሳፋና ናኣ ናአይ፥ አህቃማ ናአይ ጋዳሊ ኡንቱንቶ ሀዋዳን ያጊደ ጫቄዳ፤ "ባብሎነቶ ኩሽያ እማናዉ ያዮፕተ፤ ሀ ቢታን ኡቲደ ደእተ፤ ባብሎነ ካትያዉካ ሞደትተ። ያቶፐ፥ ኡባባይ ህንተዉ ሎአ ግዳናዋ። 10 ታን ምጽጳን ኡታደ፥ ባብሎነ ቢታፐ ህንተናና ጋከታናዉ ይያ ኡባና ህንተ ዶና ግዳደ ሃሳያና። ሽን ህንተ ህንተ ደእያ ሄራን ሄራን ዎይንያ፥ ዎጋራ ዛይትያነ ሀራ ኦፍን ካ አይፍያ ኡባ ሺሺደ ዳጋይተ" ያጌዳ።

11 ሄ ዎደ ሞኣባ ቢታን፥ አሞና ቢታን፥ ኤዶማ ቢታንነ ሀራ ቢታቱዋን አይሁዳ ኡባይ ባብሎነ ካቲ አማሬዳ ይሁዳ አሳቱ ይሁዳን አታና ማላ ኦዳዋነ ኡንቱንታ ሞድያዋ ኦደ፥ ሻፋና ናኣ አህቃማ ናኣ ጋዳልያ ሱንዳዋ ስሴድኖ። 12 ባረንቱ ላለቲደ ደእያ ቢታቱዋፐ ይሁዳ ስሚደ፥ ጋዳሊ ደኢያሳ ምጽጳ ዬድኖ። ሄዋን ኡንቱንቱ ዳሮ ዎይንያነ ሀራ ኦፍን ካ አይፍያ ሺሺደ ዳጋዬድኖ።

እስማኤል ጋዳልያ ዎዳ

13 ሄዋፐ ጉይያን፥ ቃሬሀ ናአይ ዮሀናንነ ኩሽያ እምቤና ኦላ ጋዳዋቱ ኡባይ ጋዳልያኮ ምጽጳ ዪደ፥ 14 "አሞና ካቲ ባአሊስ ናታንያ ናኣ እስማኤላ ኔና ዎና ማላ የዴዳዋ ኤራይ?" ያጌድኖ። ሽን እ ኡንቱንቱ ግያዋ አማነናን እጼዳ።

15 ሄዋፐ ጉይያን፥ ቃሬሀ ናአይ ዮሀናን ምጽጳን ደእያ ጋዳልያኮ ዪደ፥ ጹራን ሀዋዳን ያጌዳ፤ "ኦንነ ኤረናን ደእሺና ባደ፥ ናታንያ ናኣ እስማኤላ ታን ዎና። አያዉ ጎፐ፥ እ ኔና ዎያዋ ግዶፐ፥ ነ ማታን ሺቄዳ አይሁዳ ኡባይ ላለታና፤ ቃይ ይሁዳን አቴዳ አሳይ ኡባይካ ዉራና" ያጌዳ።

16 ሽን አህቃማ ናአይ ጋዳሌ ዛሪደ፥ ሀዋዳን ያጌዳ፤ "እስማኤላባ ኔን ኦድያባይ ኡባይ ዎርዱዋ ግድያ ድራዉ፥ ሄዋ ማላባ ኦፓ" ያጌዳ።