ኤርማሳ 35

ኤርማሳነ ረካባ ያራቱዋ

1 እዮስያሳ ናኣ ይሁዳ ካትያ እዮአቄማ ላይን፥ ኤርማሳዉ መና ጎዳፐ ቃላይ ሀዋዳን ያጊደ ዬዳ፤✝35:1 2 ካታ. 23:36—24:6፤ 2 ኦዱዋ 36:5-7 2 "ረካባ ያራ ግድያ አሳኮ ባደ፥ ኡንቱንቱና ሃሳያ። ጌሻ ጎልያ ክፍለቱዋፐ እቱዋ ግዶ ገልሳደ ዎይንያ ኤሳ ኡንቱንቶ እማ" ያጌዳ። 3 ባደ፥ ሀባዲንያ ናኣ ናኣ፥ ኤርማሳ ናኣ ያአዛንያ፥ አ እሻቱዋነ አ አቱማ ናናቱዋ ኡባ፥ ሄዋ ግያዌ ረካባ ያራ ሙልያ አካደ፥ 4 መና ጎዳ ጎልያ አሃድ። ይግዳልያ ናኣ፥ ትምቢትያ ኦድያ ሀናና ኤርስያ ቆማቱዋ ክፍልያ ኡንቱንታ ገልሳድ። ሄ ክፍሊ ፐንግያ ናግያ ሻሉማ ናኣ ማእሴያ ክፍልያፐ ቦላ ባጋና፥ ካፖቱዋ ክፍልያ ማታን ደኤ። 5 ሄዋፐ ጉይያን፥ ታን ረካባ ያራቱዋ ስንን ዎይንያ ኤሳይ ኩሜዳ ጹጋቱዋነ ጹአቱዋ ዎደ፥ "ዎይንያ ኤሳ ኡሽተ" ያጋድ።

6 ሽን ኡንቱንቱ ዛሪደ፥ "ኑን ዎይንያ ኤሳ ኡሾኮ፤ አያዉ ጎፐ፥ ኑ ማይዛ አዉዋ ረካባ ናአይ ዮናዳብ ኑና፥ ‘ህንተካ ህንተ ናናቱካ ዎይንያ ኤሳ መናዉ ኡሾፕተ። 7 ቃይ ጎልያ ኬጾፕተ፤ ዘረ ዘሮፕተ፤ ዎይንያ ቱራካ ቶኮፕተ። ሄዋ አጊደ፥ ዱንካነ ግዶን ደእተ። ያቶፐ ህንተ አዱሳ ላይ ሀ ቢታን ደአና’ ያጌዳ። 8 ኑ ማይዛ አዉዋ ረካባ ናአይ ዮናዳብ ኑና አዛዜዳ ኡባዉ ኑን አዛዘቴዶ። ኑን፥ ዎይ ኑ ማጫ አሳቱ፥ ዎይ ኑ አቱማ ናናቱ፥ ዎይ ኑ ማጫ ናናቱ ኑ ደኡዋ ላይ ኡባን ዎይንያ ኤሳ ኡሽበይኮ፤ 9 ደእያ ጎልያካ ኬጽበይኮ፤ ዎይንያ ቱራ ሳአይ፥ ዎይ ጎሻይ፥ ዎይ ዘረይካ ኑዉ ባዋ። 10 ኑን ዱንካነ ግዶን ደኤዶ፤ ኑ ማይዛ አዉ ዮናዳብ አዛዜዳ ኡባዉካ አዛዘቴዶ። 11 ሽን ባብሎነ ካቲ ናቡካዳናጾር ኑ ቢታ ቦላ ዎራጄዳ ዎደ፥ ‘ባብሎነቱዋነ ሶረቱዋ ኦላንቻቱዋፐ አታናዉ፥ ሃ የሩሳላመ አነ ቦይተ’ ያጌዳ። ሀእ ኑን የሩሳላመን ደእያዌ ሄዋሳ" ያጌድኖ።

12 ሄዋፐ ጉይያን፥ መና ጎዳ ቃላይ ኤርማሳዉ ዬዳ። 13 ኡባፐ ዎልቃማ መና ጎዳይ፥ እስራኤልያ ጾሳይ ሀዋዳን ያጌ፤ "ባ፤ ባደ ይሁዳ አሳነ የሩሳላመ አሳ ሀዋዳን ያጋ፤ ‘ታ ቃላ ስስያዋነ ታን ታማርሴዳዎ አዛዘትያዋ አያዉ እጼድቴ? ታን መና ጎዳይ ሀዋ ኦዳይ። 14 ረካባ ናአይ ዮናዳብ ባረ አቱማ ናናቱዋ ዎይንያ ኤሳ ኡሸናዳን አዛዜዳ አዛዙዋ ኡንቱንቱ ናጌድኖ፤ ኡንቱንቱ ባረንቱ ማይዛ አዉዋ አዛዞ አዛዘቴዳ ድራዉ፥ ሀች ጋካናዉ ዎይንያ ኤሳ ኡሾኮ። ህንተዉ ዛራ ዛራደ ኦዳይ፤ ሽን ህንተ ታን ኦድያዋ ስስበይክታ። 15 ቃይ ታን ዛራ ዛራደ ትምቢትያ ኦድያ ታ ቆማቱዋ ኡባ ህንተኮ የዳድ፤ ኡንቱንቱ፥ "ህንተ ኡባይካ ህንተ ኢታ ኦግያፐ ሀእ ስምተ፤ ህንተ ኦሱዋካ ሎይተ፤ ሀራ ጾሳቶ ጎይኖፕተነ ኦፕተ። ያቶፐ፥ ታን ጾሳይ ህንተዉነ ህንተ ማይዛ አዋቶ እሜዳ ቢታን ህንተ ደአና" ያጌድኖ። ሽን ህንተ ታን ኦድያዋ ስሳናዉ ህንተ ሀይ ታኮ የግክታ። 16 ረካባ ናኣ ዮናዳባ ዘረቱ ኡንቱንቱ ማይዛ አዉ ኡንቱንታ አዛዜዳ አዛዙዋ ፖሌድኖ፤ ሽን ሀ አሳይ ታዉ አዛዘትቤና’ ያጋ" ያጌ።

17 ሄዋ ድራዉ፥ መና ጎዳይ ጾሳይ፥ ኡባፐ ዎልቃማይ፥ እስራኤልያ ጾሳይ ሀዋዳን ያጌ፤ "ስስተ፥ ታን ይሁዳ አሳ ቦላነ የሩሳላመን ደእያዋንቱ ቦላ አሀና ጌዳ ኢታባ አሀና። አያዉ ጎፐ፥ ታን ኡንቱንቶ ኦዳድ፤ ኡንቱንቱ ስሰናን እጼድኖ። ታን ኡንቱንታ ጼሳድ፤ ጼስና ኡንቱንቱ ኮየናን እጼድኖ" ያጌ።

18 ሄዋፐ ጉይያን፥ ኤርማስ ረካባ ያራቱዋ ሀዋዳን ያጌዳ፤ "ኡባፐ ዎልቃማ መና ጎዳይ፥ እስራኤልያ ጾሳይ ህንተና ሀዋዳን ያጌ፤ ‘ህንተ ህንተ ማይዛ አዉዋ ዮናዳባዉ አዛዘቴዳ ድራዉ፥ አ ዎጋ ካሌዳ ድራዉነ እ አዛዜዳዋ ኡባካ ፖሌዳ ድራዉ፥ 19 ረካባ ናአይ ዮናዳብ ታዉ ኡባፐ ዎልቃማ መና ጎዳዉ እስራኤልያ ጾሳዉ ኦያ አቱማ አሳ አዉደነ የና’ ያጌ" ያጌዳ።