ኤርማሳ 39

የሩሳላመ ኩንደ ይሁዳን መቴዳ ሀኖታቱዋ

1 ሰደቅያስ ይሁዳን ካተቴዳ ኡዱፑን ላይን፥ ታማን አግናን፥ ባብሎነ ካቲ ናቡካዳናጾርነ አ ኦላንቻቱ ኡባይ ዪደ፥ የሩሳላመ ዶዴድኖ። 2 ሰደቅያስ ካተቴዳ ታማነ እተን ላይን፥ ኦይደን አግናን፥ ኡዱፑን ጋላሳን ባብሎነ ኦላንቻቱ ካታማ ግምቢያ መንድኖ። 3 ሄ ዎደ ባብሎነ ካትያ ካፓቱ፥ ነርጋል-ሻሬጸራ፥ ሳምጋር-ነባ፥ ሳርሰኪማነ ሀራ ነርጋል-ሻሬጸራ ጌተትያዋንቱ፥ ሀራ ጮራ ሞድያዋንቱና እትፐ ዬድኖ፤ ግዶ ፐንግያ ግያ ፐንግያን ኡቴድኖ።

4 ይሁዳ ካቲ ሰደቅያስነ አ ኦላንቻቱ ኡባይ ባብሎነ ኦላንቻቱዋ በኤዳ ዎደ፥ ቃማን ካታማፐ ከሲደ፥ ካትያ አታክልትያ ሳኣ አፍያ ኦግያ ኦይቂደ፥ ላኡ ድርሳ ግምበቱዋ እትፐ ጋያ ፐንግያና ባቃቴድኖ። ኡንቱንቱ ዮርዳኖሳ ድልቡዋኮ ስሚደ ቤድኖ። 5 ሽን ባብሎነ ኦላንቻቱ ኡንቱንታ ጉየና የደርሲደ፥ እያርኮ ደምባ ጋደ፥ ሰደቅያሳ ኦይቄድኖ። ሀማታ ቢታን፥ ርብላ ካታማን ደእያ ካትያ ናቡካዳናጾራኮ አፌድኖ። ካቲ ናቡካዳናጾር ያን ሰደቅያሳ ቦላ ፕርዴዳ። 6 ቃይ ሰደቅያሳ አቱማ ናናቱዋ ሰደቅያስ ጼልሽን፥ ያን ርብላ ካታማን ዎዳ፤ ይሁዳ ካፓቱዋ ኡባካ ዎዳ። 7 ሄዋፐ ጉይያን፥ ሰደቅያሳ አይፈቱዋ ዎጭ ከሲደ፥ አ ባብሎነ ቢታ አፋናዉ ሳንሳላታን ቃቼዳ።

8 ሄ ዎደ ባብሎነ ኦላንቻቱ ካትያ ጎልያነ አሳይ ደእያ ኬቱዋ ኡባ ታማን ጹጌድኖ፤ የሩሳላመ ግምቢያካ ኮሌድኖ። 9 ካትያ ናግያዋንቱ ካፑ ናቡዛራዳን ካታማን አቴዳ አሳቱዋነ ካዲደ ባረናን ጋከቴዳ አሳቱዋ ኡባ እትፐ ኦሞዱዋን ባብሎነ ቢታ አፌዳ። 10 ሽን ካትያ ናግያዋንቱ ካፑ ናቡዛራዳን አያይነ ኡንቱንቶ ባይና ህዬሳቱዋፐ አማሬዳዋንታ ይሁዳን አጊደ፥ ኡንቱንቶ ዎይንያ ቱራ ሳአቱዋነ ጎሽያ ጋደቱዋ እሜዳ።

ኤርማሳ ብለ

11 ናቡካዳናጾር ካትያ ናግያዋንቱ ካፑዋ ናቡዛራዳና ሀዋዳን ያጊደ አዛዜዳ፤ 12 "ባደ ኤርማሳ ኮያ ደማደ፥ አዉ ኮሽያባ ኡባ ኦ፤ አ ቦላ ሀራ ኢታባ አያነ ኦፓ" ያጌዳ። 13 ሄዋ ድራዉ፥ ናቡዛራዳን፥ ናቡሻዝባን፥ ነርጋል-ሻሬጸርነ ባብሎነ ካትያ ካፓቱ ኡባይ እትፐ ግዲደ ኪቲደ፥ 14 ኤርማስ ቃሸት ኡቴዳ፥ ናግያዋንቱ ዳባባፐ ከሴድኖ። ባረ ጎለ አፊደ ዎና ማላ፥ ሳፋና ናኣ ናኣ፥ አህቃማ ናኣ ጋዳልያዉ ሀዳራ እሜድኖ። ሄዋፐ ደንዴዳዋን ኤርማስ ባረ ቢታ አሳና እትፐ ደኤዳ።

አበመሌካዉ ኦደቴዳ ህዶታ

15 ኤርማስ ናግያዋንቱ ዳባባን ጎርደት ኡት ደእሽን፥ መና ጎዳ ቃላይ አኮ ሀዋዳን ያጊደ ዬዳ፤ 16 "ባደ ቶጵያ አሳ ግድያ አበድመሌካዉ ሀዋዳን ያጋ፤ ‘ኡባፐ ዎልቃማ መና ጎዳይ፥ እስራኤልያ ጾሳይ፥ ሀዋዳን ያጌ፤ "ሀዋፐ ካሰ ታን ኦዴዳዋዳንካ ሀ ካታማ ቦላን ሎኦባ ግደናን፥ ባየ አሀና። ሄዌ ኡባይ ሀንያ ዎደ፥ ኔንካ ሀ ካታማን ኡታደ፥ ነ አይፍያን በአና። 17 ግዶ ሽን፥ ሄ ጋላሳን ታን መና ጎዳይ ኔና ዎ አካና፤ ኔን ያይያ ነ ሞርከቱዋ ኩሽያንካ አአደ እመታካ። 18 ታን ኔና አሻና፤ ኔን ኦላን ሀይቃካ፤ ኔን ታናን አማነቴዳ ድራዉ፥ ሀይቁዋፐ አታናሳ። ታን መና ጎዳይ ሀዋ ኦዳይ" ያጌ’ ያጋ" ያጌዳ።