ኤርማሳ 12

ኤርማሳ ኦሻ

1 አቤት መና ጎዳዉ፥ ታን ኔናና ሞተትያ ዎደ፥ ኡባባንካ ኔን ጽሉዋ። ግዶፐነ፥ ታን ጽሎ ፕርዳባ ኔናና ሃሳያናዉ ኮሼ። ኢታ አሳቱ ኦያዌ ኡንቱንቶ አያዉ እንጀቲ? አማነተናዋንቱ አያዉ እሻሊደ ደእኖ? 2 ኔን ኡንቱንታ ቶክና፤ ጻጱዋ የዴድኖ፤ ድጪደ አይፍያ አይፌድኖ። ኡንቱንቱ ኔና ዶናፐ የግክኖ፤ ሽን ኡንቱንቱ ዎዛናፐ ኔን ሃኩዋን ደኣሳ። 3 ሽን አቤት መና ጎዳዉ፥ ኔን ታና ኤራሳ። ታና በኣሳ፤ ታን ነዉ አያ ቆፕንቶ ፓጫሳ። ሹክያ ዶርሳቱዋዳን፥ ኔን ሄ ኢታ አሳቱዋ ጎቻደ ከሳ! ሹካ ጋላሳዉ ኡንቱንታ ዱማያደ ዎ! 4 ቢታይ መላናዌነ ደምባ ኡባን ዶሌዳ ማታይ ሹላናዌ አዉደ ጋካናሴ? ቢታን ደእያ አሳ ኢታተ ድራዉ፥ ዶአይነ ካፉ ዉሬዳ። ሄዋ ቦላካ አሳቱ፥ "ጾሳይ ኑን ኦያዋ ደመና" ያጊኖ።

ጾሳ ዛሩዋ

5 ጾሳይ ኤርማሳዉ ሀዋዳን ጊደ ዛሬዳ፤ "ኔን ገድያን ዎጽያ አሳቱዋና ዎ ናሰታደ ዳቡሮፐ፥ ፓራና ዋና ናሰታይ? ኔን ሳሮ ቢታን በቶፐ፥ ዮርዳኖሳ ዎራ ጋርሳን ዋና ሀመታይ? 6 ነ እሻቱ፥ ህንተ ሶ አሳቱ ኔና አደ እሜድኖ፤ ኡንቱንቱ ነ ቦላ ደንዴድኖ። ሄዋ ድራዉ፥ ኡንቱንቱ ነዉ ሎኦባ ሃሳዮፐነ፥ ኡንቱንቱን አማነቶፓ።

7 "ታን እስራኤልያ አጋድ፤ ታን ታ ዶረቴዳ ካዉተ ኦላድ። ታን ታ ሲቅያ አሳ አ ሞርከቱ ኩሽያን አደ እማድ። 8 ታ ዶረቴዳ አሳይ ታዉ ባዙዋን ጋሙዋ ማላ ግዴዳ። እ ታ ቦላ ጉዴዳ፤ ሄዋ ድራዉ፥ ታን አ እጻድ። 9 ታ ዶረቴዳ አሳይ ታዉ ሀራ ጋጨቱ ዶዲደ ዱክያ ሻቻ ጋጫት ማላ ግዴዴ? ቢተ፤ ዶአቱዋ ኡባ ሺሽተ፤ አ ማና ማላ አህተ።

10 "ዳሮ አላጋ ካተቱ ታ ዎይንያ ቱራ ሳኣ ባይዜድኖ፤ ታ ጋድያ የድኖ፤ ታ ሎኦ ቢታ ባዞ ኦድኖ። 11 ሄ ቢታይ ባዪደ ኦጼዳ፤ ታ ስንን መላነ አይነ ባይናዋ ግዴዳ። ቃረትያዌ ባይና ድራዉ፥ ሙለ ቢታይካ ባዬዳ። 12 ባዙዋን አያይነ ባይና ቃ ደረቱዋ ኡባ አደ፥ ቦንቂያዋንቱ ዬድኖ፤ አያዉ ጎፐ፥ መና ጎዳ ማሻይ ቢታ ሀ ጋጻፐ ህን ጋጻ ጋካናዉ ሜዳ። ሄዋ ድራዉ፥ ኦንነ ሳሮ አታናዉ ዳንዳየና። 13 ኡንቱንቱ ዛርጋ ዘሪደ፥ አጉን ጫኬድኖ። ኡንቱንቱ ዳሮ ዳቡሬድኖ፤ ሽን አይነ ዎስበይክኖ። መና ጎዳ ሀንቁዋ ቦሻነ ጋሱዋን ኡንቱንቱ ካይ ዬዳ" ያጌዳ።

14 መና ጎዳይ ሀዋዳን ያጌ፤ "ታን ታ አሳቶ እስራኤላቶ እሜዳ ቢታ ኦይቄዳ፥ ታ ኢታ ሾሮ ካዉተቱዋ ግዶፐ፥ ታን ኡንቱንታ ኡንቱንቱ ቢታፐ ቆላና። ቃይ ይሁዳ አሳቱዋካ ኡንቱንቱ ግዶፐ አሻና። 15 ሽን ኡንቱንቱ ቢታፐ ቆሌዳዋፐ ጉይያን፥ ዛረደ ታን ኡንቱንቶ ቃረታና፤ ታን ኡንቱንቱ ሁጲያን ሁጲያን ኡንቱንቱ ላታ ጋድያ፥ ኡንቱንቱ ካዉተ ቢታ ዛራደ አሀና። 16 ካሰ ታ አሳ ባኣላ ሱንን ጫቃናዳን ታማርሴዳዋዳን፥ ኡንቱንቱ ታ አሳ ኦግያ ሎይ ታማሮፐነ ታ ሱንን፥ ‘መና ጎዳይ ኤሮ!’ ያጊደ ጫቆፐ፥ ኡንቱንቱ ታ አሳ ግዶን ምኒደ ደአና። 17 ሽን አይ ካዉተይነ አዛዘተናን እጾፐ፥ ታን አ ኡባና ቆላደ ይሳና። ታን መና ጎዳይ ሀዋ ኦዳድ" ያጌ።