ኤርማሳ 25

ላፑን ታሙ ላይ ኦሞዱዋ ትምቢትያ

1 እዮስያሳ ናአይ፥ ይሁዳ ካቲ እዮአቄም ካተቴዳ ኦይደን ላይን፥ ባብሎነ ካቲ ናቡካዳናጾር ካተቴዳ ኮይሮ ላይን፥ ይሁዳ አሳ ኡባ ጼልያዋን ኤርማሳኮ ዬዳ ቃላይ ሀዋ።✝25:1 2 ካታ. 24:1፤ 2 ኦዱዋ 36:5-7፤ ዳኔላ 1:1-2 2 ትምቢትያ ኦድያ ኤርማስ ይሁዳ አሳ ኡባዉነ የሩሳላመን ደእያ ኡባቶ ሀዋዳን ያጌዳ፤ 3 "አሞጻ ናአይ፥ ይሁዳ ካቲ እዮስያስ ካተቴዳ ታማነ ሄዘን ላይፐ ዶሚደ፥ ሀች ጋካናዉ፥ ላታማነ ሄዙ ላይ መና ጎዳ ቃላይ ታኮ ዬዳ። ታንካ ዛራ ዛራደ ህንተዉ ኦዳድ፤ ሽን ህንተ ስሰናን እጼድታ።

4 "መና ጎዳይ ባረ ቆማቱዋ፥ ትምቢትያ ኦድያዋንታ ኡባ ዛር ዛሪደካ ህንተዉ ኪቴዳ፤ ሽን ህንተ ሀይዚደ ስሰናን እጼድታ። 5 ኡንቱንቱ ሀዋዳን ያጌድኖ፤ ‘ህንተ ኡባይካ ህንተ ኢታ ኦግያፐነ ህንተ ኢታ ኦሱዋፐ ሀእ ስምተ። ስሞፐ፥ መና ጎዳይ ህንተዉነ ህንተ ማይዛ አዋቶ መ መናዉ እሜዳ ቢታን ህንተ ደአና። 6 ሀራ ጾሳቶ ኦናዉነ ጎይናናዉ ካሎፕተ። ቃይ ህንተ ኩሺ ኦዳባን ጾሳ ይሎዮፕተ። ያቶፐ ጾሳይ ህንተና ቆሄና’ ያጌድኖ።

7 "መና ጎዳይ ሀዋዳን ያጌ፤ ‘ህንተ ታን ኦድያዋ ስሳናዋ አጊደ፥ ህንተ ኩሺ ኦዳባን ታና ይሎዬድታ፤ ያቲደ ህንተና ቆህያዋ ህንተ ሁጲያን አሄድታ’ ያጌ።

8 "ሄዋ ድራዉ፥ ኡባፐ ዎልቃማ መና ጎዳይ ሀዋዳን ያጌ፤ ‘ህንተ ታ ቃላዉ አዛዘተናን እጼዳ ድራዉ፥ 9 ታን ሁጲሳ ባጋ አሳ ኡባነ ታ ቆማ፥ ባብሎነ ካትያ ናቡካዳናጾራ ጼሳና። ኡንቱንታ ሀ ቢታ ቦላ፥ ሀ ቢታን ደእያ አሳ ቦላነ ሀዋ ሄራን ደእያ ካዉተቱዋ ኡባ ቦላ አሀና። ታን ሀ ቢታቱዋ ኡባና ይሳና፤ ቃይ በኤዳዌ ዳጋምያባ፥ "ፖራ!" ግያባነ መናዉ አይነ ባይናዋ ኦና። ታን መና ጎዳይ ሀዋ ኦዳድ። 10 ታን ኡንቱንቱፐ እልልሳነ ናሸቻ ኮሻ፥ ቡላችያዋነ ቡላቼትያን ኮሻ፥ ዎጻን ጋጭያ ኮሻነ ጾምፕያ ፖኡዋ ይሳና።✝25:10 ኤር. 7:34፤ 16:9፤ ሳፃ 18:22-23 11 ሀ ቢታይ ኡባና ባሻ አይነ ባይና ቢታ ግዳናዋ፤ ሀ ካዉተቱካ ባብሎነ ካትያዉ ላፑን ታሙ ላይ ሞደታና።✝25:11 2 ኦዱዋ 36:21፤ ኤር. 29:10፤ ዳኔላ 9:2

12 " ‘ላፑን ታሙ ላይይ ፖለት ስምና፥ ታን መና ጎዳይ ባብሎነ ካትያነ አ ካዉተ አሳ ኡንቱንቱ ባይዙዋ ድራዉ ሙራና፤ ኡንቱንቱ ቢታካ መናዉ አይነ ባይናዋ ኦና። 13 ታን ሄ ቢታ ቦላን ሃሳዬዳዋ ኡባ፥ ኤርማስ ካዉተቱዋ ኡባ ቦላ፥ "ሀናና" ጊደ ኦዴዳ፥ ሀ ማጻፋን ጻፈቴዳዋ ኡባ ሄ ቢታ ቦላን አሀና። 14 ዳሮ ካዉተቱነ ዎልቃማ ካተቱ ባብሎነቱዋ አይለዪደ ሞዳና። ታን ኡንቱንቶ ኡንቱንቱ ሀኑዋዳንነ ኡንቱንቱ ኩሽያ ኦሱዋዳን ቃንጻና’ ያጌ" ያጌዳ።

ጾሳይ ካዉተቱዋ ቦላ አህያ ፕርዳ

15 መና ጎዳይ፥ እስራኤልያ ጾሳይ ታዉ ሀዋዳን ያጌዳ፤ "ሀዋ ታ ሀንቁዋ ዎይንያ ኤሳይ ኩሜዳ ዋንጫ ሄይ። አፋደ ታን ኔና ኪትያ ካዉተቱዋ ኡባ ኡሻ። 16 ኡንቱንቱ ኡሺደ፥ ታን ኡንቱንቱ ግዶ የድያ ማሻ ጋሱዋን ጋንድጋራናነ ጎያና" ያጌዳ።

17 ታን መና ጎዳ ኩሽያፐ ዋንጫ አካደ፥ እ ታና ኪቴዳ ካዉተቱዋ ኡባ ኡሻድ። 18 ሀች ሀኔዳዋዳንካ ኡንቱንቱ ኡባ ባሻነ ዳጋማ፥ ጫሻነ ቃንገ ኦና ማላ፥ የሩሳላመነ ይሁዳ ካታማቱዋ፥ አ ካተቱዋነ አ ካፓቱዋ ኡባ ኡሻድ። 19 ግብጼ ቢታ ካትያ፥ አ ቆማቱዋ፥ አ ካፓቱዋ፥ አ ቢታ አሳ ኡባነ 20 ያን ደእያ አላጋ አሳቱዋ ኡባ ኡሻድ። ኡጻ ቢታ ካተቱዋ ኡባ ኡሻድ። ፕልስጼማ ቢታን ደእያ አስቃሎና፥ ጋዛ፥ ኤቅሮናነ አሽዶዳፐ አቴዳ ባጋ ካተቱዋ ኡባ ኡሻድ። 21 ኤዶማ፥ ሞኣባነ አሞና ኡሻድ። 22 ጺሮሳ ካተቱዋ ኡባ፥ ሲዶና ካተቱዋ ኡባነ ሜድተራነ አባፐ ሄፍን ጋጻን ደእያ ቢታ ካተቱዋካ ኡሻድ። 23 ዳዳና፥ ተማና፥ ቡዛነ ባረንቱ ሁጲያ ሹፌርያ ሜድያ አሳቱዋ ኡባቱዋ ኡሻድ። 24 አራባ ቢታ ካተቱዋ ኡባነ ባዙዋን ደእያ ዛራቱዋ ካተቱዋ ኡባ ኡሻድ። 25 ዝምራ፥ ኤላማነ ሜዶና ካተቱዋ ኡባ ኡሻድ። 26 ሁጲሳ ባጋ ቢታ ካተቱዋ ኡባ፥ ሃኩዋንነ ማታን ደእያ ካተቱዋ ኡባ ኡንቱንቱ ካል ካል፥ ሳኣ ቦላን ደእያ ካዉተቱዋ ኡባ ኡሻድ። ኡንቱንቱ ኡባፐ ጉይያን፥ ባብሎነ ካዉካ ኡሻና።

27 ጾሳይ፤ "ሄዋ ድራዉ፥ ኡንቱንቶ ኦዳ፤ ‘ኡባፐ ዎልቃማ መና ጎዳይ፥ እስራኤልያ ጾሳይ ህንተና፥ "ኡሽተነ ማትተ። ጮሽተነ ኩንድተ። ታን ህንተ ግዶ የድያ ማሻ ጋሱዋን ላኤን ደንዶፕተ" ያጌ’ ያጋ። 28 ሽን ኡንቱንቱ ነ ኩሽያፐ ዋንጫ አከናንነ ኡሸናን እጾፐ፥ ኡንቱንቶ ሀዋዳን ያጋደ ኦዳ፤ ‘ኡባፐ ዎልቃማ መና ጎዳይ ህንተና፥ "ህንተ ኡሻናዉ ኮሼ! 29 በእተ፥ ታን ታ ሱንን ጼሰቴዳ ካታማ ቦላ ኢታባ ኦናዉ ዶማይ። ያንና ህንተ ሙረተናን አቲደ ቢቴ? ህንተ ሙረተናን አቲደ ቢክታ! አያዉ ጎፐ፥ ታን ሳኣን ኡባ ቦላ ማሻ ጼሳይ። ታን ኡባፐ ዎልቃማ መና ጎዳይ ሀዋ ኦዳድ" ያጌ’ ያጋ።

30 "ሄዋ ድራዉ፥ ኤርማሳ፥ ሀ ቃላይ ኡባይ ኡንቱንቱ ቦላ ሀናናዋ ኡንቱንቶ ኦዳ። ጾሳይ ቦላ ቃን ጉማና። መና ጎዳይ ባረ ደእያ ጌሻ ሳኣፐ ባረ ጉን ስሳና። እ ባረ ሄን ጋድያ ቦላን ዎልቃፐ ጉማና። እ ዎይንያ ቴራ የደ፥ ጉምእያዋንቱ ዋስያዋዳን፥ ሳኣን ደእያ ኡባ ቦላ ዋሳና። 31 አ ጫቡ ሳኣ ጋጻ ጋኪደ ስሰቴ። አያዉ ጎፐ፥ መና ጎዳዉ ካዉተቱዋና ሞቱ ደኤ። ጾሳይ አሳ ኡባና ፕርደታና፤ እ ኢታቱዋ ማሻዉ አደ እማና። ታን መና ጎዳይ ሀዋ ኦዳድ ያጋ" ያጌዳ።

32 ኡባፐ ዎልቃማ መና ጎዳይ፥ "በአ፥ ኢታባይ ካዉተፐ ካዉተዉ ላለቴ፤ ሳኣ ጋጻፐ ጎትያ ጫርኩ ደንዴ" ያጌ።

33 ሄ ዎድያን ጾሳይ ዎዳዋንቱ አሃይ፥ ቢታ ቦላን ሀ ጋጻፐ ህን ጋጻ ጋካናዉ ላለታና። ኡንቱንቶ ዬከተና፥ ኡንቱንቱ አሃይ ሺቀና ዎይ ሞገተና። ኡንቱንቱ ቢታን ፕቱዋ ማላ ግዳናዋ።

34 ህንተኖ፥ ሄንንቻቶ፥ ዬክተነ ዋስተ። ህንተኖ፥ ዉድያ ካለያዋንቱ፥ ብድንን ጎንዶረትተ። አያዉ ጎፐ፥ ህንተ ሹከትያ ዎዲ ጋኬዳ፤ ህንተ ኩንዳናነ ሎኦ ኡርቃ ሚሻዳን መኤረታና። 35 ሄንንቻቱ ባቃቲደ ብያሳአይ ባዋ፤ ዉድያ ካለያዋንቱካ ከስ አክያ ሳአይ ባዋ። 36 መና ጎዳይ ኡንቱንቱ ሄን ጋድያ ይስያ ድራዉ፥ ሄንንቻቱ ዋስያ ዋሱዋነ ዉድያ ካለያዋንቱ ዬክያ ዬኩዋ ስስተ። 37 መና ጎዳ ሱሎ ሀንቁዋ ጋሱዋን ሳሮ ደእያ ሄን ጋዲ ኦናና። 38 ጋሙ ባረ ደእያ ዎራፐ ከስያዋዳን፥ ጾሳይካ ባረ ደኢያሳፐ ከሳና። ኡንቱንቱ ቢታይካ ናቂያዋንቱ ማሻንነ መና ጎዳ ሱሎ ሀንቁዋን አይነ ባይናዋ ቢታ ግዳናዋ።