ኤርማሳ 27

ኤርማስ ባረ ሞርግያን ዎዳ ሞርገ ም

1 እዮስያሳ ናአይ ሰደቅያስ፥ ይሁዳን ካዉተ ዶሜዳ ሄራን፥ ሀ ቃላይ መና ጎዳፐ ኤርማሳኮ ዬዳ።✝27:1 2 ካታ. 24:18-20፤ 2 ኦዱዋ 36:11-13 2 መና ጎዳይ ታዉ ኦዴዳዌ ሀዋ፤ "ነዉ ሞርገ ምነ ጎንያ ዳፉዋ ዎዶሩዋና ደእያ ቅንቂሪትያ መ፤ ነ ሞርግያን ዎ። 3 ይሁዳ ካትያ ሰደቅያሳኮ የሩሳላመ ኪተቴዳ አሳቱዋ ቦላ፥ ኤዶማ ካትያዉ፥ ሞኣባ ካትያዉ፥ አሞና አሳቱዋ ካትያዉ፥ ጺሮሳ ካትያዉነ ሲዶና ካትያዉ ኪታ። 4 ኡንቱንቱ ባረንቱ ጎዳቶ ሀዋዳን ያጊደ ኦዳና ማላ፥ ኡንቱንታ አዛዛ፤ ‘ኡባፐ ዎልቃማ መና ጎዳይ፥ እስራኤልያ ጾሳይ ሀዋዳን ያጌ፤ 5 "ታ ዎልቃማ ዎልቃንነ ታ የዴዳ ኩሽያን ሀ ሳኣ፥ ሳኣን ደእያ አሳ፥ መህያነ ዶኣ ታን መድ። አ ታን ታ ኮይያ ኡራዉ እማይ። 6 ስም ሀእ ታን ቢታ ኡባ ታ ቆማዉ፥ ባብሎነ ካትያ ናቡካዳናጾራዉ አደ እማድ። ቃይ ታን ባዞ ዶአቱካ አዉ ሞደታና ማላ ኦድ። 7 አ ቢታይ ሞደትያ ዎዲ ጋካናዉ፥ ካዉተቱ ኡባይ አዉ፥ አ ናአዉነ አ ናኣ ናአዉ ሞደታና። ሄዋፐ ጉይያን፥ ዳሮ ካዉተቱነ ዎልቃማ ካተቱ አ ሞዳና።

8 " ‘ "ሽን አይ ቢታይነ ዎይ አይ ካዉተይነ ሀ ባብሎነ ካትያ ናቡካዳናጾራዉ አዛዘተናን እጾፐ አ ሞርገ ምን ገለናን እጾፐ፥ ታን መና ጎዳይ ሄ ካዉተ አ ኩሽያን ይሳና ጋካናዉ፥ ማሻን፥ ኮሻንነ ኢታ ሀርግያን ሙራና። 9 ሄዋ ድራዉ፥ ህንተና፥ ባብሎነ ካትያዉ ሃረትክታ ያግያ ህንተ ትምቢትያ ኦድያዋንታ፥ ህንተዉ ካይያዋንቱ፥ ህንተ አኩሙዋ ብልያዋንታ፥ ህንተ ሻሬቾቱነ ማልያዋንቱ ኦድያዋ ስሶፕተ። 10 አያዉ ጎፐ፥ ኡንቱንቱ ህንተዉ ዎርዱዋ ኦዲኖ፤ ሄዋ ህንተና ህንተ ቢታፐ ሃሲኖ። ህንተና ላጋደ ከሳና፤ ህንተካ ያና። 11 ሽን አይ ካዉተይነ ባብሎነ ካትያ ሞርገ ምን ገሊደ፥ አዉ ሞደቶፐ፥ ታን መና ጎዳይ ሄ ካዉተ አ ቢታን አሻና፤ ኡንቱንቱ ሄ ቢታ ጎሻናነ ያን ደአና" ያጌ’ ያጋ" ያጌዳ።

12 ታን ይሁዳ ካትያ ሰደቅያሳዉካ ሀዋ ማላትያ ቃላ ኦዳድ፤ "ባብሎነ ካትያ ሞርገ ምን ሆካደ ገላ። አዉነ አ አሳዉ ሞደታ። ያቶፐ፥ ኔን ፓጻ ደአና። 13 መና ጎዳይ ባብሎነ ካትያዉ ሞደተናን እጽያ ካዉተዉ ጌዳዋዳን ማሻን፥ ኮሻንነ ኢታ ሀርግያን ኔንነ ነ አሳይ አያዉ ሀይቂቴ? 14 ‘ህንተ ባብሎነ ካትያዉ ሃረትክታ’ ግያ ትምቢትያ ኦድያዋንቱ ቃላ ስሶፕተ። አያዉ ጎፐ፥ ሄዌ ኡንቱንቱ ህንተዉ ኦድያዌ ዎርዱዋ። 15 መና ጎዳይ ሀዋዳን ያጌ፤ ‘ታን ኡንቱንቱ ኪታበይከ፤ ሽን ኡንቱንቱ ታ ሱንን፥ "ትምቢትያ" ጊደ ኦዲኖ። ሄዋ ድራዉ፥ ታን ህንተና ላጋደ ከሳና፤ ህንተካ ህንተዉ ትምቢትያ ኦድያዋንቱካ ያና’ ያጌ" ያጋድ።

16 ሄዋፐ ጉይያን፥ ታን ቄሳቶነ ሀ አሳ ኡባዉ ሀዋዳን ያጋደ ሃሳያድ፤ "መና ጎዳይ ሀዋዳን ያጌ፤ መና ጎዳ ጎልያ ሚሻይ ባብሎነፐ ሀእ ማታና ስሚደ ያና" ያጊደ ኦድያ ህንተ ትምቢትያ ኦድያዋንቱ ቃላ ስሶፕተ። አያዉ ጎፐ፥ ኡንቱንቱ ህንተዉ ኦድያዌ ዎርዱዋ። 17 ኡንቱንቱ ግያዋ ስሶፕተ፤ ባብሎነ ካትያዉ ሞደትተነ ፓጻ ደእተ! ሀ ካታማይነ አያዉ ኮለት ክቼዳ ሳኣ ግዳኔ? 18 ኡንቱንቱ ትምቢትያ ኦድያዋንታ ግዶፐነ መና ጎዳ ቃላይ ኡንቱንቱን ደኦፐ፥ መና ጎዳ ጎልያን፥ ይሁዳ ካትያ ጎልያንነ የሩሳላመን አቴዳ ኬሻ ሚሻይ ባብሎነ ቤናዳን ታና፥ ኡባፐ ዎልቃማ መና ጎዳ ዎስኖ ያጌ።

19 ኡባፐ ዎልቃማ መና ጎዳይ፥ "ጌሻ ጎልያፐ ስን ባጋን ኤቄዳ ላኡ ናስያ ቱሳቱዋባ፥ አኮ-ከርያባ፥ ጫና ጋረቱዋባነ ሀራ ሚሻቱዋ ኡባቱዋባ ሀዋዳን ያጌ፥ 20 ባብሎነ ካቲ ናቡካዳናጾር እዮአቄማ ናኣ፥ ይሁዳ ካትያ ዮኣኪናነ ይሁዳንነ የሩሳላመን ደእያ ዎልቃማ አሳ ኡባ ኦሞዲደ አፌዳ ዎዲያና።

21 "ኡባፐ ዎልቃማ መና ጎዳይ፥ እስራኤልያ ጾሳይ መና ጎዳ ጎልያን፥ ይሁዳ ካትያ ጎልያንነ የሩሳላመን አቴዳ ሚሻቱዋባ ሀዋዳን ያጌ፤ 22 ‘ኡንቱንቱ ባብሎነ ቢታዉ ኬዘታና፤ ታን ኡንቱንቱ ድራዉ ያና ጋላሳይ ጋካናዉ፥ ኡንቱንቱ ያን ደአና። ሄ ዎደ ታን ኡንቱንታ ጉየ ዛራደ ኡንቱንቱ ሳኣን ዎና። ታን መና ጎዳይ ሀዋ ኦዳድ’ ያጌ" ያጋድ።