ኤርማሳ 49

አሞና ፕርዳ

1 አሞና አሳ ጼልያዋን መና ጎዳይ ሀዋዳን ያጌ፤ "እስራኤልያዉ አቱማ ናአይ ባዌ? ዎይ ላትያዌ ባዌ? ያትና፥ ሞሎካ ግያ ጾሳዉ ጎይንያ አሳቱ ጋዳ ቢታ አያዉ ኦይቄድኖ? ኡንቱንቱ ካታማንካ አያዉ ኡቴድኖ?✝49:1-6 ህዝ. 21:28-32፤ 25:1-7፤ አሞጻ 1:13-15፤ ሶፎ. 2:8-11 2 አሞና አሳይ ደእያ ራባ ካታማ ቦላን ኦላ ዋሱ ስሰታናዳን፥ ታን መና ጎዳይ ኦና ጋላሳቱ ያና። ሄ ካታማይ ኮለቲደ፥ መላ አታናዋ። አ ዩሹዋን ደእያ ቄር ካታማቱካ ታማን ጹገታና። እስራኤልያ አሳይካ ባረና ባረ ላታፐ የደርሴዳዋንታ የደርሳና። ታን መና ጎዳይ ሀዋ ኦዳይ።

3 "ህንተኖ፥ ሀሰቦና አሳቶ፥ አታ ካታማይ ኮለት ክቼዳ ድራዉ ዝላልተ! ህንተኖ፥ ራባ አሳቶ፥ ዬክተ! ማቃ ማዪደ ካዮትተ! ቃይ ዎዛና ባዪደ፥ ካታማ ግምቢያ ግዶን ዎጸረትተ! አያዉ ጎፐ፥ ህንተ ጾሳይ ሞሎክ ባረ ቄሳቱ ዋነ ባረ ሞድያዋንቱና ኦሞደታና። 4 ህንተኖ፥ አማኑ ባይና አሳቶ፥ ህንተ፥ ‘ኑ ቦላን ኦን ዎራጂ?’ ያጊደ ህንተ ዱረተንነ ህንተ አራዳ ዎምባቱዋን አያዉ ጬቀቲቴ? 5 ታን ነ ዩሹዋን ደእያዋንቱ ኡባይ ኔና ዳጋንናዳን ኦና። ታን መና ጎዳይ፥ ኡባፐ ዎልቃማ መና ጎዳይ ሀዋ ኦዳይ። ህንተ ኡባይካ ከሲደ ባቃታና፤ ቃይ ባቃቲደ ቤዳዋንታ ሺሽያዌ ያና።

6 "ግዶፐነ፥ ዉርሰ ዎደቱዋን ታን አሞና አሳዉ ዛራደ እሻልሳና። ታን መና ጎዳይ ሀዋ ኦዳይ" ያጌ።

ኤዶማ ፕርዳ

7 ኤዶማ ቢታ ጼልያዋን ኡባፐ ዎልቃማ መና ጎዳይ ሀዋዳን ያጌ፤ "ተማና አሳዉ አዳ ኤራተይ ባዌ? ጭንጫ አሳቱዋፐ ዞሪ ይ ክቼዴ? ኡንቱንቱ አዳ ኤራተይ ኡንቱንቱፐ ጎዘት ክቼዴ?✝49:7-22 ኢሳ. 34:5-17፤ 63:1-6፤ ህዝ. 25:12-14፤ 35:1-15፤ አሞጻ 1:11-12፤ አብድ. 1-14፤ ሚልክ. 1:2-5 8 ህንተኖ፥ ዳዳናን ደእያዋንቶ፥ ባቃቲደ ጪማ ጎንጎሉዋን ቆሰትተ! አያዉ ጎፐ፥ ታን ኤሳ ዘረ ሙርያ ዎድያን፥ አ ቦላ ባየ አሀና። 9 ዎይንያ ማጽያዋንቱ ዮፐ፥ ማጺደ ቃርምያ አሽክኖ? ካይሳቱ ቃማ ገሎፐካ፥ ባረንታ ኮሽያዋ ጻላላ አክክኖ? 10 ሽን ታን ኤሳ ዘረ ቃራደ ካሎ አሻና፤ ኡንቱንቱ ቆሰታናዉ ዳንዳየና ማላ፥ ኡንቱንቱ ቆሰትያ ሳአቱዋካ ታን ቃራደ፥ ቆንጨ ሳኣ ኦና። ኤሳ ዘረይ፥ አ ዳቦቱነ አ ሾሮቱ ኡባይ ያና። 11 ህንተ ግዶን ደእያ አዉ ሀይ ድጌዳ ናናቱዋ ታዉ አግ ባሽተ፤ ኡንቱንታ ታን ድቻና። ቃይ ህንተ አምኤቱካ ታናን አማነትኖ" ያጌ።

12 መና ጎዳይ ሀዋዳን ያጌ፤ "ስም ሙረታናዉ በሰና አሳቱ ሙሩዋ ጹኣ ኡሽያዋንታ ግዶዋፐ አትና፥ ህንተ ዋን ሙረተናን አታና ጊደ ቆፒቴ? ቱማ ህንተካ ሙሩዋ ጹኣፐ ኡሺታፐ አትና፥ ጮ አትክታ። 13 ቦጽራ ካታማይ መላ ግዲደ አታና፤ አ በኤዳ አሳዉ ኡባዉ ዳጋንያባ፥ ቅሊጭያባነ ቦርያባ ግዳናዋ። ቃይ አ ዩሹዋን ደእያ ቄር ካታማቱ ኡባይካ መናዉ ኮለቲደ አታናዋ። ሀዋ ታን መና ጎዳይ ታ ሱንን ጫቃይ" ያጌ።

14 ታን መና ጎዳፐ ዬዳ እት ኪታ ስሳድ። ካዉተቱዋ ግዶ ኪተቴዳዌ፥ "ኤዶማ ቦላ ዶዳናዉ ሺቅተ! አናና ኦለታናዉ ደንድተ!" ያጌዳ።

15 መና ጎዳይ ሀዋዳን ያጌ፤ "ስም ታን ህንተና ካዉተቱዋ ግዶን ጉና፤ አሳ ግዶንካ ካቴዳዋንታ ኦና። 16 ህንተኖ፥ ሹቻ ጎንጎሉዋንነ ደርያ ቦላን ደእያዋንቶ፥ ህንተ ያሽስያ ያሻይነ ህንተ ኦቶሩ ህንተና ጭሜዳ። ህንተ ህንተ ጎልያ አርጋንዋዳን ቃን ኬጾፐካ፥ ታን ህንተና ሄዋፐካ ዱገ ዎና።

17 "ኤዶማ ቢታይ አሳ ዳጋንያ ቢታ ግዳናዋ። ያና አያ አሳይ ኡባይ አ ባየ በኢደ፥ ዳጋማናነ፥ ‘ፖራ!’ ጋና። 18 ሶዶምነ ጋሞር ባረንቱ ዩሹዋን ደእያ ካታማቱዋና ባይያ ዎደ ሀኔዳዋዳን፥ ኦንነ ያን ደኤና፤ አሳይ ኡባካ ያን ኡተና። ታን መና ጎዳይ ሀዋ ኦዳይ።✝49:18 ዶመ 19:24-25

19 "ዮርዳኖሳ ሻፋ ላንቂያን ደእያ ዎራፐ ሎኦ ቆሩ ደኢያሳ ቆፐናን ከስያ ጋሙዋዳን፥ ታን ያደ፥ ኤዶማ አሳቱዋ ቆፐናን ኡንቱንቱ ቢታፐ የደርሳና። ሄዋፐ ጉይያን፥ ታ ዶሬዳ አሳ አ ቦላን ሱንና። ታ ማላይ ባዋ፤ ታን ኦና ጌዳዋካ ተአናዉ ዳንዳይያ አሳይ ባዋ። አይ ሄንንቻይ ታናና ኤቀታናዉ ዳንዳዪ?

20 "ሄዋ ድራዉ፥ ታን መና ጎዳይ ኤዶማ ቦላንነ ተማና ካታማ አሳ ቦላን ኦናዉ ሀልቼዳዋነ ቆፔዳዋ ስስተ! ኡንቱንቱ ናናቱዋ ዎልቃን ጎቺደ አፋና፤ ሄዋ ጋሱዋን ኡንቱንቱ ሶ አሳይ ኡባይ ዳጋማና። 21 ኤዶማ ኩንደ ጊረይ ቢታ ቃና፤ ኤዶማቱዋ ዋሱካ ዞኦ አባ ጋካናዉ ስሰታና። 22 አርጋንይ ባረ ቀፍያ ፕድ ኦደ፥ ቦላፐ ዱገ ኤለካ ፓሊደ ይያዋዳን፥ ሞርኪ ቦጽራ ቦላን ያና። ሄ ጋላስ ኤዶማ ኦላንቻቱ ኦይይ ኦይቄዳ ምሽራቲዳን ህርጋና" ያጌ።

ዳማስቆ ፕርዳ

23 ዳማስቆ ጼልያዋን ጾሳይ ሀዋዳን ያጌ፤ "ኢታ ኦዱዋ ስሴዳ ድራዉ፥ ሀማታነ አርፋዳ ካታማቱዋን ደእያ አሳይ ዬላቴዳነ ያዬዳ። ቤታይ ሾጭያ አባዳን፥ ኡንቱንታ ዎዛናይ ሸምፑዋ ደማናዉ ዳንዳይቤና።✝49:23-27 ኢሳ. 17:1-3፤ አሞጻ 1:3-5፤ ዛካ. 9:1 24 ዳማስቆ አሳይ ዳቡሬዳ፤ ኡንቱንቱ ዳጋማን ሻባረቲደ ባቃቴድኖ፤ ምሽራቶ ኦይይ ኦይቂያዋዳን፥ መቱነ ቱጋይ ኡንቱንታ ኦይቄዳ። 25 ናሸቻይ ኩሜዳ ሄ ኤረቴዳ ካታማይ አሳይ ደኤና ሳኣ ግዳናዋ! 26 ሄዋ ድራዉ፥ ሄ ጋላሳን ሄ ካታማን ደእያ ያላጋ አቱማ አሳ ኡባይ ካታማ ግዶ ኦገቱዋን ሀይቃና፤ ኦላንቻቱ ኡባይካ ዉራና። ታን፥ ኡባፐ ዎልቃማ መና ጎዳይ ሀዋ ኦዳይ። 27 ታን ዳማስቆ ካታማ ድርሳ ግምቢያን ታማ የዳና፤ ሄ ታማይ በንሀዳዳ ካዉተ ጎልያ ኡባ ማና" ያጌ።

ቄዳረ ያራቱዋ ቦላነ ሀጾራ ካዉተቱዋ ቦላ ያና ፕርዳ

28 ባብሎነ ካቲ ናቡካዳናጾር ኦሊደ ጾኔዳ ቄዳረነ ሀጾራ ካዉተቱዋ ጼልያዋን መና ጎዳይ ሀዋዳን ያጌ፤ "ደንድተ፤ ቄዳረ አሳ ኦልተ! ሄ አዋይ ዶልያ ባጋና ደእያ አሳ ዉርስተ! 29 ኡንቱንቱ ዱንካነቱዋነ ኡንቱንቱ ዉደቱዋ አክተ! ኡንቱንቱ ጋርዳቱዋ፥ ኡንቱንቱ ማጹዋ ኡባነ ኡንቱንቱ ጋሎቱዋ አክተ! ያቲደ ኡንቱንቶ፥ ‘ህንተ ዩሾ ኡባን ሻቢርሳይ ደንዴዳ!’ ያጊደ ኦድተ።

30 "ህንተኖ፥ ሀጾራን ደእያዋንቶ፥ ባብሎነ ካቲ ናቡካዳናጾር ህንተ ቦላን ኢታባ ኦናዉ ማቀት ኡቴዳ ድራዉ፥ ባቃትተ፤ ሃኮ ሳ ቢደ፥ ጪማ ጎንጎሉዋን ቆሰትተ! መና ጎዳይ ሀዋ ኦዳድ።

31 "ናቡካዳናጾራ፥ ደንዳ! ህርግ ባይናን ሳሮ ደእያ ካዉተቱዋ ቦላ ዎራጃ! ታን መና ጎዳይ ሀዋ ኦዳይ። ኡንቱንቱ ካታማ ግምቢያዉ እፍይ ዎይ ኩሉቡ ባዋ። ኡንቱንቱ ባረካ ደኢኖ።

32 "ኡንቱንቱ ጋሎቱ ቦንቀታና፤ ኡንቱንቱ ዉዲካ ኦሞደታና። ባረንቱ ሁጲያ ሹፌርያ ሜድስያዋንታ ኡባ ታን ጫርኩዋን ላላና፤ ታን ኡባ ሳና ኡንቱንቱ ቦላ ባየ አሀና። ታን መና ጎዳይ ሀዋ ኦዳይ። 33 ሀጾር መናዉካ ዎራካናቱ ደእያ ባዞ ግዲደ አታናዋ። ኦንነ ያን ደኤና፤ አሳይ ኡባካ ያን ኡተና" ያጌ።

ኤላማ ፕርዳ

34 ይሁዳ ካቲ ሰደቅያስ ኮይሮ ካተቴዳ ዎደ፥ ኤላማ ቢታ ጼልያዋን መና ጎዳፐ ኤርማሳኮ ዬዳ ቃላይ ሀዋ። 35 ኡባፐ ዎልቃማ መና ጎዳይ ሀዋዳን ያጌ፤ "ኤላማዉ ዋና ዎልቃ ግድያ ኡንቱንቱ ዎንዳፍያ አሳቱዋ ታን ዎና። 36 ኡባ ሳና ታን ኤላማ ቦላን ጫርኩዋ አሀና፤ ኡንቱንታካ ሄ ጫርኩዋን ኡባሳ ላላና። ሄዋ ድራዉ፥ ኤላማ አሳይ ላለቲደ ጋከና ቢታይ ደኤና። 37 ኡንቱንቱ ሞርከቱዋ ስንንነ ኡንቱንታ ዎናዉ ኮይያዋንቱ ስንን ታን ኤላማ ዳጋንና። ታን ታ ዎልቃማ ሀንቁዋን ኡንቱንቱ ቦላ ባየ አሀና። ታን መና ጎዳይ ሀዋ ኦዳይ። ታን ኡንቱንታ ይሳና ጋካናዉ፥ ማሻን የደርሳና። 38 ታን ኤላማ ካትያነ ኡንቱንቱ ካፖቱዋ ይሳደ፥ ታ ካዉተ አራታ ያን ዎና ያጌ መና ጎዳይ።

39 "ግዶፐነ፥ ዉርሰ ዎደቱዋን ታን ኤላማ አሳ ዛራደ እሻልሳና። ታን መና ጎዳይ ሀዋ ኦዳይ" ያጌ።