1 Mi gyi te la mi so yi ewo iyi bɔkɔ mi yi mu ebirigo igbomo kwuwo yi mbala enzu umba Olawodisiya mbala umbafo umba bɔkɔ o yi mi mo. 2 Imi mii wo ɛlɛ kaa mi kamba ɛnwu ma kaa idɛnyi li lo mbo mesu, mi gyi te lo fya esheshi ma duduu tabɔkɔ ɔ zɔngɔma ongbulolo ma awu. Mu ɛlɛ gba o zɔngɔma kwunvyeru ungwu Ukpo ma le, iyi bɔkɔ akwu Okrasi mafyiwu le. 3 Akwu mawu gba ilukwu mbala iyitu iyi Ukpo lɛɛbi i nvyemo le.

4 Imi mi so yi ɛlɛ te kaa onzu uwufo le bo laa iso iyi inyima iyi imwilo kaa le kyoro yi mo mo. 5 Moo mi yi mbala yi mu ɛnwu mo le bi moo mi yi mbala yi mu kwundu, ba mi mwɔnyɛ tabɔkɔ mi ma yi tee lu rima ngiri kyaa mu ikwu idu lu fulo yi mu Okrasi.

6 Tabɔkɔ lu na Okrasi Ɔzhizɔsi te lakwu Ɔkwu yi ele, la lu zɛma kyaa mbala wu. 7 Akpa yi li fyemo mɛzhi mate akpa iyi uwɛyi mɛzhi tayi, la lu mbo ɛnwu yi ma mawu, kaa ikwu idu lu fulo yi li kyo ɛkpasu ma, kyamate bɔkɔ o zɔ yi awu. Akwɛyi la lu koko lu gbɛlɛ ɛnyi.

8 La lu ngbɛndu kaa onzu le bo la kwukyoro ungwumbwa mu amasa iyi onzu mo, iyi bɔkɔ enzu ɔ zɔ bɔkɔ i kyo i ngyi mbaa ɛndu iyi wa to keyi umba kwudu kwɔlɛ, moo i ngyi mbaa Okrasi mo. 9 Moo Okrasi a vindɔ onzu le bi moo, akwu Ukpo yɛriri, 10 akwɛyi lunyi tete lu nyɔlɔma yɛriri mawu. Uwu gba akwu u to keyi uwu asu mbala enzu umba idomo lɛɛbi le.

11 Kwuwongu lu kyomesu mbala Okrasi awu, i yi kyamate o zɛ yi ɛsɔ ma-a, akwu onzu gba a zɛ yi le mo, Okrasi gba a zɛ yi le, inyi gba akwu iwɔma mu ɛkpasu iyi ɛnwu iyi ingbomo ɛlɛ le. 12 Moo kwuyengwu bɔkɔ o wo yi obatisima awu, o kpa yi ami mbala Okrasi, mu obatisima awu tete lu yimo mbala Okrasi kwuwongu ikwu idu fulo yi mu ɛkpasu iyi Ukpo uwu bɔkɔ e yi wu mo mu lukwu awu. 13 Mekyi lu kpomo mu kwundu kwuwongu ingbomo yi mbala kwuwongu lu kwu Azhu mo umba bɔkɔ o yi Ɛrama iyi Ukpo mo. Kekelele ba Ukpo e shi yi kwunyɔ mu Okrasi-e. Ukpo a gba la ingbomo nzu lɛɛbi a kpanzu-o; 14 ingbomo nzu lɛɛbi Ukpo a ngbɛ yi ma-a, i kyo ɔlu yi lɛɛbi a ka kpayi mu kwuwɛyi ungwu lukwu. 15 Okrasi a na ekpasu iyi wa to keyi umba ɛndu iyira mbala idomo ma, akwɛyi e lo mbo eseye gedegede tabɔkɔ a bi mba ma awu.

16 Kwuwo kwɔlɛ, la lu shi kaa onzu uwunawuna le shi yi ɛrama mu kiya ingyi bɔkɔ lu ri, naa embyi umba lu wo, naa Odumudumu uwu Ɔvya Uwepo, naa Kwɔfyi ungwu Ɛnwu Igbomo ungwu Azhu mo. 17 Apula ɛnyi lɛɛbi akwu kwundu ungwu apula iyi bɔkɔ i yi mu inyɔma; Okrasi gba akwu inyi le shɛ. 18 Kwuwo kwɔlɛ, la lu nyama kaa onzu uwunawuna uwu bɔkɔ e to ɛnwu tee a ka uwewe ma, tee a ma ɛbɛ ba a bɔkushi tee lo gbo ɔya laa alɔgbulɔ umba Ukpo kaa le kyoro yimo mo. Moo enzu mbamba tayi o bɔma mu amasa iyi onzu 19 ba o rala Okrasi uwu bɔkɔ akwu reshi ingyi ɛnwu le fo. Okrasi gba akwu reshi ingyi ɛnwu wu ɔshɔshi le. Uwu gba e shi ɛnwu lɛɛbi, laa ingyi, laa esa kaa li lomesu kaa li bulɔma mate bɔkɔ Ukpo a gyi le.

20 Lu kpomo mbala Okrasi akwɛyi o wayima mbaa ɛkpasu iyi ɛndu iyi kwudu kwɔlɛ-ɛ. I wo te, bɔkɔ lu wo kyamate, lu kwu enzu umba kwudu kwɔlɛ te? I wo te bɔkɔ lu mbwalu ɛrama ɛnyi tayi iyi i zɔ tee, 21 <<La lu pwu ngyɛlɛ afyi mo,>> <<La lu pwa ngyɛ ngyi kenzu mo,>> <<La lu pwafyi mu ɛnyi mo>>? 22 Ɛlɛ kpɛkpɛyi akwu apula iyi bɔkɔ i kpɛdɔma; moo akwu ɔkpa mbala ɛzɔ iyi onzu bi. 23 Ilomo laa ɔkpa ɛlɛ i yi kyamate i shi yi lu wo iyi bɔkɔ Ukpo a gyi tayi, kyamate ɛnwu inyashi ilomo, mbala ɔya igbomo laa alɔgbulɔ umba Ukpo, mbala ɛnwu igyima iyi kwukyoro; tetete akwu tayi gba i yi le mo, moo i yi ɛkpasu iyi bɔkɔ i shi onzu a lafya laa ekweyi iwomo iyi apula iyi kwudu kwɔlɛ mo.