1 Kwuwongwu Ukpo e yi yi mo la kwunyɔ mbala Okrasi awu, la lu shi egbo yi mu apula iyoshi, mbaa bɔkɔ Ɔzhizɔsi a ŋɔma mu ukpa uwu ɛsu mu kwuwo ungwu ungyi ungwu Ukpo. 2 La lu shi egbo yi mu apula iyoshi, moo akwu mu apula iyi kwudu kwɔlɛ mo. 3 Moo lu kpomo-o, kwunyɔ yi ba o nvye ngwu mo mbala Okrasi midu iyi Ukpo. 4 kwuyengwu bɔkɔ Okrasi uwu bɔkɔ akwu kwunyɔ yi shɛ, a ba wɔ awu, lunyi tete luu wɔ mbala wu akwɛyi lu fya ogbo mu inzumbɛku wu!

5 Kwuwo kwɔlɛ, la lu lafya la apula iyira iwomo iyi bɔkɔ ɛnwu i gyi, kyamate iyama, apula iyi lovya iwomo, egbo iyɛku ishimo mu iyama, egbo ishimo mu ira iwomo. mbala ekweyi (moo ekweyi i yi mate eshi ibyima tayi). 6 Kwuwongwu apula iyi ira ɛlɛ, Ukpo a zɔ amba wu akwɛyi e lo enzu umba bɔkɔ o lowumo mo awu inyashi. 7 Mekyi lunyi mafyi yi lu wo apula iyira ɛlɛ tete, kwuyengwu bɔkɔ lu yi mu luzɛ ma yi awu.

8 Kekelele mega lu lafya laa apula ɛlɛ te iwomo ŋa, mate: amba, kwuzhini, anya iyi onzu mbala onzu itutumo. Ari ikpama mbala iso iyi kashi li wɔ mu kenzu yi gbee mo. 9 La lu mwulo iyi esu mo, moo lu kwu enzu umbekyi mbala iwomo iyi ari mba fo,

10 kekelele lu kwu enzu umbepo ŋa. Ukpo e shi lu kwu enzu umbepo akwɛyi e yeyi mu iwomo kaka kaa la lu yi mate uwu tayi, kaa la lu yitu wu marimari. 11 Kwuwo kwɔlɛ, ikama iyi enzu umba bɔkɔ akwu Azhu mo mbala Azhu, naa umba bɔkɔ o zɛ mba ɛsɔ ma mbala umba bɔkɔ o zɛ mba ɛsɔ ma mo, naa agboga, naa enzu umba bɔkɔ eyi mba i wuma mo, enye, enzu umba bɔkɔ akwu enye mo, i yi fo, kpɛkpɛmba akwu wakpɛnyi ŋa moo Okrasi gba akwu iyinayina le, uwu gba ba e yi mu uwewe le.

12 Ukpo a ŋa yi tee kaa la lu kwu enzu wu wakɛrikɛri umba bɔkɔ e pwu idɛnyi mba gyɔɔ. Kwuwo kwɔlɛ, la lu ma eyembembyi iyi esu, la lu zɔ esu ari iyeshi, la lu kwu enzu umba egbo, la lu fulo ɛyi mu kadu mo, la lu yidu mbala esu. 13 La lu yidu mbala esu, la lu gba laa ingbomo iyi esu lu kpa. Mate bɔkɔ Ɔkwu a gba laa ingbomo yi a kpa yi awu, tatayi gba luu gba yi lu kpa enzu le. 14 Iyi i ka ɛlɛ ma lɛɛbi bɔkɔ luu kyo gba akwu tee la lu pwu idɛnyi iyi esu, moo idɛnyi gba i lo enzu mesu akwɛyi akwu wakpɛnyi yɛriri le. 15 La lu nyama kaa oloto uwu Okrasi e shi yi awu lu to keyi mu egbo yi; moo akwu kwuwongu oloto ɔlɛ gba Ukpo a ya yi ma kya mu ɛnwu ikpɛnyi le. La lu gbɛlɛ Ukpo ɛnyi kwuyengwunanguna. 16 La lu shi iso iyi Okrasi li ŋɔma mu egbo yi gyɔɔ. La lu zɔ esu iso iyi Okrasi ɛlɛ, la lu yi esu malu mu ilukwu iyinayina. La lu so amu laa Ukpo, mbala amu iyi Odevidi mbala amu iyi Ukpo iduma, la lu gbɛlɛ Ukpo ɛnyi mu egbo yi. 17 Kiya ingyinangyina bɔkɔ luu wo naa lu so, la lu wo yi lɛɛbi mu ɛnyi iyi Ɔkwu Ɔzhizɔsi, la lu gbɛlɛ Ukpo Ada ɛnyi i zɛ mu Ɔzhizɔsi Okrasi.

18 Eko umba anu, la lu ra laa ɛyi la lu shi umba anu yi, moo inyi gba i fa tee wa mbwalu Ɔkwu lo wo le.

19 Anu umba eko, la lu gyi eko yi, la lu wo mbala mba lambalamba mo.

20 Ɛmɛ, la lu lomo laa umba ete yi mbala umba anyi yi kwuyengwunanguna, moo ɛlɛ gba Ukpo a gyi le.

21 Umba ada, la lu shi ɛmɛ yi lo wo amba mbala yi kwuwongu ɛyi ikpama kwuyengwunanguna mo, moo ɛlɛ te ii mu mba ɛnwu ma.

22 Lunyi enye, la lu lomo laa ada umba kwogba yi mu kwudu kwɔlɛ mu iyinayina bɔkɔ luu wo, la lu lomo mbomo kwuyengwu o ye yi mu imama kɛɛkyi kaa lɔ du yi ma mo; lunyi ba la lu wo yi mu egbo ikpɛnyi kwuwongu luu wiyi iyi Ɔkwu. 23 Iyinayina bɔkɔ luu wo, la lu wo yi mu egbo ikpɛnyi, mate luu wo laa Ɔkwu tayi moo akwu laa enzu mo.

24 La lu lolo tee Ɔkwu ee shi yi rigbɛ ingyi bɔkɔ e shi mɛzhi la enzu wu awu, moo Okrasi gba akwu Adakwogba yi shɛ le. 25 Ukpo ee shi enzu umba bɔkɔ oo wo apula iyira rigbɛ ingyi apula iyira iyi bɔkɔ o wo, moo Ukpo aa zɔ kusɛ mo.