1 Kwupu kwɔlɛ kwu ngyi mbaa mi Ɔpɔlu, uwu bɔkɔ mu inyama iyi Ukpo, mi kwu u zɛ ilɔ uwu Okrasi Ɔzhizɔsi mbala umanyi nzu Otimoti.

2 Mi ka laa enzu umba Ukpo mu kwusɛ ungwu Okolosi, umba bɔkɔ akwu ɛmanyi nzu umba bɔkɔ ɔ bɔ shɛ mu luzɛ kyaa mbala Okrasi awu:

Ukpo Ete nzu le shi yi esheshi mbala egbo inɔma.

3 Ki gbɛlɛ Ukpo, Ete wu Ɔkwu nzu Ɔzhizɔsi Okrasi, ɛnyi iyɔkpɔɔ kwuyengwu ki lɛ yi Ukpo. 4 Moo ki pwa ɛza iyi ikwidufulo yi mu Okrasi Ɔzhizɔsi mbala idɛnyi iyi lu yi yi laa enzu umba Ukpo lɛɛbi. 5 Kwuyengwu bɔkɔ ilɔ engbulolo ɛlɛ, Ɛza Iyesheshi ɛlɛ, i bo munyi yi kwuyengwu kwonze, lu pwa tee ii shi eyifulomo. Ikwidufulo yi mbala idɛnyi yi ɛlɛ i ri mu apula iyi lu yi mu eyifulomo yi iyi bɔkɔ o she yi yi moshi awu. 6 Eza iyesheshi ɛlɛ i yi mu ifulama munamuna mu kwudu kwɔlɛ, i shi enzu o yi mu luzɛ izɛma undu bɔkɔ Ukpo a gyi kyamate bɔkɔ i wo mekeka yi awu, lunyi enzu umba Okolosi ngbaa ɔnuwu kwonze bɔkɔ lu pwa ɛza iyesheshi iyi Ukpo ɛlɛ nzhii ba kwuye ngwɔlɛ akwɛyi lu bu yitu yi tee akwu ongbulolo. 7 Lu pwa ɛza iyesheshi iyi Ukpo ɛlɛ mafyi iyi umanyinzu uwu idɛnyi nzu, Epafarasi, uwu akwu u wo ɛduma iyi Okrasi shɛ meka yi mu kwunzu nzu awu. 8 Uwu gba a ba nzu ɛza iyi idɛnyi iyi bɔkɔ Kwundu e shi yi le.

9 Kwuwo kwɔlɛ ki lɛ yi Ukpo iyɔkpɔɔ ngbaa kwuyengwu bɔkɔ ki pwa ɛza iyayi awu. Ki lɛ Ukpo tee le shi yi iyitu gyɔɔ iyi kiya ingyi a gyi, mbala ilukwu mbala iyitu iyi bɔkɔ Kwundu ee shi. 10 Akwɛyi luu zɛ luzɛ undu Ɔkwu a gyi, akwɛyi luu wo iyi bɔkɔ ii she wu iyɔkpɔɔ. Lu wa laa imuma iyesheshi kyamate ɛwɛyi tayi, akwɛyi lu bulɔma mu iyitu iyi Ukpo. 11 Ki lɛ Ukpo tee le shi kaa la lu kɔma mu ɛkpasu iyi ii ngyi mu ekpasu iyi inzumbɛku wu, kaa la lu yidu mbala kiya ingyinangyina ingyi ki du yi, akwɛyi 12 lu gbɛlɛ Ada ɛnyi iyɔkpɔɔ laa ɔnyɛ, moo uwu gba e shi ki domo tee la ki yi ogbo mu ogu uwu bɔkɔ o shi la wambwalu kwuyengwu ɛsu irimo iyi ɛbɛ awu. 13 Moo a wa nzu ma mu ɛkpasu iyi ipwu akwɛyi e bo nzu mbaa ɛsu irimo iyi Umɛ wu, uwu bɔkɔ e pwu idɛnyi wu, 14 uwu bɔkɔ munyi wu gba oo sa nzu ma le, gba o gba la ingbomo nzu o kpa nzu le.

15 Okrasi gba akwu uwɔ uwu Ukpo uwu bɔkɔ eyi i mawu mo awu. Uwu gba akwu Umɛ ɔnzɔnu uwu kwonze uwu a ka apula iyi o wo lɛɛbi ma le. 16 Moo i zɛ mawu gba Ukpo e wo kiya ingyinangyina moshi mbala mu kwudu kwɔlɛ le, apula iyi bɔkɔ o ma yi mbala iyi bɔkɔ o ma yi mo, i kyo mbala ɛndu iyi ekpasu mbala alɔgbulɔ umba Ukpo mbala asu mbala apula iyi i yi ekpasu mbala idomo; Ukpo e wo yi lɛɛbi mbala wu, kwuwo wu. 17 Okrasi e yi dɛ ishi kiya ingyinangyina ki bi yi le, uwu gba a ra la apula lɛɛbi mu riyi yi le. 18 Uwu gba akwu reshi ingyi ɛnwu wu, ɔshɔshi le; uwu gba akwu undu uwu kwunyɔ ungwu ɛnwu le. Uwu gba akwu Umɛ ɔnzɔnu uwu kwonze uwu bɔkɔ o yi wu mo mu kwuvɔ le kaa uwu gba lakwu uwu kwonze mu apula lɛɛbi le. 19 Moo i she la Ukpo tee iyinayina iyi bɔkɔ i yi mawu, li yi mu Umɛ wu, Ɔzhizɔsi tete. 20 I zɛ mu Umɛ ele gba Ukpo a gba la kwudu kwɔlɛ lɛɛbi e lomesu mbala ɛnwu le. Ukpo e bo la iŋɔma iyoloto mu ɛnzhi umba Umɛ mu kwuwɛyi ungwu lukwu akwɛyi a gba laa apula lɛɛbi, iyi i yi mɛzhi mbala iyi i yi moshi e lomesu mbala ɛnwu.

21 Mekyi, lu ndama mbala Ukpo akwɛyi lu kwu agewa wu kwuwongu apula iyira iyi lu wo mbala iyi lu bi egbo yi. 22 Kekelele ba Ukpo e wo yi lu kwu ɛmɛza wu ŋa kwuwongu lukwu undu Umɛ wu, kaa la lu yi kɛrikɛri, sɛsɛ mbala enzu umba bɔkɔ o yi ingbomo midu wu mo. 23 Lunyi ba la lu so wu mu luzɛ undu ikwu idu lu fulo, la lu rima ngiri, la lu lafya laa eyi ifulomo iyi lu fya kwuyengwu lu pwa iso iyeshi ɛlɛ awu mo. Akwu kwuwongu iso iyeshi ɛlɛ gba, Imi, Ɔpɔlu, mi kwu umɛgba le - iso iyeshi iyi bɔkɔ ɔ tanu yi laa uwewe mu kwudu kwɔlɛ awu.

24 Kekelele mi yi mu ɔnyɛ imuma kwuwongu inyashi iyi mi yi mu imama kwuwo yi, kwuwongu mu inyashi imama mi ɛlɛ, mi yi mu imbwama kaa la mi nyɔlɔ iyi bɔkɔ i shimo mu inyashi iyi Okrasi a ma kwuwongu ɛnwu wu, ɔshɔshi. 25 Ukpo gba e shi mi kwu umɛgba uwu ɔshɔshi le. E shi mi ɛduma ɛlɛ tee la mi wo kwuwo yi. Inyi gba akwu ɛduma iyi anu itama iyi iso wu lɛɛbi le, 26 iyi bɔkɔ e nvye yi mo laa enzu ngbaa mekyi, kekelele ba a wa yi a zɔ enzu wu-o. 27 Ukpo a gyi tee la wu kwunvyeru wu ma laa enzu wu, kwunvyeru ungwu ɔnyɛ ungwu e shi laa enzu lɛɛbi. Kwunvyeru kwɔlɛ gba akwu tee Okrasi e yi ma yi, kwuwo kwɔlɛ lu yi ogbo mu inzumbɛku iyi Ukpo.

28 Kwuwo kwɔlɛ, ki tanu iyi Okrasi laa onzu uwunawuna. Ki tu mbo mo, ki zɔ mba mu ilukwu iyi ki yi yi kaa la ki bo laa onzu uwunawuna uwu bɔkɔ e lomesu mbala Okrasi kaa la kɔma midu iyi Ukpo. 29 Kwuwo kwɔlɛ, mi yi mu ikyikyimo mu ekpasu iyi bɔkɔ Okrasi ee shi mi, iyi bɔkɔ i yi mu ɛduma iwomo ma mi.