1 Kwuwo kwɔlɛ, ɛmɛnɛ mi, umba idɛnyi mi, lu lumeyi gyɔɔ! Lunyi gba lu kwu ɔnyɛ mi mbala rigbɛ ingyi ɛduma mi le! La lu shɔɔkɔ, la lu rima gbagiri mu Ɔkwu imbwaluma.

2 Iyodiya mbala Ositiki, shɔɔkɔ, mi kpa yi ɛshɛku tee, la lu nyama mbala esu kwuwongu lunyi wepepoyi lu kwu umba Ɔkwu. 3 Akwɛyi uŋɔ tete, onzu uwopo mi uwu ɛduma, mi gyi tee kaa mbwama laa eko mbɔlɛ; moo o wo ɛduma gyɔɔ iyi anu itama iyi iso iyesheshi ɛlɛ mbala mi, i kyo mbala Ɔkilɛmɛ mbala enzu lɛɛbi umba o wo ɛduma mbala mi, umba bɔkɔ ɛnyi mba i yi mu kwokpo ungwu Ukpo ungwu enzu umba o yi kwunyɔ.

4 Lunyi la lu mwɔnyɛ mu Ɔkwu kwuyengwunanguna. Mi gba mi so yi kpɔ: La lu mwɔnyɛ!

5 Lunyi la lu yi egbo mɛzhi mbala uwewe. La lu lolo tee Ɔkwu a nda la igbama fo. 6 Lunyi la lu wo egbo gidigidi kwuwongu kiya kinyinyi mo, mu Ukpo ilɛma yi ba la lu nda Ukpo kiya ingyi lu gyi, ba la lu nda wu laa ɛnyi igbɛlɛma ma mu akɔ yi. 7 Akwɛyi idigbomo iyi Ukpo, iyi bɔkɔ onzu e do te a zɔngɔma yi ma mo awu, ii gbo idu yi mbala egbo yi ma kwuwongu ikyo mesu yi mbala Okrasi Ɔzhizɔsi.

8 Mu imbwama yi , ɛmɛnɛ mi, la lu nyɔlɔ egbo yi ma mbala apula iyeshi iyi bɔkɔ i do iduma ma: apula iyi bɔkɔ akwiyi ongbulolo, iyi kwuyi, iyesheshi, ɛsɛsɛ, iyi o gyi yi, mbala iyi umwɔ. 9 Lunyi la lu wo apula iyi bɔkɔ lu vɔngɔ munyi mi mbala iyi bɔkɔ lu na munyi mi awu, laa isisomo mi mbala apula iwomo mi. Akwɛyi Ukpo uwu bɔkɔ ee shi nzu idigbomo awu ee yi mbala yi.

10 Mi mwɔnyɛ gyɔɔ, mi gba mi gbɛlɛ Ɔkwu ɛnyi kwuwongu mizhikembo iyi kwuye gyɔɔ lu gba lu zɔ tee mi yi mu akɔ yi kpɔ. Mi zɔ tee lu lu mi afyima laa imbwama mo, lunyi lu fya kapa kaa la lu zɔ yi ma mo le bi. 11 Imi ba iyi mi yi mu isomo le akwu kwuwongu mi mate o lu mi afyima le mo, moo mi vɔngɔ-ɔ tee ingyinangyina ingyi bɔkɔ mi yi ngyi ki do mi mo. 12 Imi mi yitu iyi rewa mbala i yi kiya ingyi kwuwo gyɔɔ. Mi vɔngɔ kwunvyeru kwɔlɛ, kaa munamuna, kwuyengwunanguna, akwiyi gba ubwu mi a nyɔlɔma naa mi yi lonzu, mi yi kiya gyɔɔ naa mi yi ngyi bwɛɛ bi, i kpomekya. 13 Mi do kiya ingyinangyina iwomo kwuwongu Ekpasu iyi bɔkɔ Okrasi e shi mi.

14 Lunyi ba lu wo ɔnyɛ bɔkɔ lu mbwa mi ma mu kwuyengwu inyashi mi awu. 15 Lunyi enzu umba Ofilipiya lu yitu kyoriri tee kwuyengwu mi lafya laa Omasedoniya kwuyengwu anu itama iyi Ilɔ Iyesheshi mu iyemo awu, lunyi kɛɛkyi gba lu kwu ɔshɔshi uwu bɔkɔ a mbwami ma le; lunyi kɛɛkyi gba lu yi mbala mi le meka iyi ɔnyɛ mi mbala ubugyi mi.

16 Moo kwuyengwu mi yi mu Otesalonika awu akwɛyi ugɔ a kpami ma lala, lu lɔma laa imbwama yi lu ka mi i pika izhi ikpɛnyi ma. 17 Akwu tee mi gyi tee la mi na rɛshi munyi yi le byi mo; Imi mi gyi tee rigbɛ ingyi ɛduma yi la ri kyomo le byi.

18 Mu kwuye kwɔlɛ kiya ingyi mi gyi lɛɛbi mi yi ngyi-e tabɔkɔ Ɛpafɔrɔditu a ka mi laa rɛshi yi lɛɛbi-e le. Apula iyi mi yi yi ele lala i pika igɔ mi ma. Apula ɛlɛ i yi kyamate apula iyi umbwɔ ferere laa Ukpo tayi; ɛlɛ gba akwu isabɔ iyi bɔkɔ i she laa Ukpo akwɛyi a na yi le. 19 Akwɛyi Ukpo mi, kwuwongu esheshi wu iyɛku, ee shi yi kiya ingyinangyina ingyi bɔkɔ lu gyi i zɛ mu Okrasi Ɔzhizɔsi. 20 Iduma lakwu iyi Ukpo Ete nzu iyɔkpɔɔ ba ɔkpɔɔ! Li yi tayi.

21 Enzu umba Ukpo umba bɔkɔ o kwu umba Okrasi Ɔzhizɔsi la lu gbɛlɛ mi mba ɛnyi. Ɛmɛnɛ mi umba bɔkɔ o yi munɛ mbala mi o lɔ ma tee lo gbɛlɛ yi ɛnyi. 22 Enzu umba Ukpo lɛɛbi umba bɔkɔ o yi munɛ o lɔ ma tee lo gbɛlɛ yi ɛnyi, i kyo enzu umba kwogba ugu ɔsu Osiza.

23 Esheshi iyi Ɔkwu Ɔzhizɔsi Okrasi li yi mbala yi lɛɛbi.