1 Mu imbwama yi, ɛmɛnɛ mi la lu mwɔnyɛ kwuwongu ilomesu yi mbala Ɔkwu. Mi yi aka mo gba mi gbala iso iyi mi ka yi mekyi awu ikama, kwuwongu iso ɛlɛ ii gbo yi mo. 2 La lu ngbɛndu mbaa enzu umbira mbamba, izu mbamba, umba bɔkɔ o bɔkushi tee mega ɛnwu o kpolo yi mo awu. 3 Akwu kinzu gba ki fya ɛsɔ izɛma shɛ le, moo akwu umba mo. Kwundu uwu Ukpo gba aa mbwa nzu ma gba kii gbo Ukpo oya le ba ki mwɔnyɛ kwuwongu ikyomesu nzu mbala Okrasi Ɔzhizɔsi. Kinzu ki fulo egbo nzu mu ɛduma iyi ɛnwu mo. 4 Imi mafyi mi mi yi kwuyi ungwu mi kwɛnwu mu ɛduma iyi ɛnwu tayi. Akwiyi gba onzu uwufo yi e yi ɛnwu ikwumo, Imi mi ka wu ma. 5 Imi o zɛ mi ɛsɔ ma ɔnuwu kwɔfyi ungworanda. o mba mi onzu uwu Izirɛ, mi wɔ mu kenzu unga Obezhami, Imi mi kwu Iburu shɛ. Mu iso iyi Ɛrama iyi Azhu imbwaluma lala, Imi mi kwu Ofarisi,

6 mi bɔkushi nzhii ba mi lo wa mbwalu inyashi. Gba onzu ee yi ototo midu iyi Ukpo kwuwongu ɛrama iyi Omosisi imbwaluma, ba mi yi ingbomo mo. 7 Apula ɛlɛ lɛɛbi iyi bɔkɔ mi ri kule ma yi mekyi, kekelele ba mi to yi tee akwu kiya kinyinyi fo kwuwongu Okrasi. 8 Akwu apula ɛnyi kɛɛkyi mo; Imi mi to apula lɛɛbi tee akwu kiya kinyinyi fo gba mi masa yi mbala iyi bɔkɔ i yi umwɔ i ka le, iyi bɔkɔ akwu iyitu iyi Okrasi Ɔzhizɔsi Ɔkwu mi le. Kwuwo wu mi kala iyinayina kuleyi; mi ma yi mate akwu kwoza tayi kaa la mi fya Okrasi ma, 9 kaa la mi kyomesu mbala wu. Imi mi yi ototo uwami uwu bɔkɔ o fya wu ma mu Ɛrama iyi Omosisi imbwaluma fo. Kekelele mi yi ototo kuwongwu ikwu idu lu fulo mu Okrasi, ototo uwu bɔkɔ e ngyi mbaa Ukpo ba e yi undu mu ikwu idu lu fulo. 10 Igyima mi gba akwu tee la mi yitu iyi Okrasi, la mi yi ekpasu iyi bɔkɔ i yi wu mo mu kwuvɔ awu, kaa la mi kyo mu inyashi imama mbala wu akwɛyi mii yi kyamate uwu tayi mu lukwu wu, 11 Imi mi yi eyi ifulomo te Imi tete oo yi mi mo mu kwuvɔ gba mi kpomo.

12 Imi mi zɔ te mi fya ɛlɛ lɛɛbi ma-a mo nana Imi mi nyɔlɔma mu ingyinangyina-a mo. Imi mi yi mu kushi ibɔma kaa la mi fya rigbɛ, moo akwu kwuwo kwɔlɛ gba Okrasi Ɔzhizɔsi a ŋa mi le. 13 Ɛmɛnɛ mi, Imi mi zɔ tee mi fya rigbɛ ngyɛngyi ma-a mo; kiya kikpɛnyi gba mi yi mu iwomo le, gba i yi tee, Imi mi yese iyi kembo fo, igyikpɔɔ mi gba akwu tee la mi ba mbaa ingyi bɔkɔ ki yi mu keyi mi awu. 14 Kwuwo kwɔlɛ Imi mi renya mi bɔ eyi shɛ mbaa bɔkɔ mi sheyimo kaa la mi fya rigbɛ ngyɛngyi ma, rigbɛ gba akwu tee Ukpo a ya mi ma iyi kwunyɔ moshi kwuwongu Okrasi Ɔzhizɔsi.

15 Kwuwo kwɔlɛ, kinzu lɛɛbi umba bɔkɔ ki kɔma mu kwundu awu i shoshi te la ki yi egbo ɛlɛ te. Akwiyi gba ba umbafo yi o yi egbo ewa meka yi, Ukpo ee shi lu zɔngɔma yi ma marimari. 16 Munamuna mbaa bɔkɔ ki ba-a, la ki sheyimo keyi mu ɔgwuzɛ ɔwu.

17 Ɛmɛnɛ mi, mi gyi tee la lu vɔngɔ munyi mi. La lu bɔ eyi mbaa enzu umba bɔkɔ luzɛ mba lu zɛ kyaa mbala iyi bɔkɔ ki zɔ yi awu. 18 Imi mi so yi iso ɛlɛ kwuye riba riba dɛ-ɛ, mi gba mi so yi kpɔ la ɛnyɛ meyi tee: enzu gyɔɔ mu iwomo mbo i zɔ tee umba akwu agewa umba lukwu undu Okrasi mu kwuwɛyi ungwu lukwu. 19 Umba imbwama mba akwu kwoba ungwu ɔyi, kwuwongu ukpo mba gba akwu ekweyi iyi ɛnwu mba le. Umba o kwɛnwu mu apula iyi lovya, akwɛyi egbo ibyima mba ba akwu mu apula iyi kwudu kwɔlɛ kɛɛkyi. 20 Kinzu ba ki kwu enzu umba kwogba ungwu oshi, ba ki yi mu eyi ifulomo iyi Usama nzu, Ɔkwu Ɔzhizɔsi Okrasi, uwu bɔkɔ ee ngyi moshi. 21 Mu ekpasu wu iyi bɔkɔ e domo te e rɛsu mu apula lɛɛbi awu, a ŋanga ɛnwu nzu iyi lukwu ɛlɛ ma akwɛyi ee wo yi mate ɛnwu iyawu iyi inzumbɛku tayi.