1 Kwupwu kwɔlɛ kwu ngyi mbaa nzu, Imi Ɔpɔlu mbala Otimoti ɛmɛgba umba Okrasi Ɔzhizɔsi. Ki ka

Laa enzu umba Ukpo lɛɛbi mu Ofilipayi umba bɔkɔ o kyomesu mbala Okrasi Ɔzhizɔsi, ikyo wa to keyi mbala wambwa mba ma:

2 Ete nzu Ukpo mbala Ɔkwu nzu Ɔzhizɔsi Okrasi le shi yi esheshi mbala egbo mɛzhi.

3 Kwuye ungwunanguna bɔkɔ mi byi egbo yi de mi gbɛlɛ Ukpo mi ɛnyi; 4 akwɛyi kwuyengwunanguna bɔkɔ mi lɛ Ukpo laa yi lɛɛbi de, mii lɛ laa ɔnyɛ makɔ 5 kwuwongu lu mbwa mi ma mu ɛduma iyi iso iyi Ukpo ngbaa mu ɔnuwu kwonze nzhii ba kwuye kwɔlɛ. 6 Kwuwo kwɔlɛ, Imi mi yitu laa egbo mi lɛɛbi tee, Ukpo uwu e ye laa ɛduma iyesheshi ɛlɛ iwomo ma yi awu, ee le ye mu iwomo nzhii ba aa mbwa yi ma ɔnuwu Kwɔfyi ungwu Okrasi Ɔzhizɔsi a ba gbama. 7 Lunyi lu yi mu egbo mi kwuyengwunanguna! Mi ngbomo mo tabɔkɔ mi byi egbo ɛlɛ te ma yi; moo lu lo ewo mbala mi mu esheshi ɛlɛ iyi bɔkɔ Ukpo e shi mi, laa kekelele bɔkɔ mi yi mu ugugyi ele mbala kwuyengwu mi gɔ iyami mu enzu epwu igbama mbala izɔma tee iso iyesheshi ɛlɛ akwu ongbulolo. 8 Ukpo gba akwu u uzɔgɔ mi le tee ongbulolo gba mi yi mu isomo le tee Imi mi pwu idɛnyi yi kyamate Okrasi Ɔzhizɔsi mafyi wu e pwu idɛnyi yi tayi.

9 Mii lɛ Ukpo tee idɛnyi li le mu ikyikyomo, mbala iyitu mbala apula izɔngɔma marimari, 10 kaa la lu yitu iyi bɔkɔ isheshi ika le. Ɛlɛ ii shi luu kwu enzu sɛsɛsɛ umba bɔkɔ o yi kwuto mo ɔnuwu Kwɔfyi ungwu Okrasi a ba gbama awu. 11 Akwɛyi luu yi ari iyesheshi shɛ, iyi bɔkɔ Ɔzhizɔsi Okrasi kɛɛkyi gba ee shi le kaa Ukpo la fya inzumbɛku mbala iduma ma.

12 Ɛmɛnɛ mi, mi gyi te la lu yitu tee apula iyi bɔkɔ i du mi ele i mbwama gyɔɔ la ishekeyi iyi iso iyi Ukpo. 13 Kwuwo kwɔlɛ, wagbomo umba kwogba ungwu ɔsu mbala enzu umba o yi munɛ lɛɛbi o yitu tee o ta mi mu ugugyi kwuwongu bɔkɔ mi kwu Umɛgba uwu Okrasi le. 14 Itama mi mu ugugyi ɛlɛ, i ka ɛmɛnɛ mi wa mbwalu Ɔkwu ɛnwu ma gyɔɔ akwɛyi kwuyengwunanguna o tanu iyi iso iyi Ukpo laa iyi fo.

15 Ongbulolo gba e yi tee umbafo mba oo tanu iyi Okrasi kwuwongu rise mbala i gyi ovyo iwomo, umbafo ba o wo mu egbo iyeshi. 16 Enzu mbɔlɛ te o wo kwuwongu o pwu idɛnyi mi, moo o yitu tee o ta mi munɛ kwuwongu bɔkɔ Ukpo e shi mi ɛduma iyi igbomo iyi iso iyesheshi ɛlɛ le. 17 Uzhi uwu kwonze o tanu iyi Okrasi la egbo ikpɛnyi mo, oo tanu iyi Okrasi kwuwo ungwɛmba; oo ma kyamate umba oo kyo mi inyashi ma kwuye ngwɔlɛ bɔkɔ mi yi mu ugugyi ele.

18 Ɛlɛ ba akwu kiya kinyinyi mo! Mi yi mu ɔnyɛ imuma kwuwo ngwɔlɛ. Ɔnyɛ mi gba e yi te, mu ɔgwuzɛ uwunawuna o yi mu anu itama iyi Okrasi - laa egbo iyeshi loo, laa egbo iyira. Kwuwo kwɔlɛ, mii so wu mu ɔnyɛ imuma, 19 kwuwongu mi yitu tee, Ukpo ilɛma yi mbala imbwama iyi bɔkɔ ii ngyi mbaa Kwundu uwu Ɔzhizɔsi Okrasi awu, ii shi oo wa mi ma mu ugu ugyi. 20 Igyi kpɔ mi mbala eyi ifulomo mi gba akwu te la mi fɔma mu ɛduma mi iwomo mo, mi ba gyi te kwuyengwunanguna, egbo mi li kɔma kaa Okrasi la fya iduma kwuwo mi, shi mi yi kwunyɔ, shi mi yi kpomo mo. 21 Moo kwunyɔ akwu mbɛ? Munyi mi, kwunyɔ akwu Okrasi. lukwu ba akwu kule. 22 Gba akwiyi mi ye la kwunyɔ, de ba i zɔ te mii wo ɛduma iyesheshi mii kyo. Inyete mi yitu iyi bɔkɔ mi mulɛ mo. 23 Egbo mi i kama epo. Igyima mi iyɛku gba i yi tee la mi lafya la kwudu kwɔlɛ kaa la mi yi mbala Okrasi. Ɛlɛ i shi i ka le gyɔɔ; 24 tetete, kwuwo yi, i sheshi i ka tee la mi yi la kwunyɔ bɛnɛ. 25 Imi mi nyama la egbo mi lɛɛbi te, te gba i yi le. Imi mii yi mbala yi lɛɛbi, kaa ɔnyɛ yi mbala ikwu idu lu fulo yi li kyomo, 26 kaa kwuwongu iyimo mi mbala yi kpɔ, ii shi luu yi kwuyi ungwu esheshi ungwu lu kwu ɛnwu ma mi mu iwomo yi mu luzɛ mbala Okrasi Ɔzhizɔsi.

27 Kekelele, iyi bɔkɔ i sheshi i ka gba i yi tee la lu zɛ luzɛ undu bɔkɔ iso iyesheshi iyi Okrasi i gyi, kaa shi mi fya kapa mi ka munyi yi, naa mi fya kapa mi ka munyi yi mo, la mi pwa tee lu rima ngiri laa egbo ikpɛnyi mu ewa ikirimo kwuwongu ikwu idu fulo iyi iso iyi esheshi ɛlɛ. 28 La lu wiyi iyi agewa yi mo; la lu kɔ egbo ma kwuyengwunanguna, akwɛyi ɛlɛ i zɔ mba te umba o fɔma lunyi ba lu shiri mba ma moo Ukpo gba e shi yi ekpasu le. 29 Moo kapa unga Ukpo e shi yi ele akwu kaa la lu wo ɛduma laa Okrasi, akwu kwuwongu ikwu idu fulo ma wu kɛɛkyi mo, i kyo kaa la lu ma inyashi kwuwo wu tete. 30 La lu kyo ewo mbala mi mu ewa itomo ɛlɛ. Akwu ewa ɛlɛ tete gba lu ma mi mu itomo mekyi le, inyi gba mi degbo mu itomo kyamate bɔkɔ lu pwa awu.