1 Lunyi lu fya ɛnwu ɛkɔ ma kwuwongu lu kwu umba Okrasi, akwɛyi idɛnyi wu i gbo yi idu mo. Lu yi ikyomesu mbala Kwundu uwu Ukpo, akwɛyi lu yi ari iyeshi mbala eyembembyi iyesu. 2 Kwuwo kwɔlɛ, amasa yi lakwu ikpɛnyi, idɛnyi yi lakwu ikpɛnyi, la lu kwu wakpɛnyi mu kwundu mbala egbo ibyima yi kaa ɔnyɛ mi la nyɔlɔma. 3 La lu wo kiya ingyinangyina kwuwongu imɛyɛyi nana ɛnwu ikwumo mo, lunyi ba la lu gyi ɛnwu yi ma, la lu to enzu umbafo tee, o shi ka o ka yi ma. 4 Kwuwo kwɔlɛ la lu yese mbesu, uwewe le yese mbaa esheshi iya wu byi mo. 5 Ari iyi bɔkɔ Okrasi Ɔzhizɔsi e yi yi awu gba la lu yi yi le tete:

6 Uwu e yi kya ta Ukpo tayi,

tetete e to te mega aa masa ɛnwu mbala Ukpo mo.

7 Uwu ba e to ɛnwu te akwu kiya kinyinyi te mo,

akwɛyi a ra la ɛnwu e wo umɛgba.

E to ɛnwu kyamate onzu tayi

akwɛyi e bo mu ɛnwu iyi onzu.

8 Tabɔkɔ e yi mu ɛnwu iyi onzu awu, a gyi ɛnwu ma akwɛyi e lomo nzhii ba lukwu wu,

E kpomo mu kwuwɛyi ungwu lukwu.

9 Kwuwongwu ɔlɛ Ukpo e shi wu kwunzu ungwu kwu ki ka le,

akwɛyi e shi wu ɛnyi iyi bɔkɔ i ka ɛnyi iyinayina ma.

10 Kwuwongwu inzumbɛku iyi ɛnyi iyi Ɔzhizɔsi ɛlɛ,

epunu lɛɛbi iyi bɔkɔ i yi moshi laa iyi bɔkɔ i yi mu kwudu kwɔlɛ laa iyi bɔkɔ i yi mɛzhi kindo,

i kwumo mu idu iyi Ɔzhizɔsi,

11 akwɛyi lɛɛbi mba o so gedegede tee, Ɔzhizɔsi Okrasi akwu Ɔkwu,

akwɛyi Ada Ukpo aa fya iduma ma.

12 Kwuwongwu ɔlɛ, ɛmɛza mi, kyamate bɔkɔ lu koko lu lo mi mo kwuyengwu bɔkɔ mi yi mbala yi awu, kekelele bɔkɔ mi yi mbala yi fo le lala ilomo yi li ka le ŋa. La lu so wu mu ɛduma iwomo la iyi mbala ipwuluma kaa isama yi li nyɔlɔma, 13 moo Ukpo e yi mu ɛduma iwomo mu ma yi iyɔkpɔɔ kaa la lu yi egbo kaa la lu lomo la iyi bɔkɔ uwu a gyi awu.

14 Iyinayina iyi bɔkɔ lu wo li yi ezhini nana kaambu mo,

Iyinayina iyi bɔkɔ lu wo li yi ɛzhini mbala kaambu u mo

15 kaa la lu kwu ɛmɛ umba Ukpo umba bɔkɔ o yi sɛkɛnɛ mbala sɛsɛ, umba bɔkɔ o yi meka iyi enzu umba ingbomo mbala itutumo umba kwudu kwɔlɛ La lu lemo meka mba kyamate elovyo bɔkɔ i lemo moshi tayi, 16 akwɛyi la lu kyo lu zɛ mba ɛlɔgbulɔ iyi kwunyɔ. Gba lu wo tayi, mii fya kwuyi ungwu bɔkɔ mi kwɛnwu ma yi ɔnuwu Kwɔfyi ungwu igbama ungwu Okrasi, moo ɛlɛ i zɔ tee ebirigo mi mbala ɛduma mi akwu shaa mo.

17 Imi mi ma inyashi ba mi rala ɛnzhi mi mi wo isabɔ laa Ukpo kyamate bɔkɔ lunyi tete lu ma inyashi kwuwongu ikwu idu lu fulo yi awu. Gba akwu tayi, Imi mi mwɔnyɛ mbala yi lɛɛbi. 18 Lunyi tete la lu mwɔnyɛ, la lu zɔ ɔnyɛ yi ma mbala mi.

19 Gba Ɔkwu a nyama, mi yi egbo tee mi lɔ Otimoti ma munyi yi para, ka laa mi pwa ɛza yi iyi ɔnyɛ kaa li ka mi ɛnwu ma. 20 Uwu kɛɛkyi gba e yi egbo kyaa mbala mi le, gba ba a bɔ eyi shɛ mbaa yi le. 21 Umba bɔkɔ o shi mo le, uwewe a bɔ idu mu kiya ingya wu, moo akwu mu kiya ingyi Ɔzhizɔsi Okrasi mo. 22 Lunyi mafyi yi ba lu yitu tee Otimoti a bɔ ngiri a zɔ ɛnwu ma, kyamate umɛ mbala ada tayi, uwu mbala mi ki wo ɛduma kyaa kwuwongu iso iyesheshi ɛlɛ. 23 Kwuwo kwɔlɛ, mi yi egbo tee mi lɔ wu ma munyi yi para mizhikembo iyi mi yitu iyi bɔkɔ i bi du mi. 24 Imi ba mi fulo idu mu Ɔkwu tee, i to kwuye gyɔɔ mo akwɛyi Imi mafyi mi mi nyɔ mi ma yi.

25 Imi mi ka amasa tee, ifate kaa la mi lɔ umanyi nzu Ɛpafɔrɔditu ma munyi yi, uwu e wo ɛduma ba e gbo ebirigo kya mbala mi, bɔkɔ lu lɔ wu ma kaa la mbwami ma awu. 26 E yi mu ibɔkpɔ te la ma yi, egbo wu ba i nɔma mo kwuwongu lu pwa tee a nɔ ofya. 27 Iyesheshi a pwu ofya akwɛyi i shi bwɛɛ kaa le kpomo. Ukpo ba a ma eyembembyi wu, akwu uwu kɛɛkyi mo, i kyo mi tete, kaa la mi ma ubugyi uwu bɔkɔ a ka te mo mo. 28 Kwuwo kwɔlɛ, Imi mi yi mu igyakpɔɔ kaa mi lɔ wu le so munyi yi, kaa la lu gba la ɔnyɛ imuma kwuyengwu bɔkɔ lu ma wu, akwɛyi ubwu ugyi mi ee bomo. 29 La lu na wu laa ɔnyɛ kwuwongu akwu u mbwalu uwu Ɔkwu. Enzu mbɔlɛ te lɛɛbi kyamate uwu te, lo lo mbo mo, 30 kwuwongu e to kwunyɔ wu e shi, akwɛyi i shi bwɛ kaa le kpomo kwuwongu ɛduma iyi Okrasi, kwuwongu kaa la mbwa mi ma mu iyi bɔkɔ lu do yi iwomo awu.