1 Mekyi lunyi umba bɔkɔ lu kwu Azhu mo lu yi kyamate enzu umba bɔkɔ o kpomo-o tayi kwuwongu lu lo Ukpo ma mo, lu gba lu ngbo la Ukpo mo. 2 Kwuye kwɔngu lu mbwalu ɔgwuzɛ uwu enzu umba kwudu kwɔlɛ. Lu mbwalu onzu uwoyi awu, ɔsu uwu ɛndu iyira mu oshi. Ɛndu iyira ɛlɛ i yi mu ɛduma iwomo mu egbo iyi enzu umba bɔkɔ o lo Ukpo ma mo. 3 Kinzu, Azhu lɛɛbi tete ki yi kyamate umba te kwuye ungwekyi. Ki wo kiya ingyi ingbomo ingyi egbo nzu i gyi, ki yi mu kiya ingyira ingyi ki gyi te la ki wo le mbala ingyi ki kamasa te la ki wo le mu iwomo. Kinzu ki kwu enzu umba ingbomo kyamate uwewe te, akwɛyi Ukpo e wo amba mbala nzu. 4 kwuwo ngwɔlɛ Ukpo ba e pwu idɛnyi nzu gyɔɔ, eyembembyi wu ba i mbulama munyi nzu. 5 Kinzu ki yi kyamate umba bɔkɔ o kpomo mo-o awu, tetete Ukpo e shi nzu ki yi kwunyɔ mu Okrasi. Esheshi iyi Ukpo gba i sa yi ma le. 6 Ukpo e yi nzu mo mu lukwu mbala Okrasi Ɔzhizɔsi akwɛyi kwuwo ngwɔlɛ e kyo nzu mesu mbala Okrasi, e shi nzu mu ukpa uwɛsu moshi. 7 Idɛnyi iyi bɔkɔ Ukpo a zɔ mu Ɔzhizɔsi Okrasi i zɔ te Ukpo e shi esheshi iyɛku laa enzu lɛɛbi. 8 Ukpo a sa yi ma kwuwongu esheshi wu kwuwongu lunyi lu kwu idu lu fulo mawu, moo akwu kwuwongu ɛduma iyesheshi yi mo. Akwu rɛshi ingyi Ukpo. 9 Ukpo a sa yi ma akwu kwuwongu ɛduma iyesheshi iyi lu wo mo, kwuwo kwɔlɛ onzu uwunawuna le kwu ɛnwu mo. 10 Kinzu ki kwu ɛduma iyi Ukpo e wo mu Okrasi Ɔzhizɔsi kaa la ki wo ɛduma iyeshi iyi bɔkɔ Ukpo a nɔngɔ e shi nzu mekyekyi kaa la ki wo.

11 Kwuwo kwɔlɛ lunyi enzu umba bɔkɔ lu kwu Azhu mo awu, la lu lolo iyimo yi kwuye uŋwekyi. Azhu o ya yi te <<Enzu umba kworiyo>> umba ba o ya ɛnwu mba te <<Wazɛsɔ ma>> ɛsɔ izɛma ba akwu kiya ingyi anzɔnu o wo mu ɛnwu mba. 12 Lunyi la lu lolo te kwuye kwɔngu lu yi Okrasi mo. Lunyi lu kyo mu enzu umba Isirɛ mo, lunyi ba lu kyo mu kenzu igyirima unga Ukpo mo. Lunyi lu yi mu kwudu kwɔlɛ lu yi Ukpo mo ba lu fulo eyi te lu fya wu mo. 13 Lunyi lu ndama lu shi Ukpo kwuye ungwekyi, kekelele ba lu kyo mesu mbala Ɔzhizɔsi Okrasi. Ukpo e bo ye kɛlɛ mbala wu, i zɛ mu ɛnzhi umba Okrasi. 14 Moo Okrasi mafyi wu gba e bo la oloto mekeka iyi Azhu mbala umba akwu Azhu mo le. Mu kwuye ungwekyi kwogyigakwu ka Azhu ma mbala enzu umba bɔkɔ akwu Azhu mo, kekelele ba Okrasi e shiri kwogyiga kwɔngu ma a, akwɛyi uzhi uwu enzu wepo mbɔlɛ o vindɔ onzu ukpɛnyi ŋa. 15 Lukwu undu Okrasi ba lu ngbɛ ɛrama ɛnyi ma kaa le kyo Azhu mbala umba akwu Azhu mo mesu kaa lo kwu enzu wakpɛnyi. Mu iwomo ɛlɛ te, Okrasi e shi oloto le yi mekeka iyi Azhu mbala umba bɔkɔ akwu Azhu mo. 16 I zɛ mekeka iyi lukwu undu Okrasi bɔkɔ e kpomo mu kwuwɛyi awu, gba Azhu mbala umba bɔkɔ akwu Azhu mo, o wo anya iyi esu fo le. 17 Okrasti e bo a tanu iyi i ŋɔma iyi oloto la enzu umba bɔkɔ akwu Azhu mo, mbala Azhu. 18 kwuwongu kiya ingyi bɔkɔ Okrasi e wo e shi nzu le, gba Kwundu uwu Ukpo a mbwa la Azhu mbala enzu umba bɔkɔ akwu Azhu mo ma kaa lo bo mbaa Ada ɔsu Ukpo.

19 Kwuwo kwɔlɛ lunyi umba bɔkɔ lu kwu Azhu mo le, lu kwu agboga fo. Lunyi ba lu kwu uzhi ukpɛnyi mbala enzu umba Ukpo ŋa, lu kwu enzu umba kwogba ungwu Ukpo. 20 Lunyi, tete, o mbo yi mu ɔla uwu bɔkɔ wa zɛ ilɔ mbala anukenzu gba o bɔ wu mɛzhi le, kwokyi ungwu bɔkɔ kwu rala ugu awu gba akwu Okrasi Ɔzhizɔsi le. 21 Uwu gba akwu onzu uwu bɔkɔ a ra la ugu ele ngyɔɔ akwɛyi e shi wu kaa la bulɔma kyamate ɔtɛpu uwu bɔkɔ o shi wu Ɔkwu. 22 Mu Okrasi gba lunyi umba bɔkɔ lu kwu Azhu mo o ngbɛ yi o lo mesu mbala nzu mu Kwundu kaa la ki kwu ɔtɛpu uwu Kwundu uwu Ukpo a ŋɔma.