1 Imi Ɔpɔlu, uwu bɔkɔ mi kwu u gbo ugu ugyi ugyi kwuwongu Ɔkwu awu, mi kpa yi ɛshɛku te la lu zɛ luzɛ undesheshi undu lu zɔ te lunyi lu kwu wa mbwalu Ɔzhizɔsi kego. 2 La lu kwu enzu umba bɔkɔ o to ɛmba o fulo kadu mo, la lu kwu enzu umba o yi egbo mɛzhi, la lu yidu mbala esu, gba onzu e ngbo yi mo lala la lu pwu idɛnyi wu bi. 3 La lu wo ekpasu ka lu ŋɔ moloto mbala esu, ka ilomesu iyi bɔkɔ Kwundu uwu Ukpo e lo nzu awu, li rima. 4 Ɛnwu mbala Kwundu akwu ikpɛnyi, kyamate bɔkɔ Ukpo a ya yi ma ka la lu yi eyifulomo ikpɛnyi mbala nzu awu. 5 Ɔkwu nzu akwu ukpɛnyi, ikwu idu lu fulo nzu akwu ikpɛnyi, obatisima nzu tete akwu ukpɛnyi; 6 Ukpo akwu ukpɛnyi, uwu gba akwu ete wu wa mbwalu lɛɛbi le. Uwu gba akwu ɔsu uwu uwewe le, e yi ma nzu ba e wo ɛduma ma nzu. Kwundu wu kwu yi mu enzu wu lɛɛbi.

7 Uwewe nzu ba Okrasi e shi wu rɛshi ingyi Kwundu wu ikikɔ ikikɔ . 8 Ɛlɛ gba i shi kwokpo ungwu Ukpo kwu zɔ te,

<<kwuyengwu Ɔzhizɔsi a yama a ka moshi, e shi agewa wu mizhikembo akwɛyi e shi enzu wu rɛshi ingyi apula iyesheshi iyesheshi.>> 9 (Iluma iyi << a yama a ka moshi>> i yi te? Iluma yi gba i yi te, Okrasi gba a kalama e bo mu kwudu kwɔlɛ le tete. 10 Okrasi uwu bɔkɔ a kalama e bo mu kwudu kwɔlɛ awu, u wuwu gba a yama a ka moshi le tete. E wo tayi ka le yi mu uwewe.) 11 A kwu uwu gba a ŋa enzu umbafo te lɔ kwu wa zɛ ilɔ, umbafo lɔ kwu anukenzu, umbafo lɔ kwu wa tanu iyi iso iyi Ukpo, akwɛyi umbafo ba lɔ kwu wazɔ wa mbwalu Ɔzhizɔsi iso iyi Ukpo le. 12 A ŋa enzu mbɔlɛ te ka la nɔngɔ enzu wa mbwalu ma ka lo wo wu ɛduma, kaa lo mbo ɛnwu iyi Okrasi. 13 Akwɛyi ki kyomesu kaa la ki kwu enzu wakpɛnyi mu ikwu idu lu fulo nzu mbala mu iyitu nzu iyi Umɛ uwu Ukpo; kinzu ki kwu enzu umba bɔkɔ ki kɔma, bɔkɔ ki yi kyamate Okrasi tayi.

14 Gba ki wo ɛlɛ lɛɛbi, ki yi kyamate ɛmɛshɛri mo. Kwokpo ungwu enzu wa kyoromo mbala wa mulo mu iso iyi Ukpo ungwu bɔkɔ kwu ga la enzu ganga awu, kwu do nzu ingbɛbu mu ongbulolo uwu Ukpo mo. 15 Kinzu ba la ki pwu idɛnyi iyesu, la ki tanu iyi Okrasi mu ɔgwuzɛ ongbulolo kaa la ki bulɔma nzhii ba ki yi kyamate u to keyi nzu, Okrasi tayi mu luzɛ nzu. 16 Wa mbwalu wu lɛɛbi, Okrasi a ngbɛ mba e lo mesu kyamate ingyi iyi bɔkɔ i ra la ɛnwu iyi onzu tayi. Gba wa mbwalu o gyi esu akwɛyi onzonzu e wo ɛduma iyi Ukpo e shi wu, akwɛyi ipwudɛnyi iyi Ɔzhizɔsi iyi uwewe i kyomo.

17 Kwuwongwu ɔlɛ, mi so yi shɛ mu ekpasu iyi Edego-ala te, la lu zɛ luzɛ kyamate enzu umba bɔkɔ o yi Ukpo mo, bɔkɔ egbo ibyima mba iyɔkpɔɔ akwu iyi umbwa . 18 Egbo mbo i semo mba iso iyi Ukpo. kwuwongu o yi Ukpo mo, akwɛyi o kyo ɔ kɛgba ma awu, o yi ogbo uwu kwunyɔ ungwepo ungwu bɔkɔ Ukpo e shi mo. 19 O yi lovya mo, o ra la ɛmba o shi la apula iyira iyi lovya; ɔ gyi ira iwomo iyɔkpɔɔ.

20 Lunyi ba akwu tayi gba lu vɔngɔ luzɛ undu Okrasi le mo. 21 Imi egbo mi i ka epo mo te, ɛza iyi Ɔzhizɔsi bɔkɔ lu pwa yi mbala izɔma iyi bɔkɔ ɔ zɔ yi mu reshi wu awu, akwu ongbulolo uwu e ngyi munyi wu. 22 Wazɔ yi ɛzu, ɔ zɔ yi te la lu lafya la luzɛ undekyi izɛma, mo undu gba lu ye yi mu ikyoromo akwɛyi lu ye yi mu itutumo le. 23 Kekelele la lu to ɛyi lu shi Ukpo kaa la mbwa yi ma kaa la lu ŋanga luzɛ yi ma. 24 La lu zɛ luzɛ undepo undu ototo mbala lu kɛrikɛri undu bɔkɔ Ukpo a gyi te lɔ zɛ.

25 Kwuwo kwɔngu, uwewe la lafya la imulo imuma kaa la ki so esu ongbulolo, moo kinzu lɛɛbi ki kwu ɛmɛnɛ mu Okrasi. 26 <<Gba ŋɔ wo amba, ki nyama kaa ngbomo mo>> Ki ra la amba umba onzu nzhii ba ɔnu lu bomo mo, 27 La lu shi onzu uwoyi kapa mo. 28 Onzu uwu bɔkɔ akwu uwɛlɔ, la lafya la ɛlɔ iwuma. Le wo ɛduma mu ewo wu kaa la sa ugɔ wu ma mbala igɔ iyi ayirewa.

29 La lu nyama kaa iso iyira li wɔ mu kenzu yi mo. Iso iyi bɔkɔ i mbwa la enzu ma, ii shi mbo o bulɔma gba li wɔ mu kenzu yi le. 30 Ikyo kpɔɔ, la lu shi Kwundu uwu Ukpo amba mo, mo uwu gba akwu kɛzɔ unga Ukpo a ma nzu le, te ki kwu enzu umba wu, te ɔnu uwu kwɔfyi ungwu ombu, a wa nzu ma. 31 La lu lafya la apula iyira ɛlɛ te iwomo: amba umbira, itumo duruduru, onzu ikyɛma, ari ikpama mbala luzɛ undura undunanduna. 32 La lu zɔ esu ari iyesheshi, la lu kpo lukwu undu esu. Kyamate bɔkɔ, Ukpo a gba la ingbomo yi a kpa yi kwuwongu Okrasi awu, lunyi tete la lu gba yi lu kpa esu.