1 Kwuwongwu ɔlɛ gba Imi Ɔpɔlu mi kwu onzu u gbo ugu ugyi uwu Ɔzhizɔsi Okrasi kwuwo yi, lunyi umba bɔkɔ lu kwu Azhu mo le.

2 Lunyi lu pwa yi-e, esheshi iyi Ukpo e shi mi te la mi wo yi ɛduma. 3 Ukpo a zɔ mi amasa wiyi bɔkɔ i nvyemo, kyamate bɔkɔ mi ka yi kwonze awu.

4 Lunyi lu wa iyi bɔkɔ mi ka le ma dɛ gba lu yitu te Imi mi zɔngɔma iso iyi kwunvyeru ungwu Okrasi ma le. 5 Mu kwuyengwu enzu mbekyi o shi mbo kaa lo yitu iyi ɛlɛ mo. Kwundu uwu Ukpo ba a wuyi ma la enzu wa zɛ ilɔ mbala anukenzu wa kɛrikɛri kekelele e. 6 Kwunvyeru kwɔlɛ akwu mu ilɔ iyesheshi iyi Ukpo gba enzu umba bɔkɔ o kwu Azhu mo mbala Azhu o ri esheshi iyi Ukpo kya le, o kwu ɛnwu ikpɛnyi, o ri iyi Ukpo e so e shi mɛzhi meka iyi Okrasi kya.

7 Ukpo e shi mi esheshi wu mbala ekpasu wu iyɛku kaa la mi wo wu ɛduma iyi anu itama iyi ilɔ iyesheshi. 8 Imi uwu bɔkɔ mi nyɛma mi ka umbwambwa uwu enzu umba Ukpo mo le lala; Ukpo e shi mi esheshi wu kaa la mi tanu iyi ilɔ iyesheshi iyɛku iyi Okrasi ɛlɛ la enzu umba bɔkɔ o kwu Azhu mo, 9 Ukpo uwu bɔkɔ e wo kiya ingyinangyina le gba a ŋa mi kaa la mi zɔ uwewe iso iyi kwunvyeru ungwu bɔkɔ a da zɔ onzu uwunawuna dɛ mo. 10 Ukpo e wo ɛlɛ kwuwongu kaa la ra la wa mbwalu wu kaa la zɔ ilukwu wu laa asu mbala enzu umba bɔkɔ o yi idomo moshi. 11 Ukpo e wo ɛlɛ kaa iyi a ra yi mu egbo wu ngbaa mekyi awu la nyɔlɔ yi ma mu Ɔkwu nzu, Ɔzhizɔsi Okrasi. 12 I zɛ meka iyi Okrasi mbala ikwu idu lu fulo ma wu, ki turu ki gba la Ukpo fɔɔ mu egbo ikpɛnyi. 13 kwuwo ngwɔlɛ mi kpa yi ɛshɛku te ɛnwu yi li tumo kwuwongu inyashi iyi bɔkɔ mi yi mu imama kwuwo yi mo, moo inyashi ɛlɛ lɛɛbi akwu kwuwongu esheshi i ya yi.

14 Kwuwongwu ɔlɛ mi bɔ epunu mi mɛzhi midu iyi Ada, 15 uwu bɔkɔ e wo apula iyinayina moshi mbala ɛzhi, 16 mi lɛ Ukpo te, le shi mi inzumbɛku wu iyɛku ɛnyi kaa le shi yi ekpasu iyi Kwundu wu, 17 akwɛyi mi lɛ Ukpo te Okrasi e mbo kwogba wu midu nzu i zɛ mu ikwu idu fulo. Mi lɛ Ukpo kpɔ te lunyi lu do te li yi akpa mbala ɔla mu idɛnyi, 18 kaa lunyi mbala enzu umba Ukpo lɛɛbi lo yitu iyi wowa mbala wɔzhi mbala ibulɔma mbala indomo iyi idɛnyi iyi Okrasi, 19 kaa la lu yitu iyi idɛnyi ɛlɛ iyi bɔkɔ i ka iyitu mo lɛɛbi - kaa luzɛ yi la lu yi kyamate undu Ukpo tayi.

20 Imi mi nda Ukpo uwu bɔkɔ e do te e wo iyinaiyina iyi bɔkɔ i ka iyi ki nda naa iyi ki bi egbo ma yi mu ekpasu wiyi bɔkɔ iyi mu ɛduma iwomo ma nzu, 21 te inzumbɛku lakwu iyawu mu egbo iyi wa mbwalu wu, mbala meka iyi Ɔzhizɔsi Okrasi, iyɔkpɔɔ ba ɔkpɔɔ! Ami.