1 Imi Ɔpɔlu uzilɔ iyi Ɔzhizɔsi Okrasi mu inyama iyi Ukpo.

Mi kakwupu kwɔlɛ la wa mbwalu umba bɔkɔ o yi mu Ɛfɛsɔ umba bɔkɔ o ra gbagiri mu Ɔzhizɔsi Okrasi imbwaluma. 2 Mi lɛ Edego-ala mbala Ɔkwu Ɔzhizɔsi Okrasi te, le shi yi esheshi wu mbala egbo iyi iŋɔma iyi oloto.

3 Iduma akwiyi Ukpo, ete wu Ɔkwu nzu Ɔzhizɔsi Okrasi, uwu bɔkɔ e shi nzu esheshi iyoshi iyinayina iyi kwundu kwuwongu ki kyo mbala Ɔzhizɔsi Okrasi. 4 Kwuwongu a ŋa nzu te la ki kwu enzu umba wu dɛdɛdɛ i shi e wo kwudu kwɔlɛ le kaa la ki kwu enzu wa pɛriri umba o yi kuto mu idu wu mo.

Kwuwongu idɛnyi wu, 5 Ukpo a ka yi mekyeki te, la ki kwu ɛmɛ wu kwuwongu Ɔzhizɔsi Okrasi. Ɛlɛ gba akwu ɔnyɛ mbala igyima wu le. 6 E wo ɛlɛ te kaa la ki du wu ma kwuwongu esheshi iyawu iyɛku iyi bɔkɔ e shi nzu rɛshi kwuwongu Ɔzhizɔsi Okrasi, umɛ uwu idu wu. 7 Okrasi a wa nzu ma mu rinye akwɛyi a gbala ingbomo nzu a kpa kwuwongu ɛnzhi wu. Ukpo e wo ɛlɛ kwuwongu esheshi wu i yi gyɔɔ. 8 Esheshi iyɛku iyi bɔkɔ Ukpo e wo nzu le, e shi te kaa la ki yi ilukwu kaa la ki yitu iyi iso wu. 9 Ukpo a zɔ nzu kwunvyeru ungwu egbo wu, ungwu bɔkɔ a ka te ee wo yi mu Ɔzhizɔsi kwuwongu ɛlɛ gba ii shi wu ubwu uruwu le. 10 Ukpo ee wo iyi bɔkɔ a ka te ee wo gba kwuye kwu bo, akwɛyi apula iyi bɔkɔ i yi moshi mbala ɛzhi lɛɛbi a ngbɛ yi reshi e lomesu akwɛyi ee shi Okrasi te lakwu u to keyi yi.

11 Ukpo a ŋa nzu akwɛyi a ngbɛ nzu reshi e lomesu mbala Ɔzhizɔsi, kwuwongu a ka yi mu egbo wu diridiri te ee wo yi tayi awu, uwu ee shi iyinayina te li wo kyamate bɔkɔ i yi mu egbo wu tayi, 12 kaa kinzu Azhu umba bɔkɔ ki kwu enzu umba kwonze umba bɔkɔ ki fulo egbo mu Okrasi awu, akwɛyi ki gbo Ukpo oya kwuwongu inzumbɛku wu. 13 Lunyi enzu umba Ɛfisu ba lu kyo lu kwu ɛmɛ umba Ukpo kwuyengwu bɔkɔ lu pwa iso iyi ototo, iso iyi esheshi iyi isama. Tabɔkɔ lu na iso ɛnyi mu egbo yi akwɛyi Ukpo a ka yi kɛzɔ wu, gba akwu kwundu Ɔkɛrikɛri uwu bɔkɔ e shi yi mate bɔkɔ e so e shi mɛzhi awu. 14 Kwundu uwu Ukpo ele gba akwu kɛzɔ unga bɔkɔ ka zɔ te Ukpo ee shi nzu apula iyeshi iyi bɔkɔ a zɔ te ee shi nzu awu, kwuyengwu bɔkɔ Ukpo a ba sa nzu ma kinzu umba ki kwu enzu wu kaa lo gbo Ukpo oya kwuwongu inzumbɛku wu.

15 Kwuwo kwɔlɛ, ngba te mi pwa te lu nyama la Ɔkwu Ɔzhizɔsi Okrasi mbala idɛnyi ipumo yi iyi wa mbwalu, 16 mi gbɛlɛ Ukpo ɛnyi kwuwo yi kwuyengwunanguna ungwu mi lolo mbaa yi mu Ukpo ilɛma mi. 17 Mi koko mi nda Ukpo ete wu Ɔzhizɔsi Okrasi nzu, ete nzu uwu e yi inzumbɛku te, le shi kwundu Ɔkɛrikɛri ungwu ilukwu kaa la zɔ ɛnwu wu ma la yi, kaa iyitu yi iyi Ukpo li kyomo. 18 Mi kyo mi lɛ te Ukpo la wu yi eyi mo kaa la lu zɔngɔma eyi ifulomo iyi bɔkɔ a ya yi awu, mbala esheshi iyɛku iyi bɔkɔ a zɔ te ee shi enzu umba bɔkɔ akwu umba wu awu, 19 mbala imbulama iyi ekpasu wu, inyi gba ii mbwa nzu ma kinzu umba bɔkɔ ki nyama la wu awu. Ekpasu ɛnyi akwu ekpasu iyɛku, 20 iyi bɔkɔ Ukpo e wo ɛduma ma yi kwuyengwu bɔkɔ e yi Okrasi ma mu lukwu akwɛyi e shi wu a ŋɔma mu kwuwo ungwu ungyi wu moshi, 21 Okrasi gba e ri ɛsu iyi uwewe mɔmɔ le kala alɔgbulɔ umba Ukpo umbeshi kala ɛndu iyira. Kunzu ungwu inzumbɛku wu ku ka kunzu ungwu onzu uwakwu uwunawuna ma uwu bɔkɔ e yi mu ɔyi ɔlɛ la ɔyi uwu kwɔnyi kwɔlɛ. 22 Akwɛyi Ukpo e shi Ɔzhizɔsi ɛsu mu apula iyinayina akwɛyi e shi wu te lakwu u to keyi kwuwongu kaa wa mbwalu wu lo fya esheshi ma, 23 wa mbwalu o yi kyamate ɛnwu wu tayi, Ɔzhizɔsi e shi ekpasu wu lɛɛbi la wa mbwalu, uwu gba ba a nyɔlɔ iyinayina ma le.