1 Ɛmɛnɛ mi, akwiyi o yi onzu mo mu ingbomo, lunyi umba bɔkɔ lu yi mu luzɛ mu kwundu awu, la lu gba wu bo mɔguzɛ zezeze. Lunyi ba la lu ngbɛndu, kaa lo mondo yi mo tete mo. 2 Lalu mbwa la esu ma kwuyengwu bɔkɔ onzu uwufo yi e yi mu inyashi imama, moo mu iwomo ɛlɛ gba lu nyɔlɔ ɛrama iyi Okrasi mo le. 3 Onzu uwunawuna uwu bɔkɔ e to ɛnwu te akwu kiya, uwu ba akwu kiya kikpikpɛnyi mo, e kyoro ɛnwu wu ma. 4 Onzonzu le yese luzɛ wu ma kaa la ma, gba luzɛ wu lu shoshi uwu mafyi wu a mwɔnyɛ, akwɛyi a manda luzɛ wu mbala luzɛ undu onzu uwufo shaa mo 5 moo onzonzu e shi ewulo iya wu.

6 Onzu uwunawuna uwu bɔkɔ o zɔ wu iso iyi Ukpo, i shoshi te le to kiya ingyi esheshi kaa le shi onzu uwu a zɔ wu awu.

7 Lalu kyoro ɛnwu yi ma mo, o wo Ukpo ɛnɛ mo. Kiya ingyi onzu e so le gba a lɔ le. 8 Onzu uwu bɔkɔ e so mu ɛnwu a lɔ ira, onzu uwu ba e wo kiya ingyi ki she laa kwundu, a fya kwunyɔ ungwɔkpɔɔ. 9 Ɛnwu li kwunzu mo mu iyeshi iwomo mo, gba ki gyakpɔɔ mu iyeshi iwomo gba kwuye kwu bo ki lɔ ki nyɔ mogba. 10 Kwuwongwu ɔlɛ, gba lu fya kapa la lu wo iyeshi la enzu lɛɛbi, iyi wa mbwalu Ɔzhizɔsi ba li ka le.

11 Lalu yese ɛzu iyɛku iyi bɔkɔ Imi mi ka mafyi mi mu kwupwu kwɔlɛ kaa lo kayi! 12 Enzu umba bɔkɔ o kpa yi mɛga te la lu zɛ ɛsɔ ma awu, akwu enzu umba bɔkɔ o gyi te lo ma mba te umba gba o shoshi le. O wo ɛlɛ kaa lo lo mbo inyashi kwuwongu lukwu undu Okrasi mo. 13 Enzu umba bɔkɔ o zɛ ɛsɔ ma lala o mbwalu ɛrama mo, umba ba o gyite lo zɛ yi ɛsɔ ma kaa umba lo zɔ kenzu ma yi lɛɛbi. 14 Ukpo le se ɔgwuzɛ ma kaa la mi zɔ kenzu, kenzu izɔma mi la kwu mekeka iyi lukwu undu Ɔkwu Ɔzhizɔsi Okrasi. Kwuwongwu lukwu wu, kwudu kwɔlɛ kwu she mi fo, imi ba mi she la kwudu kwɔlɛ fo tete. 15 Laa ɛsɔ izɛma laa kworiyo akwu kiya kinyinyi mo: I gba la onzu imbama iyepo mu Okrasi gba akwu kiya le. 16 Enzu lɛɛbi umba bɔkɔ o mbwalu uwulu ɔlɛ, idigbomo iyi Ukpo mbala eyembembyi wu li yi mbala mba lɛɛbi.

17 Mu imbwama yi, mi gyi te onzu uwunawuna le wo mi egbo gidigidi fo, moo eto iyi bɔkɔ i yi mɛnwu mi le, i zɔ te mi kwu uwu Ɔzhizɔsi Okrasi.

18 Ɛmɛnɛ mi esheshi iyi Ɔkwu nzu Ɔzhizɔsi Okrasi li yi mbala yi lɛɛbi. Li yi tayi.