1 mizhikembo iyi lɔri luwo la londo, Imi mbala Obanaba ki gba ki bo mu Ɔzhɛrusalɛ, mi to Ɔtayitɔ a zɛ mbala nzu tete. 2 Mi ka kyamate bɔkɔ o zɔ mi mu ɛbɛ awu, mi ka te la mi zɛ mba ilɔ iyi Ukpo iyi bɔkɔ mi yi mu izɛma la enzu umba bɔkɔ akwu Azhu mo le. Imi ba mi so yi la enzumbakɔ kyokyo, mo mi gyi te la mi wo ɛduma shaa mo. 3 Ɔtayitɔ uwu bɔkɔ e yi mbala mi bɔkɔ akwu onzu uwu Azhu mo lala o kpa wu mɛga te la zɛ ɛsɔ ma mo. 4 Iso ɛlɛ i bo kwuwongu ɛmɛnɛ umba angba umba bɔkɔ o fye wɛrɛrɛ te lo wo nzu ewo meyi mekeka iyi iwɔ ma iyi bɔkɔ Okrasi Ɔzhizɔsi a wanzu ma le, o gyi te kaa lo ra nzu lo wo enye. 5 Kinzu ba ki shi mbo kapa bwɛ te mo, kwuwongu ki gyi te ongbulolo uwu ilɔ iyesheshi iyi Ukpo ka li yi mbala yi.

6 Enzu umba bɔkɔ o yese ɛmba te umba gba o ka le awu, ingyi bɔkɔ umba o kwu awu, akwa mi kiya mo, mo Ukpo e yese kwudu gba a zɔ ombu le mo, Enzu mbamba ba o do te o kyo kiya kinyinyi mu ilɔ mi mo. 7 Ukpo ba e to ɛduma iyi anu itama e shi mi, kaa la mi tanu la enzu umba bɔkɔ akwu Azhu mo kyamate bɔkɔ e shi Opita kaa la tanu la Azhu tayi. 8 Moo Ukpo uwu bɔkɔ e shi Opita ekpasu kaa le wo ɛduma iyi onzu u zɛ ilɔ la Azhu awu, gba e shi mi le tete kaa la mi wo ɛduma iyi onzu uzilɔ la umba bɔkɔ o kwu Azhu mo . 9 Ozhemisi, Opita mbala,Ɔzhɔnu umba bɔkɔ o yitu mbo te umba gba akwu wa to keyi umba igyirima le awu, o zɔngɔma ma te Ukpo e to ɛduma ɛlɛ e shi mi, akwɛyi o na mi mbala Obanaba ma, o nyama te kinzu la ki so mbaa enzu umba bɔkɔ akwu Azhu mo, umba ba lo so mba Azhu. 10 Iyi bɔkɔ o so gba akwu te, la ki lolo ayirewa umba bɔkɔ o yi meka mba, ɛlɛ gba iyi mu egbo mi iyɔkpɔɔ te la mi wo le.

11 Kwuye ungwu bɔkɔ Opita e bo mu Atiyɔki, mi so wu leyi wu te e wo ɔnyɛ mo . 12 Opita e koko e ri kiya mbala enzu mba bɔkɔ o kwu Azhu mo dɛ, ta bɔkɔ enzu umbafo ɔ wɔ mba Ozhemisi o bo ŋa, akwɛyi e turu a gba kembo, a zɛ kɛmɛ e shi mbo kwuwongu a riyi iyi enzu umba bɔkɔ o nyama laa ɛsɔ izɛma. 13 Azhu umba bɔkɔ o yɔmɔ o kyo mu kwukyoro kwɔngwu, kwukyoro mbo kwɔngwu kwu shi Obanaba a tama tete. 14 Tabɔkɔ mi mate te iwomo mbo i zɛ kya mbala ongbulolo uwu ilɔ iyesheshi ɛlɛ mo, akwɛyi mi za la Opita la eyi iyi enzu lɛɛbi te, <<Uŋɔ ŋɔ kwu Azhu ɔbulɛ ŋɔ wo mate onzu uwu bɔkɔ akwu Azhu mo. I wo te bɔkɔ enzu umba bɔkɔ akwu Azhu mo ŋɔ kpa mba mɛga te lo mbwalu ukwu uwu Azhu?>>

15 <<Uŋɔ mbala mi o mba nzu ki kwu Azhu, ki kwu umba bɔkɔ akwu <Azhu mo, bɔkɔ o ya mba te enzu umba ingbomo awu mo> 16 Kinzu ki yitu te ikwu idu fulo mu Ɔzhizɔsi Okrasi kɛɛkyi gba onzu aa fya inama mbaa Ukpo le, mo akwu ɛrama iyi Omosisi imbwaluma mo. Kwuwongwu ɔlɛ kinzu tete ki kwu idu ki fulo mu Ɔzhizɔsi Okrasi kaa la ki fya inama mbaa Ukpo, mo akwu mu ɛrama imbwalu ma mo, mo onzu uwu bɔkɔ Ukpo e to ombu a sha wu kwuwongu ɛrama iyi Omosisi imbwalu ma e yi mo . 17 Akwiyi gba ki wo te kaa la ki fya inama mbaa Ukpo meka iyi Okrasi akwɛyi o gba o du nzu te ki kwu enzu umba ingbomo kyamate umba bɔkɔ o kwu Azhu mo, ɛlɛ i zɔ te Okrasi e kyo ingbomo mo re? akwu tayi mo ndii. 18 Gba kiya ingyi bɔkɔ Imi gba mi shiri gyi mo le, akwɛyi mi gba ngyi la imbomo debate mi kwu u fo ɛrama ma . 19 Meka iyi ɛrama iyi Omosisi mi yi kyamate ukpɛzhi uwu onzu tayi uwu bɔkɔ ɛrama i yi ekpasu mawu fo, kaka la mi yi kwunyɔ kaa mi wo ɛduma la Ukpo. 20 Mi kpomo mbala Okrasi mu kwuwɛyi ungwu lukwu oo, akwu Imi gba mi yi lareyi le fo Okrasi gba e yi lareyi ma mi le ŋa. I yi lareyi mi, mi kwu idu mi fulo mu umɛ uwu Ukpo uwu bɔkɔ e pwu idɛnyi mi akwɛyi e kpomo kwuwo mi awu. 21 Imi mi towo esheshi iyi Ukpo ma mo, mo akwiyi gba onzu aa fya ototo uwu Ukpo mu ɛrama iyi Omosisi imbwaluma, debate Okrasi e kpomo shaa!