1 Imi Ɔpɔlu, mi kwu uzilɔ uwu bɔkɔ Ada Ɔsu Ukpo mbala Ɔzhizɔsi Okrasi uwu bɔkɔ e kpomo, Ukpo ba e yi wu mo mu kwuvɔ awu, gba o ŋa mi le, akwu onzu uwu inyi igyi gba a ŋa mi le mo. 2 Ɛmɛnɛ lɛɛbi umba bɔkɔ o yi mbala mi, o nyama te la mi kakwupu kwɔlɛ ka lɔ ka yi, lunyi lɛɛbi umba bɔkɔ lu mbwalu Ɔzhizɔsi mu ɛzhi iyi Ogalatiya.

3 Ete nzu Ada Ɔsu Ukpo mbala Ɔkwu nzu Ɔzhizɔsi Okrasi lo shi yi esheshi wu mbala idigbomo. 4 A kwu mi nyama iyi Ada Ɔsu Ukpo gba Ɔkwu nzu Ɔzhizɔsi Okrasi a ra la kwunyɔ wu e shi le kwuwongu ingbomo nzu ka la sa nzu ma mu ira iyi ɔyi ɔlɛ. 5 Iduma lakwu iyi Ada Ɔsu Ukpo iyɔkpɔɔ ba ɔkpɔɔ. Ami.

6 I shi mi kenzu iyama te lunyi lu yi mu ɔgwuzɛ ongbulolo uwu Ukpo, uwu bɔkɔ a ya yi ma mu esheshi iyi Okrasi ilafyima. Lu yi mu ɔgwuzɛ owa 7 uwu bɔkɔ akwu iso iyi Ukpo mo ndii imbwaluma. I zɔ pepee te enzu umbafo o ye yi mu egbo iwo ngɛrɛngɛrɛ ka lo tutu iso iyi Ɔzhizɔsi Okrasi mo. 8 Gba onzu uwunawuna, la kinzu, la ɔlɔgbulɔ uwu Ukpo, a wɔ a ta yi anu iyi rɛnu ingyi Ɔzhizɔsi Okrasi ingyi ri ŋangama mbala ingyi ki so yi dɛ-ɛ awu, Ukpo la ka wu ingyira. 9 Kyamate ki so-o awu, mi gba mi so kpɔ, te: Gba onzu uwunawuna a gba a ta yi anu iyi rɛnu ingyi Ɔzhizɔsi Okrasi ingyi ri ŋangama mbala ingyi lu na awu, onzu awu Ukpo la ta wu mu ɔyi uwu ɔkpɔɔ ba ɔkpɔɔ!

10 Iso iyi mi so le, mi so te ka enzu lo pwɔ mi ma le nana Ukpo ŋa? Na lu ma te mi wo te ka la mi shela enzu mi le ŋa? Lo zɔ te ipwɔma iyi enzu gba mi gyi le, mi kwu umɛgba uwu Okrasi mo.

11 Ɛmɛnɛ mi, mi gyite la lu yitu te iso iyi Ɔzhizɔsi iyi bɔkɔ mi ta yi anu yi awu, akwu mbaa onzu gba i wɔ le mo. 12 Ɔzhizɔsi Okrasi mafyi wu gba a zɔ mi ɛlɔgbulɔ ɛnyi mu ɛbɛ imama akwɛyi e shi mi yi le, mo akwu onzu uwu inyi igyi mo.

13 Lunyi lu pwa eza iyi luzɛ mi mekyi kwuyengwu bɔkɔ mi lɛ Ukpo kyamate Azhu o lɛ awu. Mi lo enzu umba Ukpo inyashi gyɔɔ, mi gyite la mi ngbɛ mba ma lɛɛbi ka lo pwa ɛnyi mba fo. 14 Imi mi ka egwu mi lɛɛbi ekpasu ma mu ɛrama iyi Omosisi mbala ukwu uwu umba asɔkwu mi imbwaluma.

15 Ukpo ba a ŋa mi ngbaa te bɔkɔ mi yi mu ubwu uwu ɛnɛ mi le. Uwu a zɔ mi esheshi wu akwɛyi a ya mi ma, 16 akwɛyi a zɔ mi umɛ wu, Ɔzhizɔsi Okrasi te la mi kwu ɔlɔgbulɔ wu mba enzu umba bɔkɔ akwu Azhu mo. Tabɔkɔ ɛlɛ iwo, akwɛyi mi ka mba onzu uwunawuna te la zɔ mi iso iyi Ɔzhizɔsi mo. 17 Wa zɛ ilɔ mu ɔzhɛrusalɛ umba bɔkɔ Ukpo a ya mba ma keyi la mi, lala mi ka ka la mi ma mba dɛ mo akwɛyi mi kama iyami mu kusɛ ungwu Arabiya dɛ ishi mi bi gbama mu kwuse ungwu Ɔdamasikɔ le. 18 Akwɛyi mizhikembo iyi lɔri lola, mi ka mu ɔzhɛrusalɛ ka la mi ma Opita akwɛyi mi ŋɔ mbala wu nzhi ba afyi uwo la ɛlɔ. 19 Imi ba mi ma ozhemisi, umanyiwu Ɔzhizɔsi kɛɛkyi bi, wa zɛ ilɔ umbafo mbamba, mi ma mba mo.

20 Apula iyi mi ka yi ele lɛɛbi akwu ongbulolo, Ukpo e yitu te ɛlɛ akwu imwilo mo.

21 mizhikembo iyi ɛlɛ mi ka mu ɛzhi iyi Osiriya mbala Osilisiya. 22 Kwuye kwɔngu ba wa mbwalu Okrasi mu Ozhudiya o do yitu mye mo. 23 Umba o pwa eza iyami bi, mba enzu te, <<Onzu uwu bɔkɔ e lo nzu inyashi gyɔɔ awu, kekelele akwu u tanu iyi rɛnu ingyi ikwu idu fulo mu Ukpo ingyi bɔkɔ mekyi, a gyite la ngbɛ ngyi ma awu ŋa.>> 24 Akwɛyi o du Ukpo ma kwuwo mi.